Европа
Кан: Сега е јасно дека брегзитот не функционира, ја влече економијата надолу
Економијата на Велика Британија се намали шест отсто по напуштањето на Европската Унија – годишен трошок од 178 милијарди долари, рече градоначалникот на Лондон, Садик Кан, при што се очекува недостигот да достигне десет отсто до 2035 година.
Кан, член на опозициската Лабуристичка партија, која гласаше против брегзитот на референдумот во 2016 година, ја засноваше својата изјава на извештајот што го нарачал од економските консултанти „Кембриџ економетрикс“, кој проценува колку бргу ќе растеше економијата доколку Британија гласаше да остане во ЕУ.
„Сега е јасно дека брегзитот не функционира. Тешката верзија на брегзитот, со која завршивме, ја влече нашата економија надолу и ги зголемува трошоците за живот“, рече Кан.
Лабуристите имаат голема предност пред конзервативците на премиерот Риши Сунак пред изборите, кои тој има намера да ги распише во втората половина на оваа година.
Британскиот Национален институт за економски и социјални истражувања (NIESR) во ноември процени дека брегзитот ја намалил големината на економијата за 2-3 отсто, а влијанието се очекува да се зголеми на 5-6 отсто до 2035 година.
Креаторот на политиката на Банката на Англија, Џонатан Хаскел, минатата година процени дека брегзитот ги повредил инвестициите со намалување на БДП за 1,3 отсто до крајот на 2022 година, што е еквивалент на 1.000 фунти од домаќинство годишно.
„Кембриџ економетрикс“ соопшти дека се очекува брегзитот да го намали годишниот економски раст во Британија за 0,4-процентни поени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Ги убил двајцата внуци, па си пресудил самиот на себе: пензионер се забарикадирал во куќа во Шпанија
Трагедија се случи во мал шпански град кога пензионер ги уби своите двајца внуци на возраст од 10 и 13 години пред да се самоубие – два месеца откако сопруга и ќерката му загинаа во сообраќајна несреќа додека тој возел.
Полицијата ја опколила куќата на 72-годишниот маж откако тој синоќа се забарикадирал во имотот со момчињата.
Нивните три тела беа пронајдени околу 8.30 часот утринава во разни простории од куќата во Хуетор Тајар – град со околу 10.000 жители, во близина на градот Гранада во јужна Шпанија – кога насилно влегле вооружени полицајци.
Едното дете е убиено со огнено оружје, а другото се удавило.
Извори блиски до истрагата велат дека едно од децата имало прострелни рани, а другото се верува дека се удавило.
Истражителите на Цивилната гарда велат дека пензионерот се застрелал со истото огнено оружје што го користел за да го убие својот внук.
Неговата сопруга и ќерката, мајка на две деца, ја загубија борбата за живот кога беа исечени од остатоците од автомобилот што го управуваше 72-годишникот.
Европа
Се огласи болницата во Банска Бистрица: Ова се последните информации за состојбата на Роберт Фицо
Состојбата на словачкиот премиер Роберт Фицо, кој беше ранет во обид за атентат минатата недела, е стабилна, соопштија од болницата во Банска Бистрица.
„Клинички се подобрува, комуницира, воспалителните параметри полека се намалуваат. Премиерот останува под наша грижа“, соопштија од болницата во Банска Бистрица по денешната седница на советот.
Фицо беше тешко ранет минатата среда по состанокот на кабинетот кога се приближи до насобраните луѓе.
Тој со хеликоптер беше префрлен во болницата во Банска Бистрица, каде што итно беше опериран и оттогаш е таму.
Претходните денови се зборуваше за префрлање на премиерот во друга институција, но како што може да се заклучи од денешното соопштение на болницата, тој засега останува во Банска Бистрица.
Европа
Украина со дронови нападна руска рафинерија: „Има штета, престана да работи“
Руска нафтена рафинерија во Славјанск, во Краснодарската област, беше оштетена по напад со беспилотно летало кон крајот на минатата недела, објави денеска државната новинска агенција „Тасс“ цитирајќи претставник на компанијата за безбедност.
Шест беспилотни летала погодија област на нафтена рафинерија во Славјанск во јужниот дел на Русија Краснодар во раните утрински часови, според локалните власти.
Новинската агенција „Интерфакс“ објави дека рафинеријата престанала да работи по нападот.
„Причинета е штета. Ќе се утврдат нејзината големина и опсегот“, ја цитира „Тасс“ изјавата на безбедносниот претставник Едуард Труднев во понеделникот.
Рафинеријата во Славјанск е приватна постројка со капацитет од речиси 100.000 барели дневно. Произведува гориво за домашни потреби и за извоз.