Европа
(Видео) Големо невреме во Европа, најмалку пет лица загинаа, неколкумина се повредени

Најмалку пет лица го загубија животот во невремето што зафати неколку европски земји, а неколку лица се повредени.
Две лица загинаа во централната германска сојузна покраина Саксонија-Анхалт кога дрвја паднаа врз нивните автомобили, објавија властите, пренесуваат локалните медиуми.
Во Хамбург, поради невремето, три лица добиле полесни повреди на траект, кој бил погоден од бран и искршил стакло.
MUST SEE | Waves from a storm in Hamburg, Germany were so powerful they bust through a ferry window.
While some passengers near the window were knocked backward by the force of the wave, nobody was seriously injured. Officials are now investigating why the window gave way. pic.twitter.com/icGKCbfi2L
— Zach Covey (@ZachCoveyTV) February 17, 2022
Германската метеоролошка служба синоќа издаде повеќе предупредувања за пристигнувањето на невремето и најави дека опасните услови би можеле да траат неколку дена, сѐ до сабота.
Во Полска ветровите достигнаа брзина и до 125 километри на час и сериозно оштетија околу 500 куќи, уништија покриви, дрвја и предизвикаа прекини на електричната енергија кај повеќе од 324.000 домаќинства во земјата. Двајца работници загинаа, а двајца се повредени кога кран се превртел на градилиште во Краков. Уште еден маж загина во западна Полска кога дрво паднало врз неговиот автомобил, јавија локалните медиуми.
Погодена беше и Чешката Република, каде што повеќе од 300.000 домаќинства останаа без струја, а сообраќајот беше сериозно нарушен бидејќи соборените дрвја ги блокираа патиштата и железничките пруги.
Три деца се повредени во сообраќајна несреќа на југозападот од земјата и се хоспитализирани.
Невремето оштети или уништи многу покриви во земјата.
Во Холандија, погодена од ветрови со брзина од 100 километри на час, еден полицаец е повреден при пад на покрив на зграда во Дуивен во близина на Арнем, јави јавниот сервис.
Пожарникарите извлекле двајца повредени од автомобил на кој паднало дрво во градот Маслуис, на југот на земјата.
На аеродромот „Шипхол“ во Амстердам холандската авиокомпанија објави дека ќе откаже речиси 170 лета поради невремето в петок. Откажување летови и прекин на сообраќајот има и во другите европски земји.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
(Фото+видео) Опасна бура во Словенија: паѓаше град со големина на јајце, издадено портокалово предупредување

Словенија е погодена од силни бури придружени со силни налети на ветер, поројни дождови и град.
Сообраќајот во земјата е забавен, а Агенцијата за заштита на животната средина издаде портокалово предупредување за целата територија.
Од агенцијата посочуваат дека поради дождот може да дојде до задржување на вода и зголемување на реките.
На објавите на социјалните мрежи се гледа дека паѓал град со големина на јајце.
Според објавите и коментарите, најлошото било околу Шемпетер во долината Савиња.
Како што јавува ТВ Словенија, во текот на вечерта бурата постепено ќе ослабне , најдоцна на истокот од земјата.
Бура пристигнува и во Хрватска
Силна бурна ќелија, која пристигна преку брегот од Италија, се движи кон внатрешноста на Хрватска, придружена со врнежи од дожд, силни налети на ветер и локален град.
Водна пијавица е снимена над морето во близина на Умаг. Се очекува активноста на бурата дополнително да се интензивира во наредните часови.
Управата за заштита на животната средина издаде портокалова тревога за регионите Риека, Карловац и Загреб поради локално можни грмотевици со привремено силни до бурони ветрови, а можна е и појава на град.
Европа
Колона долга околу 700 километри забележана на автопат во Франција

Колона долга речиси 700 километри е забележана денеска на автопат во Франција, додека вкупната должина на сите колони на патиштата во земјата изнесуваше 1.051,6 километри во време на зголемен сообраќаен интензитет поради летните одмори и смената на туристи, што колоквијално се нарекува „Црна сабота“.
Како што извести BFM TV, сообраќајот на патиштата во Франција дополнително бил забавен поради две сообраќајни несреќи на автопатот кон Медитеранот и Атлантскиот Океан.
Според податоците на Bizon Futé, француската агенција за следење на состојбата на патиштата, до 7 часот утрово колоните биле подолги од 200 километри, а до 10 часот веќе надминале 570 километри.
Како што беше соопштено, гужвите се во согласност со прогнозите на агенцијата, која предупреди на „исклучително тешки сообраќајни услови“ за оваа сабота, а врвот на метежот се очекува околу пладне.
Сообраќајот во правец кон Алпите исто така е интензивен и загушен, со задржувања од час и 45 минути во тунелот Мон Блан во правец кон Италија
Европа
Финска, Норвешка и Шведска под жештина невидена од 1961 година

Земјите од Северна Европа, познати по својата студена клима, се соочуваат со интензивни топлотни бранови, со температури над 30 степени Целзиусови во подолг временски период.
Во норвешкиот дел од Арктичкиот круг, метеоролошките станици регистрирале температури над 30 степени Целзиусови дури 13 дена во јули, додека Финска имала три последователни недели со температури од 30 степени, пишува денес британскиот „Гардијан“.
Според научниците, тоа е најдолгиот период според историските податоци од 1961 година, а трае 50 проценти подолго од претходниот рекорд.
„Топлотниот бран е сè уште во полн ек, со максимални температури денес околу 32-33 степени. Дури и арктичките региони забележаа три недели со температури над 25 степени и може да ги соборат своите августовски температурни рекорди утре“, изјави Мика Рантанен, климатолог во Финскиот метеоролошки институт, во објава на социјалните мрежи.
Норвешкиот метеоролошки институт соопшти дека температури над 30 степени се регистрирани 12 дена во јули во најмалку една станица во трите најсеверни покраини на Норвешка.
Во Шведска, метеоролозите, исто така, регистрираа продолжени топлотни бранови во неколку северни градови, при што метеоролошката станица во Хапаранда регистрираше температури од 25 степени или повеќе 14 дена по ред.
Овие топлотни бранови, кои ја погодија северна Европа кон средината на јули, беа предизвикани од топлите води покрај северниот брег на Норвешка, кои ги покачија температурите во нордиските земји за осум до 10 степени над сезонските норми.
Поради интензивен топлотен бран, лизгалиште на мраз во северна Финска ги отвори вратите за луѓе кои бараат засолниште од жештината, откако локалните болници беа преполни, а сточарите предупредија дека нивните ирваси се на работ на смртта од жештината.