Неофицијално, петте паркинзи под кирија ќе останат во наредните 10 години, а новиот газда со договорот добил и право да изгради нов, за паркирање на над 1000 возила.

КЛИНИЧКИ ЦЕНТАР ДАВА ПОД НАЕМ ЗЕМЈИШТЕ ЗА БАДИЈАЛА

Неофицијално, петте паркинзи под кирија ќе останат во наредните 10 години, а новиот газда со договорот добил и право да изгради нов, за паркирање на над 1000 возила.

Паркинзите во Државна болница се дадени на користење за бадијала. Според неофицијални информации, новиот газда за нивното работење ќе плаќа околу 100 евра месечно, пари кои, како што коментираат некои сопственици на други паркинзи во градот, ќе се извадат за половина ден. Засега е предвидено петте паркинзи под кирија да останат во наредните 10 години. Освен што ќе ги користи постојните, концесионерот, за кого се шпекулира дека е близок до владејачката коалиција, добил право да изгради уште еден нов паркинг. Вработените во Државна кажуваат дека локацијата е веќе позната и станува збор за дел од паркот спроти Хируршките клиники во кој е сместен и хелиодромот. Новиот паркинг ќе биде точно под глава на најтешко болните и под прозорецот каде што лежат оперирани пациенти на Хирургија.

Шпекулациите се дека за користењето на паркинзите, Клиничкиот центар не распишал тендер и дека целата работа е договорена во четири очи. Дека е нешто сомнително потврдува и одбивањето на директорот на Државна проф. д-р Андреја Арсовски четири дена да даде какво било објаснување за концесијата на паркинзите.

“Директорот не е во Управа, докторот е на состанок, Арсовски е на комеморација”, беа коментарите на неговата секретарка и други вработени во Управата.

Дури ни претседателот на Управниот одбор на Клинички проф. Владо Георгиев не знаеше да каже кој е новиот газда и под кои услови се издадени паркинзите во установата за која тој има обврска да се грижи.

” Не знам, сум заборавил дали имаше тендер. Знам, имаше нешто, ама кога беше тоа не се сеќавам. Прашајте во Управа тие ќе ви кажат. Ние како Управен одбор сега само распишуваме јавен повик, но директорот има право по него да одлучи лично, без наша согласност”, ни изјави проф. Георгиев.

” Ги расчистија грмушките, исекоа некои дрвца што имаше тука и веќе почнаа со тампонирање. Кај и да е, и тука ќе почнат да се паркираат коли. Никој не кажува кој е новиот газда, ама едно е сигурно, добил златна кокошка оти луѓето кои влегуваат во Државна не прашуваат колку чини влезот, важно им е болниот да го донесат до потребната болница”, велат вработените во Клиничкиот центар. Новиот газда на паркинзите најавил дека паркирањето ќе се наплатува по час: 20 денари за еден, и за секој нареден по 10 денари плус. Ќе имало и месечни и годишни картички чија цена ќе била со попуст, но сите, па дури и болните кои редовно доаѓаат во Клинички, ќе мора да ја имаат и да ја платат.

Во моментов влезот во Клиничкиот центар не се наплатува, иако јавна тајна е дека за пристап во неговиот круг тарифата на црно е 50 денари. Дневно низ Државна поминуваат илјадници возила.

Режимот, кој важи само на хартија, предвидува слободен влез во Државна да имаат само возила кои пренесуваат пациенти во тешка состојба, болни на дијализа и останати лица кои имаат белешка од лекар дека не можат да одат пеш и им е неопходен транспорт до болницата. Право на влез имаат и таксисти кои смеат да влезат, но не и да се задржуваат внатре во Клиничкиот блок. За вработените е предвидено точно место за паркирање.

Но, со години ова правило никој не го почитува, па често се случува поради метеж од возила уличките да се блокираат и да не може да влезе возило на Брза помош.

А.Стојановска