Украина постигна значителен напредок на руска територија во последните денови, а според извештаите на Институтот за проучување на војната (ISW), украинските сили го зазедоа селото Демидовка во руската погранична област Белгород. Теренските карти ги потврдуваат овие територијални придобивки.

Извештаите за напредокот доаѓаат веднаш откако украинскиот ракетен систем со долг дострел ХИМАРС уништи четири руски хеликоптери во регионот на Белгород.

Овие наводни успеси доаѓаат додека претседателот Доналд Трамп иницира преговори за ставање крај на војната. Американскиот Стејт департмент во понеделникот објави дека Русија и Украина се блиску до целосен прекин на огнот. Киев најверојатно се обидува да ја зајакне својата преговарачка позиција додека разговорите се во тек.

Во понеделникот, руските воени блогери на Телеграм објавија дека украинските сили влегле во селото Демидовка.

„Населбата сега е под контрола на вооружените сили на Украина“, напиша воениот блогер Владимир Романов, познат како Романов Лајт на Телеграм. Тој тврдеше дека руските сили ги напуштиле своите позиции, дозволувајќи им на Украинците да ја заземат Демидовка. Овие тврдења сè уште не се независно потврдени.

Каналот на Телеграм „Рибар“, поврзан со руското Министерство за одбрана, сподели порака во која се наведува дека има различни информации за тоа кој го контролира селото, но дека украинските сили дефинитивно се присутни.

Друг воен блогер, РВ Вонекор, тврдеше дека Украина користи беспилотни летала за напад и артилерија за уништување куќи веќе една недела, што го прави речиси невозможно Русија да се одржи на својата позиција.

Ниту руските, ниту украинските власти се уште официјално не ги коментирале овие наводни територијални придобивки.

Институтот за проучување на војната (ISW), американски тинк-тенк, оцени дека украинските сили напреднале во Демидовка, повикувајќи се на геолокацирани снимки.

„Руските воени блогери признаа дека украинските сили влегле во јужниот дел на Демидовка, но негираат дека населбата целосно потпаднала под украинска контрола“, објави Институтот.

Од таму, исто така, наведуваат дека украинските сили започнале ограничени напади во северозападниот дел на Белгородската област на 18 март и оствариле мали територијални придобивки во правец на Графовка (југоисточно од Демидовка) и Прилесје (јужно од Демидовка) во изминатите шест дена.

Украински беспилотни летала се соборени над Црното Море, тврди руското Министерство за одбрана – само неколку часа откако беше договорен делумен прекин на огнот.

Според државната новинска агенција ТАСС, во текот на ноќта на руска територија биле уништени вкупно девет беспилотни летала – пет во регионот на Белгород, два во областа Курск и уште два над Црното Море. Украина се уште не ги коментира овие тврдења.

Украина и Русија очигледно не се согласуваат за точното време на прекинот на огнот

Руското Министерство за одбрана не прецизираше дали беспилотните летала биле насочени кон цели во Црното Море или едноставно летале над областа.

Вчера Украина и Русија се договорија за привремен прекин на огнот што го покрива Црното Море и запирање на нападите врз енергетската инфраструктура. Договорот беше постигнат откако американски официјални претставници се сретнаа одделно со руската и украинската делегација во Ријад, Саудиска Арабија.

Француската филмска ѕвезда Жерар Депардје во вторникот пред судот призна дека ја фатил за бутот жената која го обвини за сексуален напад, но нагласи дека тоа не е напад, додавајќи дека сите груби коментари и ги дал затоа што бил нерасположен.

Икона на француската кинематографија, Депардје (76) се соочува со се поголем број на обвинувања за сексуално вознемирување во последните години. Тој ги отфрли сите обвиненија, а ова е прв случај за кој му се суди.

„Ја фатив за бутовите“, рече Депардје, признавајќи за прв пат физички контакт со филмската сценографка Амели К. и рече дека не и кажал на полицијата кога го испрашале.

„Ја фатив за бутовите за да не паднам бидејќи бев навистина вознемирен поради неа, поради жештината, беше петок при крајот на снимањето и бев навистина уморен“, вели актерот.

Збунет и често отстапувајќи од темата, Депардје пред судот објасни дека и бил лут на Амели К. поради нејзината работа. Тој рече дека таа лошо ја завршила работата, поради што била шокирана. „Не гледам зошто би пипкал жена“, изјави тој пред судот, додавајќи дека во тоа време бил толку дебел што некои од работите за кои е обвинет би биле невозможни.

Непријатните коментари што тој ги даде во тоа време не беа насочени лично кон неа, рече тој, туку се однесуваа на нејзината работа. Доколку биде прогласен за виновен, Депардје може да се соочи со казна затвор до пет години и парична казна од 75.000 евра.

Судењето, кое се очекува да трае најмалку три дена, првично требаше да се одржи минатиот октомври, но беше одложено поради лошата здравствена состојба на Депардје. Започна во понеделникот.