Европа
Европскиот парламент изгласа воведување на дигитални сертификати од 1 јули

Европскиот парламент денес го поддржа воведувањето на дигитален сертификат на ЕУ за да се олесни патувањето во ЕУ и да се придонесе за закрепнување на економијата. Сертификатите ќе се применуваат од 1 јули 2021 година и ќе важат 12 месеци, се вели во соопштението на ЕП.
Документот ќе потврди дека лицето е вакцинирано против Ковид-19, дека неодамна имал негативен резултат од тест или се опоравил од инфекцијата. Во пракса, ова ќе бидат три различни сертификати, велат упатените.
Сертификатите ќе бидат издадени бесплатно од властите на земјите-членки, ќе бидат достапни во дигитален или хартиен формат и ќе имаат QR-код.
Заедничката рамка на ЕУ ќе ги направи сертификатите интероперабилни и проверливи низ Европската Унија, а ќе се спречи измама и фалсификување.
Сертификатот нема да биде предуслов за слободно движење и нема да се смета за патна исправа.
За време на меѓуинституционалните преговори, европратениците обезбедија договор дека земјите од ЕУ нема да можат да воведат дополнителни ограничувања за патување на имателите на сертификати – како што се карантин, самоизолација или тестирање – „освен во услови кога тоа е неопходно и пропорционално за да се заштити јавното здравје“.
Земјите од ЕУ се охрабруваат да обезбедат тестирањето да биде широко достапно. На барање на парламентот, Комисијата вети дека ќе мобилизира 100 милиони евра во рамките на Инструментот за поддршка на итни случаи, така што земјите-членки можат да купат тестови за издавање на ЕУ дигитални ковид сертификати.
Сите земји на ЕУ мора да прифатат сертификати за вакцинација издадени во други земји-членки за вакцини одобрени од Европската агенција за лекови (ЕМА). Земјите-членки треба да одлучат дали ќе прифатат сертификати за вакцини одобрени во согласност со националните постапки за одобрување или за вакцините наведени од Светската здравствена организација за итна употреба.
Сите лични податоци ќе бидат обработени во согласност со Општата регулатива за заштита на податоците.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Кремљ: Помошта од САД за Киев директен пат кон зголемена тензија и ескалација

Портпаролот на Кремљ, Дмитриј Песков, изјави дека нема планови за разговори меѓу рускиот претседател, Владимир Путин, и американскиот претседател, Џозеф Бајден.
„Засега нема планови за разговори меѓу Путин и Бајден. Нашата главна цел е да ја продолжиме специјалната воена операција, односно да ги исполниме нашите задачи поставени од шефот на државата“, изјави Песков за новинарите.
Тој го коментира и новиот пакет-помош од САД за Киев, кој го карактеризира како директен пат кон зголемена тензија и ескалација, но додаде дека тоа нема да го промени текот на настаните.
„Да, тоа е директен пат кон зголемување на тензијата, зголемување на степенот на ескалација, го гледаме тоа, бара дополнителни напори од нас. Сепак, уште еднаш, тоа нема да го промени текот на настаните, специјалната воена операција ќе продолжи“, нагласи Песков.
Претходно, агенцијата „Ројтерс“, повикувајќи се на двајца неименувани американски функционери, објави дека САД подготвуваат пакет воена помош за Украина во вредност од 2,2 милијарди долари, а првпат може да вклучи и ракети со двојно поголем дострел од досегашните испорачани.
Европа
Прво интервју на новиот чешки претседател: Украина треба да влезе во НАТО

Новоизбраниот чешки претседател Петр Павел денеска изјави дека на Украина треба да ѝ се дозволи влез во НАТО „штом војната ќе заврши“.
Павел, пензиониран генерал на НАТО, изјави за Би-би-си дека Украина ќе биде „морално и практично подготвена“ да ѝ се приклучи на алијансата кога ќе заврши конфликтот.
Во своето прво интервју како претседател за странски медиуми, Павел цврсто ја бранеше западната воена поддршка за Киев велејќи дека не треба да има „речиси никакви ограничувања“ за пратките.
Тој додаде дека за него испраќањето западни борбени авиони „Ф-16“ не е табу, но дека не е сигурен оти тие би можеле да бидат испорачани во време што би му одговарало на Киев.
Американскиот претседател Џозеф Бајден ја отфрли можноста за испраќање „Ф-16“ оваа недела иако францускиот претседател Емануел Макрон рече дека ништо не е исклучено.
„Се гордеам што мојата земја беше една од првите што обезбеди значителна воена помош за Украина“, изјави Павел за Би-би-си.
Тој го поздрави испраќањето тенкови од Западот во Украина, но додаде дека верува оти „сè уште не е доволно“ да се спротивстави на Русија.
Европа
Русија осуди новинар поради лажни вести за армијата и војната

Истакнат руски новинар Александар Невзоров е осуден во отсуство на осум години затвор кога судот во Москва го прогласи за виновен за ширење лажни вести за руската војска.
Инспекторите отворија случај против Невзоров минатата година поради објави на социјалните мрежи, во кои тој ги обвини руските вооружени сили за намерно гранатирање породилиште во украинскиот град Мариупол за што Москва рече дека е лажна вест.
Судот во соопштение за медиумите наведе дека тој ќе ја издржи казната доколку некогаш се врати во Русија, а четири години му е забрането да управува со интернет-содржини.
Невзоров, кој води канал на „Јутјуб“ со речиси 2 милиона претплатници, истрагата против него ја нарече смешна и минатиот март ја напушти земјата со сопругата.
Украина му даде државјанство во јуни откога тој јавно ја осуди руската инвазија нарекувајќи ја војната злосторство, а Украина нејзина жртва.
Осум дена по инвазијата на Украина во февруари минатата година, Русија донесе закон со кој се определуваат затворски казни до 15 години за осудените за намерно ширење лажни вести за руската војска.