Мајкл Џексон, „кралот на поп музиката“, кој почина во четвртокот во Лос Ангелес по прекин на работата на срцето, зад себе остави наследство

Мајкл Џексон, „кралот на поп музиката“, кој почина во четвртокот во Лос Ангелес по прекин на работата на срцето, зад себе остави наследство на револуционерно влијание врз музиката, обременето со обвинувања за злоставување деца и бизарно однесување.

Имаше 50 години и се подготвуваше за 50 концерти во Лондон во О2 Арена, кои требаше да бидат завршена серија на неговите настапи во живо.

Џексон, кој по десетината пластични операции и депигментацијата, делуваше крајно неприродно, во последно време, според изјави на негови блиски, бил многу исцрпен и со кревко здравје.

Постариот брат на Мајкл, Џермејн Џексон (54) им изјави на новинарите дека лекарите од итна помош се обиделе со реанимација, еден час откако Мајкл бил хоспитализиран. „ Не беа успешни“, изјави Џермејн. „Нека Алах биде со тебе, засекогаш“, додаде тој.

Личниот лекар на Мајкл бил со него кога колабирал во семејниот дом и се обидувал да го оживее. „Нека Алах биде со тебе, засекогаш“, рече Џермејн Џексон.

Пожарникарската служба на Лос Ангелес била повикана во резиденцијата на Џексон во 12,26 часот по западноамериканско време. Болничарите се обиделе да го оживеат Мајкл, кој не давал знаци на живот, кога тие пристигнале. Итно бил префрлен во Медицинскиот центар УКЛА, оддалечен само десет километри.

Лиза Мери Присли, ќерката на легендарниот Елвис Присли, која беше мажена за Мајкл Џексон од 1994 до 1996, соопшти дека е „шокирана и ожалостена од смртта на Мајкл“ и оти нејзиното срце е со децата и семејството на Мајкл.

Прославената актерка Елизабет Тејлор, според многумина, најблиската пријателка на Мајкл, е „премногу потресена од смртта на драгиот пријател за да издаде соопштение“, соопшти нејзиниот портпарол.

„Долго време, Мајкл, несомнено беше најславната личност на планетата“, изјави Џед Хили, извршен директор на Американската музичка асоцијација АМА:

Брук Шилдс, која кратко време се забавуваше со Мајкл, исто така, објави соопштение.„Моето срце е скршено поради големата загуба на мојот вистински пријател Мајкл. Беше исклучителен пријател, уметник и некој кој придонесува за светот“, наведе Шилдс.

Голем број обожаватели на Мајкл Џексон се собраа во четвртокот вечер по западно американско време, пред Медицинскиот центар УКЛА,. како и неговиот дом и домот на неговите родители во Калифорнија.

Со солзи и песни, собирање на обожавателите на кралот на поп музиката имаше и во Њујорк, Вашингтон, Филаделфија, Чикаго и во други американски градови./крај/ег/