Свет
Почна погребната церемонија на жртвите во Италија
Семејствата, роднините и пријателите се собраа денеска околу 200 ковчези украсени со цвеќе на заедничкиот погреб на загинатите од земјотресот
Семејствата, роднините и пријателите се собраа денеска околу 200 ковчези украсени со цвеќе на заедничкиот погреб на загинатите од земјотресот во Италија што в понеделникот го погоди централниот дел на државата.
Во Аквила, планинското гратче кое што најтешко беше погодено од земјотресот со јачина од 6,3 степени по Рихтеровата скала, ковчезите се поставени во четири реда пред полициската станица, јавуваат локалните медиуми.
Мисата за 200 – те жртви ќе ја води државниот секретар на Ватикан, Таркисио Бертоне. Некои од 289 – те жртви веќе се погребани од страна на семејствата. Меѓу загинатите има и шестмина македонски државјани.
Премиерот Силвио Берлускони и други владини претставници се меѓу 10 – те илјади собрани граѓани на испраќањето на загинатите во подножјето на планинските врвови на областа Абруцо.
Погребите се организираат на отворено затоа што ниту една црква во таа област не е стабилна и безбедна.
Цела Италија тагува денеска. Владата прогласи ден на жалост, знамињата се веат на половина копје, а голем број продавници во Рим се затворени за време на погребот.
„Им благодариме на жителите на Абруцо за нивната сериозност, пристојност и достоинство. Денеска им оддаваме почит на нивните починати, кои се и наши починати“ рече премиерот Силвио Берлускони.
Италијанските медиуми јавуваат дека била побарана специјално одобрување за погребите од папата Бенедикт XVI, затоа што во католичките цркви на Велики петок не се служи миса. Папата планира многу скоро да го посети Абруцо.
Најавен е и погреб по муслимански обичај за шестмина загинати муслимани.
И покрај големата тага и шок, не само на семејствата на загинатите, туку и на цела Италија, вниманието полека се свртува кон обнова и изградба. Според првичните проценки, штетата изнесува околу три милијарди евра. Берлускони изјави дека Италија од фондовите на ЕУ ќе добие до 500 милиони евра.
Владата исто така најави истрага. Претседателот Џорџо Наполитано за време на вчерашната посета на погодената област, констатирал дека многу згради од најнов датум се урнале како кули од карти, а требало да бидат отпорни на земјотреси.
„Луѓето треба да размислат за својата совест“, рече Наполитано, а градежниците возвратија дека „не се убијци“./крај/хи/амп
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Шефот на НАТО: Кина сака добри односи со Западот и и помага на Русија, не може да ги има и двете
Кина мора да престане да ја поддржува руската војна во Украина ако сака да ужива во добри односи со Западот, изјави денеска генералниот секретар на НАТО Јенс Столтенберг, предупредувајќи го Пекинг со невообичаено остри зборови дека не може да ги има и двете. За време на посетата на Берлин, шефот на западната воена алијанса рече дека помошта на Пекинг е од витално значење за воените напори на Москва бидејќи ја зајакнува воената економија на Русија со споделување на врвна технологија, како што се полупроводниците.
„Минатата година Русија увезе 90 отсто од својата микроелектроника од Кина, која се користи за производство на проектили, тенкови и авиони. Кина исто така работи на Русија да и обезбеди подобрени сателитски способности“, рече Столтенберг. „Кина вели дека сака добри односи со Западот. Во исто време, Пекинг продолжува да го поттикнува најголемиот вооружен конфликт во Европа од Втората светска војна. Не може да ги има и двете“, предупреди тој.
Столтенберг ги предупреди западните сојузници да не станат зависни од Кина како што беа од Русија. „Во минатото направивме грешка што станавме зависни од руската нафта и гас. Не смееме да ја повториме таа грешка со Кина и да зависиме од нејзините пари, суровини и технологии. Зависноста не прави ранливи“, додаде тој.
Кина ги зајакна трговските и воените врски со Русија во последниве години, бидејќи САД и нивните сојузници воведоа санкции и на двете, но особено на Москва, поради нејзината инвазија на Украина. Рускиот претседател Владимир Путин изјави во четвртокот дека планира да отпатува за Кина во мај, но не прецизираше точно кога.
Свет
САД градат привремено пристаниште во близина на Газа за испраќање хуманитарна помош
Соединетите Држави почнаа да градат пристаниште во Газа, соопшти денеска Пентагон, проект кој треба да ја олесни испораката на хуманитарна помош на палестинската територија. Пристаништето треба да профункционира на почетокот на мај.
Во март, претседателот Џо Бајден објави дека американската војска ќе изгради привремено пристаниште на медитеранскиот брег на Газа за да добива хуманитарна помош по море.
Изградбата е дел од напорите да се спречи гладувањето во палестинската енклава, која веќе пет месеци се наоѓа во средината на израелската воена кампања против Хамас, која го опустоши Појас Газа и ги потопи нејзините 2,3 милиони луѓе во хуманитарна катастрофа.
„Можам да потврдам дека американските воени бродови, вклучително и УСНС Бенавидез, почнаа да градат привремено пристаниште…“ изјави за новинарите портпаролот на Пентагон, Патрик Рајдер.
ОН предупредија дека Газа е во опасност од глад и се пожалија на „огромни пречки“ при добивањето помош и нејзино дистрибуирање низ енклавата.
Агенциите за помош и администрацијата на Бајден го молеа Израел да ја олесни испораката на помош во Газа и да им дозволи на нивните конвои безбедно поминување на територијата.
Рајдер рече дека Пентагон следи некој вид минофрлачки напад во Газа што предизвика минимална штета во близина на областа каде што се гради пристаништето, но додаде дека американските сили сè уште не почнале да преместуваат ништо во областа и дека нема американски сили на теренот.
Свет
(Видео) Големи поплави во Танзанија, загинаа 155 луѓе
Во поплавите во Танзанија загинаа 155 луѓе, а најмалку 236 се повредени, изјави денеска премиерот Касим Мајалива. Во поплавите оштетени се повеќе од 10.000 куќи.
Премиерот додаде дека обилните дождови предизвикани од Ел Нино и придружени со силен ветер доведоа до поплави и лизгање на земјиштето во различни делови на земјата.
„Многу луѓе загинаа. Имаше штета на посевите, куќите, инфраструктурата како патишта, мостови и железници“, рече Мајалива.
Поплави ја погодија и Кенија, која се граничи со Танзанија на истокот на Африка, при што загинаа повеќе од 30 луѓе, пишува Си-ен-ен.
Во Кенија врне силен дожд од средината на март, а врнежите се интензивираа минатата недела. Кенискиот Црвен крст изврши повеќе од 188 спасувачки операции од март. Властите вчера затворија некои патишта во главниот град на Кенија, а неколку населби беа поплавени.