Се поголемата загаденост во Европа и Северна Америка ја нарушува климатската рамнотежа на планетата, а најголема жртва на таквите промени може да

Се поголемата загаденост во Европа и Северна Америка ја нарушува климатската рамнотежа на планетата, а најголема жртва на таквите промени може да стане Африка.

Научници од Канада и Австралија создадоа компјутерски модел за можната климатска ситуација, која што покажува дека се поголемото индустриско загадување од фабриките и термоелектраните над развиените држави од северната хемисфера драматично влијае на создавањето облаци и климатски промени во подсахарската област на Африка, позната како Сахел.

Изминатите 40 години, акумилирањето на влага над Сахел опаднало за речиси 50 отсто.

„Кога научниците во изработката на својот модел го вклучија испуштањето на сулфур над северната хемисфера во 80 – те години, површината на планетата под овие наслаги брзо се ладеле, а ладните маси воздух ги потиснувале дождовните облаци јужно од Сахел и во оваа област донесувале драматични суши“, објави магазинот „Њу сајентист“.

Метеоролозите од Австралиската национална метеоролошка агенција и нивните колеги од Канада, утврдиле дека во изминатите пет години, сушите во Сахел се нешто „поблаги“ што би можело да биде резултат на поострите закони за чист воздух што стапија на сила во северна Aмерика и Европа.

Испуштањето на сулфур нагло растело до 1975 година како последица на повоената индустријализација, а потоа почнало да опаѓа кога се воведени контролите – што донело до кратко олеснување за жителите на Африка – оценуваат експертите.

Иако метеоролозите предупредија дека гасовите кои што учествуваат во создавањето на феноменот „стаклена градина“ влијаат на глобалната клима, истражувањата на австралиските и канадските климатолози претставуваат сериозно предупредување дека индустриските и енергетските капацитети од северната хемисфера драматично влијаат врз климата во Африка./крај/фонет/амп