Европа
Ден по масакрот, полицијата во Прага нареди: Внимавајте на училиштата

Чешката полиција презеде мерки на претпазливост за училиштата во таа земја по масовното пукање на универзитетот во Прага, во кое беа убиени 15 лица.
Исто така, Владата ја прогласи сабота, 23 декември, за ден на национална жалост.
„Од денеска донесовме национални превентивни мерки во однос на чувствителните цели и училиштата. Немаме информации за конкретна закана и тоа е навистина превенција – сигнал дека сме тука и дека сме подготвени“, соопштија од полицијата.
Напаѓачот, 24-годишниот Дејвид Козак, студент на тој универзитет, по случаен избор пукал во своите колеги. Тоа е едно од најлошите масовни убиства во историјата на Чешка. Засега не е познат мотивот за злосторството.
Чешката полиција соопшти дека не се работи за терористички чин. Се сомнева дека Козак го убил и својот татко во утринските часови во предградието на Прага.
Медиумите јавуваат дека напаѓачот се самоубил кога пристигнала полицијата.
„Владата донесе заклучок во кој изразува длабоко сочувство до семејствата на жртвите, а со едноминутно молчење на почетокот на владината седница им оддадовме почит на жртвите од престрелката“, соопшти Фијала, пренесува „Новинки“.
Тој ги повика граѓаните на Чешка на 23 декември во 12 часот на едноминутно молчење додавајќи дека во тоа време ќе бијат и црковните ѕвона во целата земја.
Чешката полиција го откри идентитетот на 11 од 14-те жртви на пукањето на универзитетот во Прага и објави дека напаѓачот, 24-годишен студент, легално поседувал огнено оружје и бил инспириран од слични настани во странство.
Полицијата соопшти дека цела ноќ работела во зградата на Филозофскиот факултет и дека сѐ уште работи на утврдување на идентитетот на преостанатите жртви, објави чешката новинска агенција ЧТК.
Во рамките на мерките на претпазливост на улиците ќе има и вооружени полицајци, соопшти полицијата.
Напаѓачот е 24-годишен студент, кој легално поседувал огнено оружје и немал криминално досие. Според полицијата, тој бил инспириран од сличен случај во странство, а пукањето очигледно било дело на осамен вооружен маж.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Унгарија се повлекува од Меѓународниот кривичен суд

Владата на Унгарија објави дека се повлекува од Меѓународниот кривичен суд, објави „Ројтерс“.
Гергели Гуљас, висок функционер во владата на премиерот Виктор Орбан, го објави потегот неколку часа откако израелскиот премиер Бенјамин Нетанјаху – по кого Меѓународниот кривичен суд издаде налог за апсење – пристигна во земјата во официјална посета.
Орбан му се јави на израелскиот лидер штом беше издадена наредбата минатиот ноември велејќи дека одлуката нема ефект во Унгарија.
Во ноември судиите на Меѓународниот кривичен суд рекоа дека има разумни основи да се верува дека Нетанјаху има кривична одговорност за наводните воени злосторства и злосторствата против човештвото за време на војната меѓу Израел и Хамас.
Нетанјаху ја осуди одлуката на Меѓународниот кривичен суд како антисемитска.
Унгарија е еден од основачите на Меѓународниот кривичен суд, кој има 125 земји членки. САД, Русија, Кина и Израел не ја признаваат неговата јурисдикција, како и некои други држави.
Меѓународниот кривичен суд има овластување да гони поединци обвинети за геноцид, злосторства против човештвото и воени злосторства на територијата на државите потписнички на Римскиот статут, неговиот основачки договор.
Европа
Мечка уби човек во Словачка, владата одобри убивање на четвртина кафеави мечки

Владата на Словачка го одобри планот за отстрел на околу четвртина од кафените мечки во земјата, откако еден човек беше изгризан до смрт додека шеташе во шума во централна Словачка, јавува Би-би-си.
Популистичко-националистичката влада на премиерот Роберт Фицо по состанокот на владата објави дека 350 од околу 1.300 кафеави мечки ќе бидат застрелани, наведувајќи ја опасноста за луѓето по серијата напади.
„Не можеме да живееме во земја во која луѓето се плашат да влезат во шума“, изјави премиерот на новинарите по средбата.
Специјалната вонредна состојба која дозволува пукање на мечки сега е проширена во 55 од вкупно 79 окрузи во Словачка, што значи дека го покрива најголемиот дел од земјата.
Владата во Братислава веќе ја олабави законската заштита за мечките, дозволувајќи им да бидат застрелани ако се премногу блиску до населени места. До крајот на 2024 година беа убиени 93 мечки. Плановите за дополнителни убиства беа осудени од оние кои тврдат дека таквата одлука е спротивна на меѓународните обврски и потенцијално незаконска.
Европа
Од денеска на европските граѓани им треба еден документ за влез во Британија, позната цената на пропусницата

Европските граѓани кои патуваат во Обединетото Кралство од денеска ќе имаат потреба од дигитална пропусница за влез во земјата, што според британската влада ќе ја зајакне безбедноста на границите.
Електронското овластување за патување (ЕТА) може да се купи онлајн за 10 фунти (12 евра) во наредните денови, а од 9 април цената ќе се зголеми на 16 фунти (19 евра).
Дозволата ќе биде задолжителна за сите Европејци кои сакаат да ја посетат Велика Британија од 2 април, откако истата пропусница беше воведена во јануари за граѓаните на САД, Канада и други земји на кои не им е потребна виза.
Слична дозвола за влез во земјата имаат и САД.
„Со дигитализирање на системот за имиграција, го отвораме патот за бесконтактни гранични премини во ОК“, рече министерката за миграција Сема Малхотра претходно овој месец, кога беше отворена веб-страницата за првите апликации.
Таа додаде дека проширувањето на ЕТА во земјите ширум светот „ја зајакнува посветеноста за подобрување на безбедноста преку технологија и иновации“.
Документот дозволува посети до шест месеци и важи две години. Тоа е задолжително за сите патници, вклучително и малолетни и новороденчиња.
Пропусницата може да се добие од апликација за паметни телефони или од владината веб-страница и е достапна за Европејците од почетокот на март.
Почнувајќи од среда, граѓаните на околу триесет европски земји, вклучително и целата ЕУ со исклучок на Ирска, ќе треба да имаат електронска дозвола за влез во Обединетото Кралство, кое ја напушти ЕУ во 2020 година.
Апликантот мора да приложи фотографија од пасош и од лицето. Процесот трае околу десет минути, информираат од британското Министерство за внатрешни.
Во повеќето случаи, одлуката за апликацијата се носи во рок од неколку минути, но можно е да се чека и до три работни дена, велат од Владата.
Доколку апликацијата се обработи успешно, ЕТА е дигитално поврзана со пасошот на апликантот.
Патниците кои се префрлаат на аеродроми без да ја поминат границата со ОК се ослободени од оваа шема. Ова беше направено по притисокот од Хитроу, најпрометниот аеродром во Европа, кој стравуваше од губење на бројот на патници.
Има само два аеродрома во ОК со можност за поврзување без преминување на границата, Манчестер и Хитроу. Во 2024 година, речиси 84 милиони патници поминаа низ Хитроу, од кои една третина беа од ЕУ.
Програмата беше лансирана во 2023 година за Катар, а потоа се прошири во пет соседни земји од Персискиот Залив.
Во јануари, тој беше проширен на граѓаните на дополнителни педесет земји, вклучувајќи ги Аргентина, Јужна Кореја и Нов Зеланд.
До крајот на 2025 година, речиси 1,1 милион посетители ќе добијат ЕТА, според Министерството за внатрешни работи на Британија.
Не е потребна дозвола за луѓе со дозволи за престој во ОК или луѓе кои веќе имаат имиграциски статус во Кралството.