Европа
Во Шпанија откриено оружје наменето за терористи, кое може да собори авион

Оружје, наменето за продажба на терористи и организирани криминални организации, е откриено изминатата седмица во Шпанија, а неговата цена на илегалниот пазар се проценува на 10 милиони евра, и притоа се запленети 10.000 до 12.000 парчиња оружје, вклучително и проектили со кои може да се собори авион, соопшти во неделата шпанската Национална гарда.
Минатата седмица во Шпанија беа уапсени пет лица, припадници на злосторничка организација, кои се занимавале со продажба на оружје на црниот пазар на криминални организации, вклучително и на терористички. Сите уапсени, четворица мажи и една жена, се Шпанци по националност. Тие купувале старо оружје, го ремонтирале и го продавале на илегалниот пазар.
Апсењата беа спроведени во шпанските региони Олоте (Жирона, Каталонија), Лиендо (Кантабрија), Галдекано и Гечо (Бискаја, Баскија). Покрај тоа, откриени се и работилници каде што криминалната група го поправала старото оружје и го подготвувала за продажба.
Во неделата полицијата прецизираше дека се заплените меѓу 10.000 и 12.000 единици различно оружје, меѓу нив и автоматски пушки „CETME“, автомати „Beretta“, пиштоли „Astra“ и „Star“, тешки митралези и други видови оружје. Дел од оружје било во исправна состојба. Покрај тоа, биле најдени и расклопени делови од различни видови оружја и запленети 80.000 евра во готовина.
Со одлука на судот на три лица од петчлената група им е одреден притвор, додека на другите две им се одземени пасошите и забрането им е да ја напуштаат територијата на Шпанија.
Во трагата на оваа група било влезено во текот на истрагите за терористичкиот напад врз Еврејскиот музеј во Брисел на 24-ти мај 2014 година, кога беа убиени четири лица. Напаѓачот беше идентификуван како Мехди Немуш, Французин од алжирско потекло./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
(Видео) Запечатена резиденција на папата, во Ватикан владее седисвакација

Ватикан ја запечати официјалната резиденција на папата Франциско, симболично започнувајќи период на жалост.
На снимката објавена од Ватикан се гледа кардиналот Кевин Џозеф Фарел, камерленгото, како гледа како службеник на Ватикан става црвена лента на вратата од резиденцијата на папата, ја врзува, а потоа става восочен печат на лентата. После тоа, Фарел ја проверува пломбата и се уверува дека вратата е цврсто затворена.
The papal apartments in the Apostolic Palace — unused during Pope Francis’ pontificate — have been officially sealed by Cardinal camerlengo Kevin Farrell following the Pope’s death. This act marks the beginning of the “sede vacante” period, during which the See of Peter remains… pic.twitter.com/p3PcYqN050
— EWTN Vatican (@EWTNVatican) April 21, 2025
Запечатувањето на папската резиденција е традиционален обред што го изведува камерленго, привремениот управител на Ватикан, а историски служел за да се спречи ограбувањето на папските одаи.
Овој чин го симболизира официјалниот крај на понтификатот на папата Франциско и почетокот на периодот на седисвакација – период без папа.
Европа
„Гробот нека биде едноставен, без украси, на плочата нека стои еден збор“: Ватикан го објави тестаментот на Папата

Папата Франциско во својот последен тестамент потврди дека сака да биде погребан во базиликата Света Марија Велика во Рим, наместо во базиликата Свети Петар во Ватикан, каде што многу од неговите претходници го најдоа своето последно почивалиште.
Во тестаментот објавен од Ватикан, Франциско јасно ја изразил својата желба да биде погребан „во земја, без посебни украси“, а над неговиот гроб треба да стои едноставна плоча со неговото папско име на латински: Franciscus.
Папата исто така напишал дека договорил неименуван добротвор да ги покрие трошоците за неговиот погреб.
„Трошоците за подготовка на погребот ќе бидат покриени од сумата што ја обезбеди добродетелот, кој договорив да биде префрлен во базиликата Света Марија Велика“, стои во тестаментот.
Европа
Ватикан: Папата почина од мозочен удар и срцево затајување

Ватикан објави дека папата Франциско починал од мозочен удар кој предизвикал кома и неповратно срцево затајување. „Смртта е констатирана со електрокардиограм“, пишува во изводот на смртта потпишан од директорот на Одделот за здравје и хигиена на Ватикан, професор Андреа Аркангели.
„Потврдувам дека Неговата Светост Франциско (Хорхе Марио Бергољо), роден во Буенос Аирес (Аргентина) на 17 декември 1936 година, жител на Ватикан, државјанин на Ватикан, почина во 7:35 часот на 21 април 2025 година, во неговиот стан во резиденцијата Санта Марта“, напиша тој.
Аркангели наведува дека папата по мозочниот удар прво паднал во кома, а потоа починал. Причините за смртта се „мозочен удар“, „кома“ и „неповратна кардиоциркулаторна инсуфициенција“, се вели во соопштението. Во документот се додаваат и претходните здравствени проблеми на папата, „епизоди на акутна респираторна инсуфициенција со билатерална мултимикробна пневмонија, хипертензија и дијабетес тип II“.
Папата Франциско почина околу 90 минути откако утрово го разбудил будилникот, јавија италијанските медиуми. Тој наводно се разбудил кога алармот му се вклучил во 6 часот, му се слошило во 7 часот наутро, а починал од мозочен удар во 7:35 часот, пишува „Кориере дела Сера“. Лекарите претходно објавија дека тој „починал мирно“.