Европа
Истрага за нападот во Берлин покажа големи пропусти, ослободен приведениот Тунижанец
Системот за автоматско кочење го запрел камионот и избегнати се повеќе жртви, соопшти германското државно обвинителство во четвртокот на прес-конференција за истрагата за нападот на божикниот базар во Берлин вечерта на 19-ти декември која покажала големи безбедносни пропусти, но засега не открила ниеден од соучесниците ниту налогодавачи.
Во понеделникот 19-ти декември околу 20 часот 24-годишниот Тунижанец Анис Амри, уби 11 лица со украден камион во центарот на Берлин, а непосредно пред масакрот со огнено оружје го убил полскиот возач на камионот.
Смртоносниот поход на камионот е запрен по 70 до 80 метри благодарејќи на системот против судири кој го покренал автоматското кочење на камионот и со тоа „се избегнати уште потешки последици“, соопшти германското државно обвинителство. Со тоа ги потврди претходните информации кои ги пренесоа одредени германски медиуми.
Со истрагата е утврдено дека лицето коешто беше уапсено во средата, 40-годишен Тунижанец, не можел да биде лице за контакт со Анис Амри, соопшти портпаролката на сојузното обвинителство надлежно за тероризам, Фрауке Кохлер, и објави дека тој е ослободен од притвор.
Ова лице е уапсено бидејќи се сметало дека осомничениот како извршител на атентатот му испратило фотографија и порака, Според дневниот весник Suddeutsche Zeitung, неколку минути пред да се залета во толпата на божикниот базар, Амри на неидентификувано лице по испратило селфи и порака „Брату мој моли се, сé е добро, Господ тоа го сака, во кола сум, моли се за мене“.
Тие информации ја поткрепуваат тезата за барем пасивно соучесништво и на неа иследниците ги насочуваат своите напори подолго од една седмица, но засега без резултат.
„Со непроменет интензитет се продолжуваат истрагите за можното постоење на други учесници, налогодавачи или лица запознаени со плановите за атентатот“, изјави портпаролката.
Десет дена по атентатот и натаму не е јасно како Амри се провлекол по повеќемесечното набљудување и пред носот им избега на германската и на европската полиција.
Според Suddeutsche Zeitung, германскиот центар за борба против тероризмот GTAZ во текот на 2016 година повеќепати го разгледувал неговиот случај, но проценил дека постојат мали веројатности да изврши терористички напад. Во последниот извештај пет дена пред нападот, антитерористичкиот центар навел дека Амри бил запознаен со функционирањето на полицијата.
Германските власти знаеле дека младиот Тунижанец одржува блиски врски со германските џихадистички кругови и полицијата во Дортмунд го проценила како симпатизер на Исламската држава. Сојузното обвинителство во четвртокот ја потврди веродостојноста на видео снимката во која Исламската држава ја презема одговорноста за најкрвавиот исламистички напад извршен на германска почва.
Иследниците, исто така, долго време знаеле дека Амри на интернет проучувал начини за производство на бомби и во еден онлајн форум ги понудил своите услуги на бомбаш самоубиец, веројатно на еден член на Исламската држава, пишува уште Suddeutsche Zeitung.
Стручњаците од GTAZ утврдиле дека Тунижанецот менувал осум идентитети и оти слободно и постојано се движел по германската територија, како и дека одел во едно исламско училиште во Дортмунд за кое се сомневаат дека подготвува лица кои сакаат да ѝ се придружат на Исламската држава.
Веднаш по нападот германските власти признаа дека Тунижанецот, кој пристигнал од Италија како барател на азил, ѝ бил познат на полицијата и со месеци бил на списокот на потенцијално опасни лица. Од февруари до септември годинава во Берлин бил ставен под надзор на полицијата, бидејќи се сомневале дека подготвува атентат, по што поради недостиг од докази, неговиот предмет бил затворен.
Меѓу дилемите во истрагата се и 48-те часа по атентатот, а иследниците ја губат трагата на Амри во понеделникот навечер во Берлина и ја пронаоѓаат во средата вечерта во Холандија. Тој потоа со автобус 15 часа патува до француски Лион и потоа со воз до Шамбери и Милано, каде во текот на рутинска полициска контрола рано утрото на 23-ти декември пукал кон полицаецот по што е застрелан./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
(Видео) Путин му одговараше на новинар на Би-би-си, го нападна Западот, а на едно прашање почна да се смее
Рускиот претседател Владимир Путин не ги негира американските тврдења дека Северна Кореја испратила војници во Русија, но рече дека Москва треба да одлучи за спроведувањето на одбранбениот договор со Пјонгјанг обвинувајќи го Западот за ескалација на војната во Украина.
Еден ден претходно, САД изјавија дека имаат докази за пристигнувањето речиси 3.000 севернокорејски војници во Русија, кои би можеле да бидат распоредени во Украина, што западните земји би го сметале за сериозна ескалација на конфликтот.
Запрашан од новинарите за сателитските снимки на кои се гледа движењето на севернокорејските војници, Путин коментира: „Фотографиите се сериозна работа“.
„Ако има фотографии, тие кажуваат нешто“, додаде Путин.
Потоа тој посочи дека офицери и инструктори на НАТО се директно вклучени во конфликтот во Украина тврдејќи дека токму Западот придонесува за ескалација на украинската криза.
„Знаеме кој е присутен таму, од кои земји од ЕУ и НАТО и како тие ја работат оваа работа“, рече Путин. Во исто време, тој тврди дека руската армија напредува по целата линија на фронтот и дека значителен број украински војници биле фатени во стапица во Курск.
„Подготвени сме да ја разгледаме секоја опција за мировен договор, но само врз основа на реалната ситуација на теренот. Не сум подготвен за ништо друго“, рече Путин.
На прес-конференцијата еден од клучните моменти беше кога портпаролот на Кремљ, Дмитриј Песков, му даде збор на новинарот на Би-би-си, Стив Розенберг, кој директно го предизвика Путин со прашања.
„Редок гостин деновиве“, рече Песков претставувајќи го Розенберг.
„Ја прочитав декларацијата на БРИКС; таа зборува за глобална стабилност, регионална стабилност и безбедност и фер свет. Тоа е мотото и на овој самит“, рече Розенберг. „Но, како ова се совпаѓа со вашите постапки во изминатите две и пол години? Каде се правдата, стабилноста и безбедноста? Вклучувајќи ја и безбедноста на Русија. Пред почетокот на специјалната воена операција руските територии не беа нападнати со беспилотни летала, руските градови не беа бомбардирани, а странските сили не ја окупираа територијата на Русија“, го праша Путин новинарот на Би-би-си.
„Првин ќе зборувам за безбедноста на Русија бидејќи тоа е моја одговорност. Вистина е, ова не се случило порано. Но поради ситуацијата со Западот… Нашите постојани обиди да ги поправиме односите со западните земји не доведоа до ништо. Да не постапевме, тоа ќе нѐ принудеше да се повлечеме и да го предадеме нашиот народ. Тоа би довело до голема загуба на суверенитетот на нашата земја. Ние би престанале да постоиме. Русија престанува да постои ако го загуби суверенитетот, тоа е најважната точка. На Русија ѝ требаат суверенитет и независност во финансиите, војската и така натаму. И ние треба да размислуваме за нашиот развој во иднина. Мора да работиме со партнери, како оние во БРИКС, кои ја почитуваат независноста на Русија, ги почитуваат нашите традиции и вредности“, рече Путин.
Потоа го спомена коронавирусот, при што, како што тврди, САД и ЕУ предизвикале глобална инфлација.
„Во однос на правдата, што е фер? Погледнете ја ситуацијата со коронавирусот. За време на пандемијата САД издадоа пари во износ од речиси 6 трилиони долари, а еврозоната издаде 3 трилиони долари и сите овие средства беа фрлени во глобалниот пазар со цел да се купат разни работи“, рече Путин.
„Инфлацијата почна на глобално ниво. Што направија водечките светски економии? Тие ја искористија својата ексклузивна позиција во глобалните финансии – за доларот и за еврото. Тие печатеа пари и буквално ги цицаа најважните стоки од пазарот како правосмукалка. Дали е тоа фер? Ние веруваме дека не е. И ние сакаме да ја промениме оваа ситуација. Токму тоа го правиме во БРИКС“, додаде тој.
Потоа ги нападна НАТО и политиката на западните земји во Украина.
„Во однос на безбедноста, да ве прашам, дали е фер што со години им се жалевме на нашите западни партнери да не го прошируваат НАТО на исток? Дали е фер што нѐ лажеа ветувајќи дека нема да се случи такво проширување? Дали е фер што влегоа во нашиот двор и почнаа да градат воени бази?
„Дали е фер да се изврши државен удар во Украина во 2014 година игнорирајќи ги сите принципи на меѓународното право и Повелбата на ОН? Тие го финансираа државниот удар во Украина туркајќи ја ситуацијата во запалива фаза. Дали е фер во однос на глобалната безбедност? Им рековме, не правете го тоа, ја загрозувате нашата безбедност. Тие го направија во секој случај. Дали е тоа фер? Поентата е дека нема правда. Сакаме да го промениме тоа. И ние ќе се промениме“, одговори Путин.
Репортерот на Би-би-си му постави уште едно прашање во кое тој го праша Путин за разузнавачките извештаи од британската МИ 5, а во кои се тврди дека руската разузнавачка агенција спроведува операција, чија цел е создавање „траен хаос на улиците на Британија и Европа“.
Путин се насмеа на овие тврдења и рече: „Ви благодарам што ме потсетивте на тоа. Тоа е чиста глупост, целосна глупост, тоа што го кажува МИ 5. Тоа што се случува на улиците во Европа е резултат на домашната политика. Ние многу добро знаеме за рецесијата во европските земји и за ниските стапки на раст. Што имаме ние со тоа? Ова е внатрешната политика на европските земји. Ја отфрлаат руската енергија, што имаме ние со тоа? Подготвени сме за снабдување. Се работи само за притискање копче и сѐ би се случило. Нема да именувам имиња, но еден од моите колеги направи дел од германската економија целосно зависна од САД. Што имаме ние со зголемените трошоци за живот во ЕУ“, рече Путин.
Тој додаде дека ова е само обид да се префрлат проблемите на Европската Унија во Русија и оти, всушност, станува збор за погрешни економски одлуки на Европската Унија. Тој исто така спомна дека некои политички лидери во ЕУ ја злоупотребуваат еколошката агенда и му наметнуваат на светот, на пример, на африканските земји, откажување од фосилните горива и дека „ги понижуваат, а потоа ги оптоваруваат со заеми“.
„Тоа е само нова форма на неоколонијализам“, рече Путин.
Европа
(Видео) Путин до Додик: Мило ми е што те гледам повторно, ние сме братски народи
Претседателот на Република Српска, Милорад Додик, синоќа, во Казан, се сретна со рускиот претседател, Владимир Путин.
Путин му посака добредојде на Додик во градот Казан и истакна дека се надева оти присуството на самитот на БРИКС е корисно, пренесува „Кликс.ба“.
„Се надевам дека имавте добри и корисни контакти за време на овој настан“, рече Путин.
Додик се заблагодари за пречекот и можноста да види како изгледа средба од ваков формат и изрази желба Република Српска да биде вклучена во некои од формите на БРИКС.
Увијек је посебно задовољство сусрести се с великим свјетским лидером и искреним пријатељем Српске, предсједником Руске Федерације Владимиром Путином.
Односи Републике Српске и Русије су на никад бољем нивоу, чврсто утемељени нашим добрим и пријатељским везама.
На састанку је… pic.twitter.com/2j3t86mgBe
— Милорад Додик (@MiloradDodik) October 24, 2024
„Со нетрпение го очекувам вашиот напредок на економски план, тоа покажува дека воведените санкции не ги даваат посакуваните ефекти“, рече Додик и го информира претседателот Путин за американските санкции што му беа воведени нему и на официјалните претставници на РС.
Наводно, Додик му рекол на Путин дека пред два дена одбил воведување визи за руските граѓани и го информирал за приказните за наводните логори во РС.
Тој рече дека ЕУ го условува натамошниот напредок на БиХ на европскиот пат со барања, како што е воведување визи за Русите.
Рускиот претседател Владимир Путин изјави дека „важно е соработката со Република Српска да биде од практична природа и да се развива во духот на заемно почитување, како што треба да биде меѓу братските народи“, пренесува „РИА новости“.
Тој додаде дека политичките контакти меѓу Русија и Република Српска се прошируваат.
Во разговорот со претседателот на РС, Путин истакна дека е запознаен со тешкотиите со кои се соочува Република Српска и низ какви искушенија треба да помине.
„Сигурен сум дека со вашиот карактер и фокусираноста на граѓаните кон заштитата на националните интереси ќе се надминат сите тешкотии. Мило ми е што повторно ве гледам“, рече Путин.
Тој изрази надеж дека учеството во БРИКС е корисно и дека Додик има корисни деловни контакти.
Путин додаде дека времињата се менуваат и ситуацијата во светот се менува.
Европа
Украина: Севернокорејските војници пристигнаа во Курск, се приклучија на војната
Главната управа за разузнавање на украинското Министерство за одбрана (ГУР) објави дека севернокорејски воени единици се распоредени во руската област Курск, односно во зоната на конфликт меѓу украинските и руските војници, пренесува „Анадолија“.
ГУР објави дека севернокорејските трупи, обучени во Русија, се вклучиле во војната против Украина.
Според украинските разузнавачи, околу 12.000 војници од Северна Кореја се испратени во Русија, меѓу кои 500 офицери и тројца генерали. Во соопштението се наведува дека војниците се опремени со муниција, постелнина, зимска облека, обувки и средства за хигиена.