Европа
Германската полиција изврши рации во врска со нападот во Берлин

Сојузната полиција во вторникот вечерта и ноќта кон средата извршила претреси во центри за прифаќање на бегалци и во домовите на двајца можни соучесници на 24-годишнот Тунижанец Анис Амри, осомничен дека со камион вечерта на 19-ти декември на божикниот базар во Берлин во терористички напад усмрти 12 луѓе, соопшти канцеларијата на државниот обвинител на Германија.
Во еден од прифатните центри иследниците трагале по 26-годишен државјанин на Тунис, за кој сметаат дека можело да биде поврзан со берлинскиот напаѓач.
„Според податоците на истрагата, тој се познавал со Анис Амри најдоцна од крајот на 2015 година и контактирал со него кусо до моментот на извршувањето на терористичкиот чин. Постои сомневање дека обвинетиот бил во тек со плановите за нападот и, веројатно, му помогнал на Анис Амри“, се наведува во соопштението на обвинителството.
Покрај тоа, полицијата извршила рација и во берлинскиот стан на лице кое порано живеело заедно со Амри.
„Според достапните информации, сведокот исто така контактирал со Амри. Истражните дејствија беа во насока на појаснување на активностите на Амри пред и по извршувањето на терористичкиот напад“, се додава.
Меѓутоа, не е соопштено дали во текот на рациите се приведени и самите осомничени. Обвинителството најавува дека во текот на средата ќе даде изјава во врска со текот на истрага за терористичкиот напад во Берлин.
Вечерта на 19-ти декември во Берлин, со украден полски шлепер чиј возач го убил, Анис Амри влета во толпата на божикниот пазар, и притоа уби 12 луѓе и повреди уште 48. Во кабината од возилото беа пронајдени негови документи и отпечатоци од прсти. Одговорноста за нападот ја презема џихадистичката групација Исламска држава.
И покај масивната полициска операција, Амри успеал да пребега во Холандија, во Амстердам, а потоа со автобус непречено повеќе од 15 часа да патува до францускиот град Лион, од каде со воз допатувал во северниот италијански град Милано, каде на 23-ти декември утрото беше убиен во престрелка со полицијата која при рутинска контрола му побарала документи./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
(Видео) Украинците објавија снимка: „Со беспилотно летало уништивме моќен руски дрон во лет“

Украинските сили соборија руски повеќенаменски дрон Zala Kub со помош на беспилотно летало FPV, а снимката од акцијата беше споделена на социјалните мрежи од украинскиот волонтер Серхи Стерненко, пренесува „Милитарњи“.
„Таквото летало можеше да предизвика голема штета, па затоа е одлично што беше уништен во воздух“, рече Стерненко.
Zala Kub е дизајниран за прецизни удари на копнени цели – кога ќе ги открие, вертикално навлегува и исфрла експлозивен товар на горниот дел од возилото, каде што тенковите и оклопните возила се најранливи поради нивниот потенок оклопен слој.
Ова беспилотно летало е развиено од рускиот концерн „Калашников“, а првпат беше прикажано во 2019 година на меѓународната воена изложба IDEX во Обединетите Арапски Емирати.
Украина долго време користи беспилотни летала FPV како пресретнувачи за уништување руски летала. Ваквите дронови, во зависност од опремата, како дневни и термални камери, чинат меѓу 1.600 и 2.500 долари. Тие може да летаат со брзина до 160 километри на час, да имаат дострел до 35 километри и да останат во воздухот до еден час.
Европа
Судот ќе ја изрече пресудата за Депардје во мај

Кривичниот суд во Париз во четвртокот објави дека на 13 мај ќе ја изрече пресудата за актерот Жерар Депардје за сексуално вознемирување две жени за време на снимањето филм во 2021 година.
Француското Обвинителство во четвртокот побара 18-месечна условна казна и глоба од 20.000 евра за Депардје, објави весникот „Ле Паризиен“ и другите медиуми.
Седумдесет и шестгодишниот Депардје, истакната личност во француската кинематографија, е обвинет за сексуално вознемирување две жени за време на снимањето филм од 2021 година. Ова е првпат актерот, кој се соочува со многубројни обвинувања за сексуално вознемирување во текот на годините, да биде изведен пред суд.
Депардје призна дека ја фатил една од жените за бутот, но негира дека тоа е напад. Неговиот адвокат рече дека наводите против клиентот се лажни и дека истражителите биле пристрасни.
Европа
(Видео) Нереални снимки од протестот: Пикачу ги поддржа граѓаните во Турција

Надреално видео од Покемон кој наводно бега од полицијата за време на протестите во Турција стана вирална. Имено, некој облечен како Пикачу е снимен како бега од полицијата која брка демонстранти. Снимката наводно е направена во Анталија.
Виралното видео, кое нашироко се споделува на социјалните мрежи, се чини дека потекнува од турскиот фоторепортер Исмаил Коцероглу.
Исмаил во четвртокот објави видео на својот Инстаграм профил, на кое се гледа како костимиран демонстрант бега со толпа граѓани.
Дали е автентична снимката на која Пикачу бега од полицијата не е потврдено.
Сепак, Исмаил продолжи да поставува видеа од овој маскиран демонстрант. Синоќа, тој повторно објави видео од Пикачу како шета низ улиците на Анталија, наведувајќи дека Пикачу „се приклучил на осмиот ден од демонстрациите“.