Италијанската Влада усвои една од најстрогите антиковид-мерки во светот. Се бара од сите вработени во јавниот и приватниот сектор да имаат сертификат за вакцинација, негативен тест за коронавирус или потврда дека неодамна ја прележале болеста.

Одлуката беше донесена на владина седница и треба да стапи на сила на 15 октомври.

Целта на овој потег е луѓето да се вакцинираат за да се намали заразата во една од најпогодените земји од пандемијата на коронавирусот.

Работникот кој нема да може да презентира валиден здравствен сертификат ќе биде суспендиран без плата, но не може да добие отказ. Оние што ја игнорираат уредбата и ќе дојдат на работа без ковид-сертификат, ќе добијат казна од 600 до 1.500 евра, пренесе „Ројтерс“.

Иако некои земји од ЕУ наредија здравствените работници да се вакцинираат, ниту една пред Италија не утврди дека ковид-сертификатот е задолжителен за сите работници.

Идејата за ковид-сертификат првично беше поврзана со патувањата, но Италија многу брзо почна да ја применува на места како музеи, спортски сали и внатрешноста на рестораните.

Иако во последните недели имаше протести против ковид-мерките, повеќето политички партии, како и големите здруженија на работодавци ги поддржаа, со надеж дека нема да има повторно затворање на економијата.

Синдикатите се помалку склони кон новите ограничувања и сметаат дека оние кои не сакаат да се вакцинираат мора да ги добијат тестовите бесплатно за да дојдат на работа.

Италија, по Британија, има најмногу смртни случаи од Ковид-19 во Европа, повеќе од 130.000 од почетокот на пандемијата.

Околу 74 проценти од 60 милиони луѓе примиле барем прва доза вакцина, а околу 68 проценти се целосно вакцинирани.

Од октомври во Брисел, Белгија, за влез на јавни места и собири ќе биде потребен доказ за вакцинација, прележан ковид или негативен ПЦР-тест.

Сертификатот што ќе го носи името „Ковид сејф тикет“ ќе се бара во дискотеки, ресторани, затворениот простор во кафулињата, спортските центри, културните објекти и настани со над 50 лица, како и на сите други настани со 50 лица во затворена просторија или 200 лица на отворено. Ќе се бара и во установи за ранливи лица како пензионерски домови и хотели.

Брисел е единствениот град во Белгија засега кој го презема овој чекор.

Во Париз беше претставено монументално уметничко дело околу Триумфалната порта, кое е целосно покриено со сребрено и сино платно.
Оваа инсталација е дело на покојниот уметнички пар Христо и Жан Клод, кои го осмислија проектот во 1961 година, а официјалното отворање е закажано за утре.

Посетите ќе бидат можни во следните три недели, а за време на викендот кружниот тек околу Триумфалната порта ќе се претвори во пешачка зона.

Посетителите на познатата Наполеонска порта, која доминира на авенијата на Елисејските полиња, не само што ќе може да го набљудуваат туку и да го допрат платното како што замислуваа уметниците.

Timelapse footage shows Paris’s iconic Arc de Triomphe wrapped in 270,000 square feet of silver and blue recyclable fabric as part of a posthumous art installation designed by artists Christo and Jeanne-Claude. https://t.co/IlyCfw02eQ pic.twitter.com/B1wCArL5so

— ABC News (@ABC) September 16, 2021

Оние што ќе се искачат на врвот на височина од 50 метри ќе може да застанат на платното од терасата на покривот.

Министерката за култура, Розелин Башело, рече дека ова е невообичаен подарок за парижаните, Франција и пошироко, за сите љубители на уметноста и додаде дека ова дело е постхумно сведоштво за уметничкиот гениј на неговите креатори.

Христо Владимиров Јавачеф, роден во Бугарија, го запозна Жан Клод де Гибон во Париз 1958 година, а подоцна станаа љубовници. Жан Клод почина во 2009 година, а Христо во мај минатата година.