Групи маскирани демонстранти денеска протестираа против францускиот претседател Емануел Макрон и непопуларната пензиска реформа, палејќи корпи за отпадоци и фрлајќи камења врз полицијата во Париз, која одговори со солзавец.

Како што јави Ројтерс, судири меѓу демонстрантите и полицијата имало и на улиците на Рен, Бордо и Тулуз, додека во Нант биле запалени филијали на банки и автомобили.

Претходно денеска, француската влада го отфрли новото барање на синдикатите за суспендирање и преиспитување на нацрт-законот за пензија со кој ќе се зголеми старосната граница за пензионирање за две години од 62 на 64 години, што ги налути синдикалните лидери и работниците, кои рекоа дека владата мора да најде излез од криза.

Владата најави дека е „повеќе од подготвена“ да разговара со синдикатите, но за други теми и повтори дека нема да го менува ставот за пензиската реформа.

Милиони луѓе во Франција демонстрираа и штрајкуваат од средината на јануари за да се спротивстават на законот, а протестите се интензивираа откако владата употреби специјална моќ да го протурка законот во парламентот без гласање на пратениците.

Минатата недела во Париз, членовите на анархистичкиот „Црн блок“ кршеа излози, демолираа автобуски станици и ограбија ресторан на Мекдоналдс, а според Ројтерс, атмосферата на улиците потсетувала на немирите видени на протестите на „Жолтите елеци“ за време на Првиот мандат на Макрон,пренесе Телеграф.рс.

Поддржувачот на независноста Хумза Јусаф денеска беше официјално потврден за премиер на Шкотска во локалниот парламент, со што стана првиот нејзин лидер кој е муслиман и доаѓа од имиграциско потекло.

Хумза Јусаф (37) денеска беше избран за претседател на Шкотската национална партија (СНП) што се залага за независност на партиските избори по ненадејната оставка минатиот месец на Никола Старџен, која ја извршуваше оваа функција осум години.

Хумза Јусаф, чии баба и дедо емигрирале во Глазгов од Пакистан пред 60 години, утре официјално ќе ја преземе функцијата и ќе положи заклетва во Врховниот суд на Шкотска.

„Ова е горд ден за мене и моето семејство, се надевам дека е горд ден и за Шкотска, бидејќи кажува многу за нашите вредности“, рече Јусаф веднаш по гласањето.

Хумза Јусаф ја презема власта во време кога се чини дека борбата за независност е во ќорсокак, оживувајќи ги поделбите во СНП и поттикнувајќи ги апетитите на конзервативците, на власт во Лондон, и на лабуристичката опозиција,пренесе Индекс.хр.

Принцот Хари за време на судењето изјави дека британското кралско семејство криело од него дека телефонот му бил хакиран бидејќи не сакале тој да поднесе обвинение.

Во изјавата за неговата тужба против Дејли Мејл, војводата од Сасекс рече дека бил принуден да се согласи со правилото наметнато од неговото семејство, кое било „никогаш да не се жали и никогаш да не објаснува“ во врска со односите со печатот.

“Во 2018 година станав свесен дека можам да поднесам тужба. Институцијата на кралското семејство криеше од мене информации за хакирањето на мојот телефон, а тоа ми стана јасно дури последниве години”, рекол принцот Хари, пренесува Скај Њуз.

Тој исто така рече дека сите членови на кралското семејство никогаш не разговарале заедно дали некој поднел обвинение.

„Секоја канцеларија во семејството е изолирана. Постои заблуда дека сите ние постојано комуницираме меѓу себе, но тоа не е точно“, рече тој,пренесе Телеграф.рс.