Европа
Во Франција на социјалните мрежи се продаваат лажни пропусници за Ковид-19

Антиваксерите во Франција купуваат лажни пропусници за Ковид-19 преку интернет за да избегнат епидемиолошки мерки во земјата, кои често се промовираат на големите социјални мрежи, според истражувањето на Институтот за стратешки дијалог (ИСД).
Според студијата на ИСД, многумина што купуваат фалсификувани пропусници за Ковид-19, кои може да се користат во Европската Унија (ЕУ), се пренасочуваат од социјалните мрежи „Инстаграм“ и „Фејсбук“ до шифриран месинџер на „Телеграм“, каде што може дискретно да се купат.
Во извештајот се наведува и дека алгоритмите на социјалните медиуми автоматски ги насочуваат луѓето разочарани од начинот на кој француската влада се бори против пандемијата на коронавирусот кон екстремно десничарските онлајн-простори.
Координаторката на студијата на ИСД, Зое Фурел, рече дека додека некои групи на „Фејсбук“, посветени на продажба на лажни пропусници за Ковид-19, имаат околу 1.000 членави, а има профили на „Инстаграм“ со дури 17.000 следбеници, пренесува „Гардијан“.
„Мислам дека, во однос на мрежите, главното прашање е колку овие лажни пропусници се достапни на ‘Фејсбук’ и na ‘Инстаграм’“, истакна Фурел и додаде дека тоа е очигледно бидејќи овие мрежи имаат толку голема публика, што овозможуваат достапност на таа содржина во поголем обем.
„За ‘Инстаграм’, една од најалармантните работи што ги забележавме е дека неговиот алгоритам, всушност, препорачува сметки што нудат лажни здравствени услуги, па ако сте личност што следи повеќе сметки со дезинформации за Ковид-19, вашиот алгоритам ќе препорача повеќе сметки што нудат лажни пропусници.
Франција воведе пропусници за Ковид-19 за време на пандемијата на коронавирусот, кои им помагаат на луѓето да го докажат својот негативен тест на коронавирусот, како и дали се вакцинирани.
Сепак, француската влада минатиот месец одобри пропусница што дозволува само вакцинирани лица да влегуваат во ресторани, спортски арени и на други јавни места.
Затоа за антиваксерите е пожелно да се добијат лажни пропусници, кои може да се користат во земјите-членки на ЕУ, се вели во извештајот на ИСД.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Украина им дозволува на мажите до 22 години да ја напуштат земјата

Украинската влада им дозволи на младите мажи под 22 години да ја напуштат земјата и покрај војната со Русија.
„Мажите на возраст од 18 до 22 години можат слободно да ја преминат границата за време на воена состојба“, објави денес украинската премиерка Јулија Свириденко на Телеграм.
Одлуката се однесува на сите регрути во таа возрасна група.
Одлуката е важна и за Украинците кои веќе се во странство од различни причини да не ја изгубат врската со својата татковина, напиша премиерката.
Министерот за внатрешни работи Игор Клименко објасни дека мерката има за цел да им даде на младите мажи повеќе можности да студираат во странство, за да можат да придонесат за развојот на земјата кога ќе се вратат.
По почетокот на руската инвазија на Украина пред три и пол години, украинскиот претседател Володимир Зеленски прогласи вонредна состојба што вклучуваше забрана за патување за сите мажи на возраст од 18 до 60 години можат да служат војска.
Исклучоците бараат посебни дозволи. Илјадници ја напуштија земјата за да избегнат одење на фронтот.
Новата одлука нема да влијае на тековната мобилизација. Според сегашниот закон, само мажи на возраст од 25 години и постари можат да бидат повикани во војна, додека помладите мажи можат да се пријават како волонтери.
фото: принтскрин
Европа
Изгаснат е големиот пожар во пристаништето во Хамбург

Пожарникарите успеаја да го изгаснат огромниот пожар што вчера уништи магацин во северното германско пристаниште Хамбург, соопштија официјални лица.
Околу 120 пожарникари ги гасат преостанатите пламени, но најголемиот пожар на местото е изгаснат.
„Пожарот во големата сала сега е изгаснат“, изјави портпаролот на противпожарната бригада за ДПА, напладне.
Сè уште е премногу опасно да се приближи до центарот на пожарот, за кој се верува дека е предизвикан од запален автомобил во магацин.
„Имаше дополнителни експлозии предизвикани од резервоари за гас под притисок“, рече портпаролот, а областа засега останува блокирана.
Полициските истражители не беа во можност да започнат истрага на местото на настанот поради присуството на токсични гасови.
Шест лица беа првично повредени во пожарот што избувна вчера попладне во округот Ведел на југоистокот на Хамбург. Едно лице е во критична состојба, а друго е сериозно повредено.
Тројца пожарникари на местото на настанот беа последователно повредени од експлозии, а еден мотоциклист беше повреден од летечки остатоци на автопатот А1. Дваесет и пет лица беа спасени од областа, некои со брод.
Непосредната опасност од пожар беше дополнително зголемена од цилиндрите со гас под притисок складирани во магацин кои експлодираа по неколку часа, од кои некои беа фрлени неколку стотици метри во воздух и предизвикаа повеќе пожари во околината.
фото: принтскрин
Европа
Зеленски објави кои земји ги разгледува Украина за преговори со Путин

Украинскиот претседател Володимир Зеленски денеска изјави дека Турција, заливските или европските земји би можеле да бидат домаќини на разговори со рускиот претседател Владимир Путин.
Зеленски бара директни разговори со Путин за да се стави крај на војната во Украина, но рускиот министер за надворешни работи Сергеј Лавров рече дека не е подготвена агенда за таков состанок.
„Па, оваа недела ќе има контакти со Турција, со земјите од Заливот и со европските земји кои би можеле да бидат домаќини на разговори со Русите“, рече Зеленски во видео обраќање.
„Од наша страна, работите ќе бидат максимално подготвени за да се стави крај на војната.“
Зеленски рече дека разговорите зависат од координацијата со украинските партнери, првенствено со САД, за да се обезбеди доволен притисок врз Русија. Ова беше дискутирано вчера во Киев со американскиот претставник Кит Келог.
„Сè понатаму зависи строго од волјата на светските лидери, од кои најважни се САД, да извршат притисок врз Русија“, рече тој.
„Русија само дава сигнали дека ќе продолжи да избегнува вистински преговори. Ова може да се промени само со силни санкции, силни царини – вистински притисок.“
фото: принтскрин