Нов американски амбасадор во Русија ќе биде Џон Саливен, актуелен заменик на американскиот државен секретар. За него гласале 70 сенатори, додека 22 биле против.

Во текот на сослушувањето во Сенатот, Саливен ветил дека ќе заземе цврст став кон Русија, силно се спротиставил на повторното соединување на Крим со Русија и ја обвинил Москва за мешање во американските претседателски избори во 2016 година.

Саливен беше именуван за заменик-државен секретар во 2017 година. Од 1 до 26 април 2018 година беше вршител на должност државен секретар, по оставката на Рекс Тилерсон.

Украинската полиција уапси неколку лица кои се осомничени за убиството на новинарот Павел Шеремет во 2016 година, но сè уште не е утврдено кои се нарачателите. Меѓу уапсените има ветерани од петгодишната војна со проруските сепаратисти во источна Украина.

Павел Шеремет, роден во Белорусија, беше убиен со подметната експлозивна направа под неговиот автомобил во центарот на Киев на 20 јули 2016 година. Тој важеше за прозападен новинар и гласен критичар на руските, белоруските и украинските власти.

Познат по својата независност, Шеремет работеше за влијателниот украински интернет портал „Украинска правда“ и имаше утринска емисија на радио „Киев“.

Украинскиот претседател, Володомир Зеленски, рече дека иако уапсените се осомничени дека го извршиле убиството, сè уште не се знае кои се нарачателите.

(Фото: ЕПА)

Министерот за внатрешни работи на Украина, Арсен Аваков, рече дека истрагата дала сензационални и шокантни резултати.

„Јавноста мора да ја разбере разликата меѓу патриотизмот и велепредавството“, рече Аваков.

Заменик-шефот на националната полиција, Јехвен Ковал, рече дека осомничените имале намера да ја дестабилизираат социјалната и политичката ситуација во Украина преку убиството на познатиот новинар.

Еден од осомничените, Андри Антоненко, објави на „Фејсбук“ дека е уапсен. Антоненко, рок-музичар, бил во специјалните сили во текот на борбите на истокот на Украина. Меѓу уапсените е и Јулија Кузменко, докторка која волонтирала да ѝ помогне на војската на истокот и Јана Дугар, која се борела во судирите.

Судот во Брисел ѝ нареди на белгиската Влада да бидат примени 10 деца родени во Сирија, на припаднички на Исламска држава кои се од белгиска националност.

Децата, на возраст од седум месеци до седум години, треба да бидат доведени во Белгија во рок од шест недели. Тие во моментов се наоѓаат во бегалскиот камп Ал-Хол во североисточна Сирија, кој е под контрола на Курдите.

Според решението на Судот, ако владата не даде конзуларна помош и документи за децата тогаш ќе биде казнета со 5.000 евра по дете.

Белгискиот министер за правда, Коен Гинс, изјави дека Владата е подготвена да ги земе децата сè додека не мора да ги врати во Белгија и нивните мајки.