Европа
Голема полициска акција во Италија: мафијата крадела пари од европските фондови

Полицијата уапси 37 лица на Сицилија, од кои некои се верува дека се членови на мафијата. Станува збор за истрага за голема измама со која извлекувале европски пари наменети за земјоделски субвенции, пренесува Гардијан. При последната истрага во ноември 2022 година беа уапсени 91 лице. Во периодот од 2010 до 2017 година преку измама примиле над 5 милиони евра. Со субвенциите беа опфатени парите за илјадници хектари непостоечко земјиште во источниот дел на Сицилија.
Инспекторите рекоа дека мафијата соработувала со „белите работници“, кои ги доближиле криминалците до бирократијата на ЕУ. Измамниците извршиле и стотици измами против Агеа, италијанска агенција која го финансира земјоделството.
Минатата година започна нова истрага. Се потпира на сведочењето на тројца соработници кои биле дел од мафијашката група Батанези, едно од најстарите мафијашки семејства на островот. Наводно, во новата измама се вклучени повеќе од 150 фирми. Обвиненијата вклучуваат криминална организација, уцена, измама на државата, перење пари и обид за насилство.
Во Месина беа уапсени членови на клановите Батанези, Бонтемпо Скаво и Торторичи. Батанези и Бонтемпо Скаво се во конфликт со години, но неодамна ставија крај на нивните разлики и ги здружија силите во криминалот.
Во документите од првичната истрага е забележано дека еден функционер напишал дека честопати е доволен повик од мафијашки бос за селанецот да ја предаде својата земја. „Шефот едноставно мораше да го повика селанецот да му ја украде земјата. Честопати толку се плашеа од самото име на мафијашот, што ја предаваа земјата без воопшто да се обидат да се побунат, толку се плашеа од одмазда“. На селаните кои одбиле да учествуваат во измамата им била опустошена земјата, им бил убиван добиток, а на некои дури и им биле запалени куќите.
Експлоатацијата на европските фондови е се попрофитабилна за сицилијанската мафија, пишуваат регионалните медиуми.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
(Видео) Украинците објавија снимка: „Со беспилотно летало уништивме моќен руски дрон во лет“

Украинските сили соборија руски повеќенаменски дрон Zala Kub со помош на беспилотно летало FPV, а снимката од акцијата беше споделена на социјалните мрежи од украинскиот волонтер Серхи Стерненко, пренесува „Милитарњи“.
„Таквото летало можеше да предизвика голема штета, па затоа е одлично што беше уништен во воздух“, рече Стерненко.
Zala Kub е дизајниран за прецизни удари на копнени цели – кога ќе ги открие, вертикално навлегува и исфрла експлозивен товар на горниот дел од возилото, каде што тенковите и оклопните возила се најранливи поради нивниот потенок оклопен слој.
Ова беспилотно летало е развиено од рускиот концерн „Калашников“, а првпат беше прикажано во 2019 година на меѓународната воена изложба IDEX во Обединетите Арапски Емирати.
Украина долго време користи беспилотни летала FPV како пресретнувачи за уништување руски летала. Ваквите дронови, во зависност од опремата, како дневни и термални камери, чинат меѓу 1.600 и 2.500 долари. Тие може да летаат со брзина до 160 километри на час, да имаат дострел до 35 километри и да останат во воздухот до еден час.
Европа
Судот ќе ја изрече пресудата за Депардје во мај

Кривичниот суд во Париз во четвртокот објави дека на 13 мај ќе ја изрече пресудата за актерот Жерар Депардје за сексуално вознемирување две жени за време на снимањето филм во 2021 година.
Француското Обвинителство во четвртокот побара 18-месечна условна казна и глоба од 20.000 евра за Депардје, објави весникот „Ле Паризиен“ и другите медиуми.
Седумдесет и шестгодишниот Депардје, истакната личност во француската кинематографија, е обвинет за сексуално вознемирување две жени за време на снимањето филм од 2021 година. Ова е првпат актерот, кој се соочува со многубројни обвинувања за сексуално вознемирување во текот на годините, да биде изведен пред суд.
Депардје призна дека ја фатил една од жените за бутот, но негира дека тоа е напад. Неговиот адвокат рече дека наводите против клиентот се лажни и дека истражителите биле пристрасни.
Европа
(Видео) Нереални снимки од протестот: Пикачу ги поддржа граѓаните во Турција

Надреално видео од Покемон кој наводно бега од полицијата за време на протестите во Турција стана вирална. Имено, некој облечен како Пикачу е снимен како бега од полицијата која брка демонстранти. Снимката наводно е направена во Анталија.
Виралното видео, кое нашироко се споделува на социјалните мрежи, се чини дека потекнува од турскиот фоторепортер Исмаил Коцероглу.
Исмаил во четвртокот објави видео на својот Инстаграм профил, на кое се гледа како костимиран демонстрант бега со толпа граѓани.
Дали е автентична снимката на која Пикачу бега од полицијата не е потврдено.
Сепак, Исмаил продолжи да поставува видеа од овој маскиран демонстрант. Синоќа, тој повторно објави видео од Пикачу како шета низ улиците на Анталија, наведувајќи дека Пикачу „се приклучил на осмиот ден од демонстрациите“.