Најмалку 54 лица се повредени во железничка несреќа во Салцбург, соопштија претставници на австриската железница. Портпаролот на железницата ОББ изјави дека 54 лица биле пренесени во болница и дека сите се со лесни повреди.

Несреќата се случила додека возот бил на станицата во текот на маневр за спојување вагони од два воза од линиите Венеција-Салцбург и Цирих-Салцбург.

Во вагоните во моментот на судирот имало околу 240 патници. Возот од Салцбург требало да продолжи за Виена.

Фондацијата „Отворено општество“ на американскиот милијардер Џорџ Сорос ќе ја затвори канцеларијата во Будимпешта и ќе ги пренесе своите операции во Берлин, објавија унгарските медиуми, кои се повикуваат на информација од австриски извори.

Унгарскиот премиер Виктор Орбан го обвини Сорос, кој е роден во Унгарија, за многу зла и се залага за законот „Стоп, Сорос“, со кој треба да се забрани работата на некои невладини организации.

Унгарските медиуми пренесуваат дека канцеларијата на Фондацијата „Отворено општество“ ќе биде затворена на 31 август и ќе се пресели најпрвин во Виена, а потоа во Берлин.

Новинарите досега не успеале да стапат во контакт со канцелариите на Фондацијата во Будимпешта или во Њујорк.

Јанош Халас, портпаролот на партијата Фидес, која убедливо победи на неодамнешните парламентарни избори во Унгарија, најави дека еден од првите закони што би можел да биде усвоен е оној што на владата ќе ѝ овозможи да забрани невладини организации што поддржуваат миграција и претставуваат ризик за националната безбедност.

Орбан во февруари го достави ваквиот предлог-закон во парламентот. Законот исто така ќе овозможи донациите на невладините организации, кои го поддржуваат доаѓањето мигранти во Унгарија, да бидат оданочени со 25 отсто.

Баскиската илегална организација ЕТА јавно ги призна злоделата предизвикани за време на вооружената борба за независност на Баскија и побара прошка од жртвите, стои во соопштението објавено во баскискиот дневен весник „Гара“.

Сепак, членовите на ЕТА тврдат дека не се единствените одговорни за страдањата во шпанска Баскија.

„Страдање постоело и пред основањето на ЕТА и продолжи кога ЕТА ги прекина вооружените акции“, се вели во текстот објавен од страна на „Гара“.

„Предизвикавме многу болка и непоправлива штета. Сакаме да ја изразиме нашата почит кон мртвите и повредените во акциите на ЕТА. Искрено и длабоко жалиме“, се вели во соопштението издадено во пресрет на најавениот распад на групата која уби повеќе од 800 луѓе во последните неколку децении борба против шпанската држава.

ЕТА посебно бара прошка од недолжните цивили.

„Принудени на секаков тип вооружена борба, знаеме дека нашите постапки им наштетија на граѓаните што на никаков начин не се вмешани во каузата што ја застапувавме. Предизвикавме голема штета што не може да се поправи. Бараме прошка од тие луѓе и нивните семејства“.

Бескиската сепаратистичка организација, основана под влијание на Франциско Франко, во 2011 година се откажа од вооружена борба. ЕТА официјално треба да објави распаѓање на 5 или 6 мај во француската Баскија, пренесоа неколку извори.