Рускиот претседател, Владимир Путин, изрази подготвеност за примирје во Украина, но нагласи дека е неопходно да се решат клучните прашања пред неговото воспоставување.

Toj првин, му се заблагодари на претседателот на САД, Доналд Трамп за учеството во решавањето на конфликтот. Путин ја нагласи потребата од сеопфатен мировен договор што би обезбедил долгорочен мир.

„Се чини дека Украина ја донесе одлуката под американски притисок. Убеден сум дека Украина прифати затоа што Американците ги убедиле, имајќи ја предвид ситуацијата на теренот. Бев во Курск, ситуацијата е целосно под наша контрола. Групата што влезе во оваа област е опколена. Украинското воено раководство е елиминирано, изгубија таму. Потоа се обидуваа да избегаат во мали групи, но сè е под наша контрола. Оставија опрема. Во следните неколку дена ќе ја блокираме регијата, никој нема да може да замине. Ќе има само два начина за излез – смрт или предавање“, рече Путин.

Додаде дека за украинската страна би било добро да има 30 дена примирје, и Русија се согласува, но прашува што значи тоа за Курск.

„Дали тоа значи дека Украинците слободно ќе си заминат, дури и оние кои извршиле злосторства? Што ќе се случи на првата линија? Русија моментално е во офанзива на сите фронтови. Како ќе ги искористат тие 30 дена? За да продолжат со присилната мобилизација во Украина, да добиваат оружје и да тренираат единици? Како ќе се спроведува контролата, како може да ни биде гарантирано дека тоа нема да се случува? Кој ќе ги издава наредбите за прекин на огнот? Станува збор за 2000 километри – кој ќе одлучува кој и каде го прекршил примирјето? Ова се прашања што мораат детално да бидат разгледани од двете страни. Идејата како таква е добра, но мора да се дискутира.  Мораме да разговараме со американските партнери, можеби да разговараме со претседателот Трамп. Но, поддржуваме решение на конфликтот со мирен пат,“ изјави Путин.

„Ги знаеме нашите интереси и цели, разговаравме со Трамп. Гледавме како Зеленски беше понижен во Белата куќа и насекаде. Сега мора да размислува за мир. Немаше ни збор за договор за минералите, а сега се согласуваат на тоа,“ додаде тој.

Според Путин, ако Русија и САД се договорат да соработуваат во областа на енергетиката, тогаш гасоводите кон Европа можат повторно да се активираат, и Европа ќе добие евтин гас.

Американскиот претседател Доналд Трамп повторно ја критикуваше актуелната трговска политика на САД, велејќи дека земјата е во загуба во глобалните трговски односи. На социјалната мрежа „Трут соушал“ тој напиша:

„САД немаат слободна трговија. Имаме глупава трговија. Целиот свет нè краде!!!“.

Трамп претходно изјави дека Европската Унија, која „е најнепријателскиот злоупотребувач на даноците и царините во светот и е создадена со единствена цел да ги искористува Соединетите Држави, штотуку воведе царина од 50 отсто за вискито“.

„Доколку овие тарифи не се укинат веднаш, САД наскоро ќе воведат царина од 200 отсто за сите вина, шампањ и алкохолни производи кои доаѓаат од Франција и други земји во ЕУ.  Тоа ќе биде одлично за бизнисот со вино и шампањ во САД“, напиша тој на социјалната мрежа.

Европската комисија објави дека на 1 април ќе ја прекине сегашната суспензија на царините за американските производи и дека нејзините мерки целосно ќе стапат во сила до 13 април.

Белорускиот претседател Александар Лукашенко изјави во Москва, каде што дојде да го посети рускиот претседател Владимир Путин, дека Украина веројатно нема да се согласи на привремен прекин на огнот.

Украина веќе се согласи на прекин на огнот во преговорите со САД, но Лукашенко се сомнева во искреноста на нивните намери.

„Кога има прекин на огнот, сè оди тивко и нема движење. Украинците веројатно нема да се согласат на тоа“, им рече тој на новинарите.

Белорускиот претседател Александар Лукашенко изјави во Москва дека САД немаат план, мислејќи на прекинот на огнот предложен од Вашингтон.

„Можам со апсолутна сигурност да кажам дека Американците немаат план за конфликтот во Украина. Апсолутно не“, рече тој.

„Тоа што го прават… тестираат. Што сака оваа страна? Што сака другата страна? Ќе разговараме за тоа денеска. Владимир ќе ми каже“, додаде Лукашенко.

Во вторникот во саудискиот град Џеда се одржаа разговори меѓу американската и украинската делегација. По средбата, двете страни издадоа заедничка изјава во која се вели дека Украина е подготвена да прифати 30-дневен прекин на огнот предложен од САД.