Свет
Екс израелскиот претседател Кацав осуден за силување порано ќе излезе од затвор

Израелската комисија за помилување во неделата донела одлука да го пушти од затвор поранешниот израелски претседател Моше Кацав откако отслужи пет од седумте години затворска казна поради силување и уште неколку неморални акти, соопшти неговиот адвокат.
„Беше тоа многу долго патување. Денеска тоа патување е завршено со една разумна одлука на комисијата за помилување“, изјави Цион Амир за израелското воено радио, пренесува весникот Haaretz.
Судските власти не биле достапни за коментирање на поединостите од случајот. Но медиумите пишуваат дека ослободувањето од затвор на некогашниот претседател Моше Кацав е одложено за најмалку една седмица додека обвинителството не одлучи дали ќе вложи жалба.
Судот во Тел Авив на 30-ти декември 2010 година го прогласи Кацав виновен за двојно силување на подредена службеничка, за два неморални чина, од кои еден со примена на сила, како и за сексуално вознемирување на две службенички во претседателскиот кабинет. Исто така, Кацав е прогласен за виновен и за попречување на правосудниот процес.
Покрај седумте години затвор, поранешниот израелски претседател беше осуден и на две години условно и на глоба од 100.000 шекели, односно околу 25.000 американски долари.
Адвокатите на сега 71-годишниот Кацав рекле за новинарите дека поранешниот шеф на државата заплакал од среќа по одлуката на судот за негово предвремено пуштање од затвор./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ бесен на Европските зелени: Олош сте, ќе одговарате пред законот на Србија!

Српскиот претседател Александар Вучиќ упати жестоки критики кон Европската зелена партија, обвинувајќи ја дека стои зад насилствата на протестите во Нови Сад.
„Одете, уништете ги вашите земји. Не ја уништувајте Србија. Вие сте олош. И не сте ни олош, полоши сте од тоа. Тоа е сè што имам да ви кажам. Дали се плашиме? Ни најмалку. Ја почитувам Урсула фон дер Лајен. Го почитувам Антонио Кошта. На ова ѓубре, олош, од Европската зелена партија, најлошиот олош во Европа што дојде во Нови Сад вчера за да го поддржи ова насилство, ќе бидат гонети во согласност со законите на Република Србија“, изјави Вучиќ.
Тој се осврна и на бројките од протестите, нагласувајќи дека низ цела Србија излегле помалку од 10.000 луѓе, додека најмногу имало во Нови Сад.
„9.380 луѓе биле низ цела Србија на митинзи против владата, од кои 7.020 биле во Нови Сад, според бројките на Министерството за внатрешни работи. И насекаде беше мирно, без инциденти, освен во Нови Сад. Полицијата им дозволи да ги тепаат со пиротехнички средства, стапови и камења цели 12 минути. Дури тогаш полицијата реагираше“, рече Вучиќ.
Претседателот предупреди дека ситуацијата во Нови Сад ескалирала и поради присуството на европратеници, кои, според него, сакале да ја нарушат стабилноста на Србија.
„Некои се обидоа со фантомки и шлемови да ги окупираат просториите на Филозофскиот факултет, но не успеаја“, нагласи Вучиќ.
Тој додаде дека српската полиција постапила строго професионално, но дека во инцидентите биле повредени 11 припадници на МВР.
Свет
„Не одам кај терористот“, Зеленски ја отфрли понудата на Путин

Украинскиот претседател Володимир Зеленски категорично ја отфрли идејата на рускиот лидер Владимир Путин за билатерална средба во Москва, објави Укринформ, повикувајќи се на интервју за американскиот канал Еј-Би-Си Њуз.
„Тој може да дојде во Киев. Не можам да одам во Москва кога мојата земја е под ракетни напади, под напади секој ден. Не можам да одам во главниот град на овој терорист“, истакна Зеленски.
Претседателот нагласи дека предлогот на Путин бил повеќе обид за одложување на средбата отколку искрен повик за дијалог. Сепак, тој е подготвен да се сретне во која било форма, но само ако средбата не ја загрозува Украина.
„Ако некој не сака да се сретне за време на војна, може да понуди нешто што не би било прифатливо за мене или за другите“, додаде Зеленски, додавајќи дека Путин „си игра со САД“.
Претходно, Путин изјави дека е подготвен да се сретне со Зеленски и дека Москва е најдобро место за можна средба меѓу двајцата лидери, што веднаш беше одбиено од украинскиот претседател.
Свет
Британски хирург си ги замрзнал нозете за да ги ампутира, сега е откриено зошто го направил тоа

Британскиот хирург Нил Хопер (49), познат како „хирургот со протези“, е осуден на повеќе од две години затвор откако судот откри дека намерно ги замрзал своите нозе пред ампутација за да заработи повеќе од 600.000 долари од осигурителните компании.
Хопер тврдел дека неговите ампутации во 2019 година биле последица на сепса и мистериозна болест, што привлече големо медиумско внимание и го направи познат како човек што се обидувал да стане астронаут со протези.
Сепак, вистината е дека самиот Хопер ги предизвикал ампутациите, користејќи сув мраз, и се изјаснил за виновен за измама и за поседување екстремна порнографија поврзана со веб-страницата „Eunuch Maker“.
Сексуална фиксација и врски со криминална мрежа
Обвинителите тврдеа дека Хопер бил сексуално фиксиран на ампутациите и разменувал пораки со Мариус Теодор Густавсон, познат како основач на сајтот „Eunuch Maker“, кој веќе е осуден на доживотен затвор за водење криминална мрежа за екстремна модификација на телото.
Судијата истакна дека материјалите поседувани од Хопер прикажуваат „екстремни нивоа на штета“, а адвокатот на Хопер рече дека неговиот клиент се кае за лажните приказни околу ампутациите, но не и за самите операции.
Кој е „Eunuch Maker“?
Густавсон, кој ја водеше веб-страницата EunuchMaker.com со речиси 23.000 корисници, бил вмешан во нелегални процедури вклучувајќи кастрации, електрични шокови, жигосување и чување делови од телото како „трофеи“. Иако некои учесници наводно дале согласност, обвинителите наведуваат дека процедурите биле нелегални и сериозно штетни.
Обвинителите истакнаа дека мотивацијата на Густавсон и Хопер била комбинација од сексуален интерес, телесна дисморфија и финансиска добивка, што довело до сериозни повреди на другите.