Околу 54.000 луѓе се евакуирани од италијанскиот град Бриндизи поради деактивирање на бомба во Втората светска војна, соопштија локалните власти.

Бомбата била случајно откриена за време на реновирање на театар.

Весникот „Кориере дел Сера“ објави дека операцијата за евакуација е најголемата извршена во Италија, во период на мир во земјата, при што повеќе од 60 проценти од жителите на Бриндизи мораа да ги напуштат домовите на растојание од 1.617 метри од локацијата каде е пронајдена бомбата.

Британската бомба, за која се верува дека е фрлена на градот во 1941 година, е долга еден метар и содржи 40 килограми динамит, соопштија градските власти.

Боливија во следните неколку дена ќе издаде налог за апсење на поранешниот левичарски претседател Ево Моралес заради бунт, изјави привремената претседателка на земјата Жанин Ањез.

Моралес во моментов се наоѓа во Аргентина, каде неделава доби статус на бегалец, пренесе „Ројтерс“.

„Може да се врати кога и да посака. Замина бидејќи тоа го сакаше“, рече Ањез и додаде дека во следните неколку дена ќе биде распишан налогот за негово апсење.

Статусот на поранешниот боливиски претседател беше решен со инаугурацијата на новиот аргентински претседател Алберто Фернандез, кој го наследи конзервативецот Маурисио Макри.

Моралес претходниот месец го мина во Мексико, по бурните случувања во неговата земја во октомври кога беше обвинет за организирање и учество во „наместени избори“.

Иако прогласи победа по првиот круг од гласањето на претседателските избори, оддржани на 20 октомври, Моралес, по речиси 14 години минати на власт, беше присилен да поднесе оставка под притисок на вооружените сили во земјата. Една недела подоцна веќе избега во Мексико, каде побара и експресно доби азил.

Шестгодишно девојче загина откако се сруши ѕид за време на силниот земјотрес oд 6,8 степени што денеска ги погоди Филипините, изјави градоначалникот на градот Матанао на југот во земјата.

Трикатна зграда се сруши во земјотрес на југот на Филипините, а луѓето избегаа во паника од продавниците, домовите и другите згради, соопштија официјалните лица.

Во срушената зграда има една продавница и спасувачите проверуваат дали има жртви или заробени лица под урнатините.

Филипинскиот институт за вулканологија и сеизмологија објави дека земјотрес со јачина од 6,8 степени погодил област на околу шест километри северозападно од градот Падад, на длабочина од 30 километри во провинцијата Давао дел Сур, пренесува АП.

Во некои градови снема струја, а службените лица во градовите Давао и Котабат, каде земјотресот се почувствува многу силно, решија децата да не одат во училиштата во понеделник сè додека не се провери стабилноста на училишните згради.

Регионот Давао во последните месеци го погодија неколку земјотреси во кои имаше настрадани и повредени, а оштетени се домови, хотели, трговски центри и болници.