Даночните малверзации и нивното толерирање од државава Европската Унија ги смета за македонски феномени.

ОСТРИ КРИТИКИ ОД ЕВРОПСКАТА КОМИСИЈА

Даночните малверзации и нивното толерирање од државава Европската Унија ги смета за македонски феномени. Во мислењето што завчера стигна од Европската комисија за кандидатурата на Македонија за членство во ЕУ, Брисел и порачува на Владата да обезбеди еднаков третман за сите даночни обврзници.

“Феномен е што се толерираат одредени даночни обврзници, кои не плаќаат даноци и социјални давачки. Да се елиминира поддршката кон неплаќањето на даноците и на социјалните давачки. Да се осигура ефективно гонење на лицата и на компаниите што учествуваат во даночните пирамидални шеми”, децидна е Европската комисија.

Министерот за финансии Никола Поповски вчера не сакаше да ги коментира овие забелешки од Брисел бидејќи се уште не стигнал да го прочита извештајот. Тој само порача дека се додека има сива економија во земјава, ќе има и даночна евазија. Токму Поповски пролетва објави дека во земјава функционираат даночни пирамиди и најави гонење на сите субјекти што низ организирани шеми избегнуваат плаќање на даноците. Иако се проценува дека во даночната пирамида се вртат над 100 милиони евра и дека во неа се вклучени повеќе звучни имиња, во изминатите месеци беа поднесени 60-ина кривични пријави за даночен криминал во износ од над 2,5 милиони евра. Најголем дел од пријавите се против скопскиот бизнисмен Миодраг Мисајловски. Освен даночни обврзници, на одговорност не беше прозван ниеден вработен или управител во Управата за јавни приходи, која е должна навреме и редовно да ги собира даноците. Единствено кривична пријава беше поднесена против вработена во УЈП, која преку семејни фирми избегнувала плаќање на даноците.

Според професорот Живко Атанасовски од Економскиот факултет во Скопје, кој е експерт за даночна политика, оваа појава во Македонија е резултат на спрегата помеѓу бизнисот и политиката.

– Добро е што ова е забележано од ЕУ и што е посочено. Кај нас не се преземаат казнени мерки против даночни малверзации, кои и се познати на државата, поради статусот или позицијата во политиката или општеството на конкретните даночни обврзници. Не ми е познато дека во ЕУ се даваат такви даночни привилегии и дека се замижува за одредени случаи – вели Атанасовски. Тој вели дека за да се искорени оваа појава не се потребни реформи, туку промена на односот на власта, што според него, е многу потешко. Професорот Атанасовски укажува и дека УЈП не смее да дозволи нејзините служби да доцнат со наплатата на даноците од некои обврзници поради неажурност бидејќи и така се создава нерамноправен третман на економските субјекти.

Стопанствениците и порачуваат на Владата дека за да воспостави еднаков третман треба да ги укине даночните привилегии што ги имаат странските инвеститори или и домашните да ги ослободи од плаќање данок на добивка. Тие се категорични дека државата мора да има предвид дека домашните стопанственици со даноците го полнат македонскиот буџет, а не касата на некоја друга земја. Владата ги држи даночните повластици за странските инвеститори со цел да привлече што повеќе капитал во земјава. Ова не се покажа како многу атрактивна мерка бидејќи Македонија е на дното во регионот според обемот на странски инвестиции.