Претседателот на Белорусија, Александар Лукашенко, изјави за „Спутник“ дека е подготвен да го прекине транзитот на енергетските ресурси доколку Полска ги реализира своите закани и ја затвори границата.

„Кога ме угнетуваат Полјаците или другите, мислите дека ќе внимавам на некои договори? Ајде, што зборувате?“, прокоментирaл белорускиот лидер, пренесуваат медиумите.

На прашањето дали е сериозен, Лукашенко потврдно одговорил: „Сериозно, се разбира“.

„Полјаците одлучија да ја затворат границата со Белорусија. В ред. Не одиме често во Европската Унија. Денес најмногу нè интересира Русија, Кина, Истокот. А што ако го затворам? „Што ќе се случи тогаш со сообраќајот кој главно оди во Русија и Кина преку нас?“, праша белорускиот лидер.

„Значи, пред да дадат изјави, треба да го вклучат својот пилешки мозок и да размислат за што зборуваат“, предупреди Лукашенко.

Тој ѝ предложил на полската страна да ја затвори границата и да види која од нив ќе има најголема штета.

Ќе затворите, на чија штета? За себе? Тогаш размислете како ќе купите енергенси од Русија“, рече претседателот на Белорусија.

Претходно, Лукашенко се закани дека ќе го прекине транзитот на гас во Европа преку гасоводот Јамал-Европа, откако Европската Унија ја обвини Белорусија дека создава мигрантска криза на заедничките граници и се закани со санкции против Минск. Полска исто така размислува за затворање на границата со Белорусија.

Третата доза од вакцината против коронавирус на „Фајзер“ го намалува ризикот од инфекција за дополнителни 80 проценти или многу повеќе од заштитата што ја обезбедуваат првите две дози, велат истражувачите од Факултетот за јавно здравје на Универзитетот Јеил во американската сојузна држава Конектикат.

Комисијата на американски здравствени советници со тесно мнозинство го поддржа лекот „молунпиравир“ на компанијата „Мерк“ против коронавирусот, со ова велат тие се отвора патот за регулаторните тела да ја одобрат првата таблета со која Американците ќе можат да се лекуваат дома од коронавирус.

Комисијата за храна и лекови гласаше дека придобивките од земањето на лекот ги надминуваат ризиците, вклучително и потенцијалната штета за фетусот ако лекот се зема за време на бременост.

Препораката беше објавена по неколкучасовна дискусија за умерените придобивки од лекот и можните проблеми поврзани со неговата безбедност.

Експертите кои го поддржаа лекот нагласуваат дека не треба да го земаат бремени жени и ја повикаа ФДА да препорача дополнителни мерки на претпазливост пред да го препише лекот, што вклучува и тестирање за бременост, пренесуваат агенциите.

Комисијата особено ја поддржа употребата на лекот кај возрасни со поблаги форми на Ковид-19 кои се изложени на зголемен ризик, вклучително и постари лица и луѓе кои страдаат од состојби како што се дебелина или астма.

Повеќето експерти веруваат дека лекот не треба да се користи кај вакцинирани пациенти.

Се очекува до крајот на годината Комисијата за храна и лекови да донесе независна одлука.

Таблетата на „Мерк“ веќе е одобрена во Велика Британија.

Папата Франциско утре ќе отпатува во петдневна посета на Кипар и Грција за да ги зајакне односите со православната црква и да предупреди на страдањата на мигрантите.

Неколку недели пред неговиот 85-ти роденден и неколку месеци по операцијата на дебелото црево во јули, и покрај пандемијата на коронавирус, папата е повторно на пат да ги промовира двата приоритета од неговиот мандат.

Првата станица е Кипар од 2 до 4 декември, а потоа ќе помине два дена во Грција. И двете земји се претежно православни, но таму живеат и десетици илјади католици. Папата ќе одржи десетина говори на патувањето и ќе има серија средби со политичките и верските лидери, меѓу кои и Јероним Втори, поглаварот на Грчката православна црква.

Во крајно симболичен чин, папата Франциско на 5 декември повторно ќе го посети островот Лезбос, важна точка за влез на мигрантите во Европа, каде што во април 2016 година ја изговори познатата реченица: „Сите ние сме мигранти“.

Папата треба уште еднаш да го сврти вниманието на светот кон миграциската криза, која ја смета за најтешка хуманитарна катастрофа од Втората светска војна.

Тој планира да пренесе хуманитарна, а не политичка порака на Лезбос, рече Јозеф Принтезис, надбискуп на епархијата што ги опфаќа грчките острови во Егејското Море.

„Тој сака да ја подигне свеста на европските граѓани за бегалците, бидејќи Медитеранот е полн со удавени луѓе“, додаде Принтезис.

Посетата на Атина ќе се фокусира и на дијалогот со православните христијани.

„Папата сака да ги зајакне односите со православната заедница“, рече ватиканскиот експерт Марко Полити, додавајќи дека Франциско изразува братство кон православните верници.

Првата станица на патувањето на папата е Кипар каде што папата треба да повика на единство и мир, изјави извор од Ватикан.