Комисијата предлага министерот за правда да нема право на глас во Судскиот совет, а јавниот обвинител да не ужива имунитетот од Собранието

ВЕНЕЦИЈАНСКА КОМИСИЈА

Комисијата предлага министерот за правда да нема право на глас во Судскиот совет, а јавниот обвинител да не ужива имунитетот од Собранието

Предложените уставни амандмани за реформа на судскиот систем се позитивни и со нив ќе се зацврсти независноста на судската власт и на обвинителството преку пренесување на моќта за регулирање на нивните органи врз Судскиот и Обвинителскиот совет. Ова е истакнато во мислењето на Венецијанската комисија за нацрт-амандманите на Уставот, кое беше усвоено на 64. пленарна сесија, одржана на 21 и 22 октомври годинава.

Во заклучоците на Венецијанската комисија, како можност за подобрување на текстот на амандманите, се вели дека треба да се истакне оти судиите што ќе членуваат во Судскиот совет ќе бидат избрани од самите судии. Членовите на Комисијата сметаат дека за јакнење на независноста на судството и за негово ослободување од политички влијанија и мешања е потребно во амандманите да се предвиди можност за жалба на одлуката на Судскиот совет за разрешување судија. Тие сметаат дека треба да се размисли во амандманите да се посочи дека судскиот совет предлага судии, а друг орган, на пример, претседателот на државата ги назначува.

Според членовите на Комисијата, членството по функција на министерот за правда во Судскиот совет треба да биде сменето со право на присуство на седниците или со членство без право на глас. Како алтернатива на предлогот претседателот на Врховниот суд да биде претседател и на Судскиот совет, комисијата предложила првиот човек на ова тело да се избира со гласање. На сесијата во Венеција било искажано и сомневање дали Судскиот совет треба да биде орган со целосно работно време. Според комисијата, судиите и другите членови на Судскиот совет треба да продолжат да ја работат и својата основна работа, а ако сепак се остане на ова решение, министерот за правда и претседателот на Врховниот суд да бидат исклучоци. Судскиот совет не треба да ги дава конечните правила за дисциплинската одговорност на судиите, а тие треба да имаат право на жалба пред суд против дисциплинските казни.

Членовите на комисијата сметаат дека и покрај потребата од поголема независност не е неопходно да се формира обвинителски совет по истиот модел како судскиот совет бидејќи судиите и обвинителите имаат различна улога и поставеност. Според нив, за да се избегне политизацијата, Јавниот обвинител не треба да ужива имунитет од Собранието.

Во Венецијанската комисија постоела дилема за предложениот пробен мандат на судиите, но Владата во предлог амандманите се откажа од ова решение.

Натали Н. Сотировска