Шпанија објави рекордни 44.357 нови инфекции со коронавирус за еден ден.Во претходните 24 часа, 404 лица починаа од коронавирус во Шпанија, со што бројот на смртни случаи од инфекцијата достигна 55.000.

Просечниот број на заразени во последните 14 дена денес се зголеми на 796 од вчерашните 736 на 100.000 жители.Во Шпанија, 36 проценти од креветите се моментално зафатени во единиците за интензивна нега, а во регионите Ла Риоха и Валенсија, повеќе од 50 проценти.Коронавирусната инфекција е потврдена кај 2,5 милиони Шпанци, со што е на седмата позиција во светот.

Земјите членки на ЕУ се согласија за зајакнување на употребата на брзи антиген-тестови и за меѓусебно признавање на резултатите од тестот на Ковид-19, објави Советот на ЕУ.

Советот наведува дека употребата на брзи тестови и меѓусебно препознавање на резултатите од тестовите за Ковид-19 низ ЕУ се од суштинско значење за ублажување на ширењето на вирусот, како и за придонес кон непречено функционирање на внатрешниот пазар и олеснување на прекуграничното движење и лекување.

„Клучните компоненти на оваа препорака вклучуваат валидација и меѓусебно признавање на брзи антиген-тестови и RT-PCR тестови меѓу земјите членки, размена на стандардизиран сет на податоци, изработка на заеднички список на брзи тестови за Ковид-19 и одредување приоритет за употреба на таквите тестови, се наведува во соопштението на Советот на ЕУ.

Препораката исто така вклучува одредби кои се однесуваат на предизвиците на „еволутивната пандемија“, односно дека заедничката листа на соодветни брзи тестови за Ковид-19 треба да биде доволно флексибилна за да се додадат или отстранат оние тестови врз чија ефикасност влијаат мутациите на вирусот.

Европската Унија со посебен механизам ќе обезбеди вакцини за коронавирус за Западен Балкан „што е можно поскоро“, рече претседателката на Европската комисија, Урсула фон дер Лајен. Таа објасни дека се покажало оти постапката за доставување вакцини на сиромашните и земјите надвор од Унијата преку меѓународниот механизам Ковакс е комплицирана и затоа е одлучено со посебен механизам на ЕУ да се обезбедат вакцини на Западен Балкан, кои ќе ги дадат членките на ЕУ.

Лидерите на ЕУ исто така одлучија дека брзото ширење на опасната нова варијанта на вирусот „силно ги обесхрабрува патувањата кои не се итни“ во рамките на Унијата, но исто така го зачувува единствениот пазар на ЕУ и „Шенген зоната“.Урсула фон дер Лајен и претседателот на Европскиот совет, Шарл Мишел, посочија дека расте загриженоста во ЕУ за ширење на нова варијанта на коронавирусот и истакнаа дека ќе бидат преземени сите мерки за забрзување на масовната вакцинација на населението во ЕУ. Тие истакнаа дека целта е да се вакцинираат најмалку 70% од населението во ЕУ до летото.