Европа
Најдени снимки на џихадисти кои се закануваат на Мадрид
Шпанската полиција открила видеоснимки на вооружени џихадисти пред фотографија на плоштадот Пуерта дел Сол во Мадрид, каде што десетици илјади луѓе се подготвуваат да ја дочекаат новата година со засилени безбедносни мерки, соопштија во петокот правосудни извори.
Станува збор за редок случај на директна закана за Шпанија, каде што досега џихадистичките пројави беа ограничени. Откривањето на овие снимки следеше откако во средата беа уапсени двајца шпански државјани, Едризо Кесеј Сануво и Самли Сенуни Моух, на коишто судија од Државниот суд, специјализиран за дела од тероризмот, им изрече мерка притвор.
Двајцата мажи се снимале со автоматски пушки „АК-47“ и воен нож со ознаки на екстремната сунитска организација Исламска држава и со знамето на оваа џихадистичка групација што е проследено со исламистички песни и џихадистички извици.
Против нив е покрената судска постапка поради славење на тероризмот и вооружување, а во нивниот стан полицијата открила пет шаржери за бојна пушка и муниција.
„На некои снимки се гледаат мажите со маски и оружје пред Пуерта дел Сол, плоштадот на кој мадриѓани секоја година масовно ја дочекуваат Новата година“, изјавил за AFP неименуван правосуден извор.
Претходно во петокот беше објавено дека властите на шпанската престолнина Мадрид планираат да распоредат уште 1.600 полицајци во текот на новогодишниот викенд, како и оти втора година по ред пристапот кон централниот плоштад Пуерта дел Сол, на кој традиционално се организира пречекот, ќе биде ограничен за 25.000 луѓе и е обезбеден со барикади.
Од 2015 година во Шпанија се уапсени 177 осомничени за врски со исламистичкиот тероризам.
Од Шпанија, која беше погодена од голем терористички напад врз железницата во Мадрид на 11-ти март 2004 година кога беше убиен 191 човек, во моментов е мал бројот на борци кои заминуваат на Блискиот исток да се борат во редовите на Исламската држава. Според процените на шпанските власти, 200 Шпанци заминале во странство во редовите на џихадистичките групи, додека од Франција и од Белгија заминале повеќе стотици.
Шпанскиот премиер Маријано Рахој на прес-конференција во петокот изјави дека „заканите не се ниту поголеми, ниту помали“, отколку во 2015 година кога на сила беа 4-от и 5-от степен на антитерористички аларм./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Белгиски министер: Ќе ја срамниме Москва со земја ако го нападнат Брисел
Белгискиот министер за одбрана, Тео Франкен, тврди дека НАТО ќе ја „срамни со земја Москва“ доколку Русија некогаш го нападне Брисел. Во опширно интервју, Франкен се осврна на низа итни стратешки прашања, вклучувајќи ја војната во Украина, европската одбрана и нуклеарното одвраќање, објави „The Brussels Times“.
Кога директно го прашаа дали се плаши дека рускиот претседател Владимир Путин може да започне конвенционален ракетен напад врз Брисел, неговиот одговор беше недвосмислен: „Не, бидејќи тогаш тој би го погодил срцето на НАТО, а потоа ние би ја срамниле Москва со земја“.
Франкен изрази силна поддршка за американското лидерство во рамките на НАТО и ја повтори својата доверба во Член 5, клаузулата за заемна одбрана што е основа на Алијансата.
На прашањето дали американскиот претседател Доналд Трамп би го почитувал Член 5, Франкен одговори потврдно. „Секако дека би го сторил тоа. Во Европа има многу предрасуди против американската влада. Зошто не би го почитувал Член 5?“

Франкен рече дека е повеќе загрижен за употребата на хибридно војување од страна на Русија отколку за заканата од конвенционален напад. „Крстосувачки проектил врз Брисел? Јасно е дека тоа би го активирало Член 5, без разлика која дефиниција ја користите. Путин нема да го стори тоа“, рече тој.
„Повеќе сум склон кон сценарио со сива зона: ‘мали зелени луѓе’ кои го поттикнуваат рускојазичното малцинство во Естонија против „нацистичкиот режим“. Пред да се свестите, тие анексираа дел од Естонија“, објасни министерот.
Министерот за одбрана не покажа ентузијазам за идејата за заедничка европска армија. Тој ги критикуваше поголемите европски земји за „максимизирање на сопствените пазари“ и праша како земјите кои во моментов не можат ниту да соработуваат во набавката на одбранбена опрема би можеле да ги интегрираат своите национални армии.
„Секој што верува во европска армија продава магла“, рече тој. „За среќа, го имаме НАТО, кој повторно ја докажа својата ефикасност со воздушната одбрана во Полска и Естонија“.
фото: принтскрин
Европа
(Видео) Руски дрон се упати кон новинарска екипа, украински војник го собори со пушка
Во украинскиот град Константинивка руски ФПВ-дрон се обиде да нападне новинарска екипа, но бргу беше запрен од портпаролот на 24. бригада, објави украинската војска.
Инцидентот се случил додека новинар на холандскиот весник „Хет Недерландс Дагблад“ ги снимал урнатините на црквата „Успение на Пресвета Богородица“, оштетена во претходните руски напади.
Додека екипата ја документирала штетата, руски дрон одеднаш се упатил кон нив. Портпаролот на 24. бригада, Олег Петрасјук, ја забележал заканата и пукал од својата пушка. По неколку истрели, тој успеал да го собори дронот.
Целиот инцидент е снимен и на видео, кое го прикажува моментот кога Петрасјук го забележува и го соборува дронот до оштетената црква.
фото: принтскрин
Европа
Зеленски даде наредба: Украина почнува да извезува оружје
Украинскиот претседател Володимир Зеленски му нареди на украинското Министерство за одбрана да започне „контролиран извоз“ на украинско оружје во странство почнувајќи од ноември.
„Украинскиот министер за одбрана Денис Шмихал мора до крајот на годината да обезбеди целосно завршување на задачите за производство и испорака на беспилотни летала – FPV дронови, дронови-пресретнувачи и дронови за мисии за длабински удари – . Програмата за контролиран извоз на нашето оружје треба да започне следниот месец“, рече Зеленски.
На 21 јуни, Зеленски објави дека Киев наскоро ќе започне со извоз на одбранбени технологии и отворање линии за производство на оружје во земјите партнери како дел од пошироките напори за интернационализација на производството на оружје во земјата, бидејќи капацитетот за производство на беспилотни летала во Украина ги надминува нејзините средства за финансирање.
Одбранбениот сектор на Украина, а особено нејзината индустрија за беспилотни летала, брзо растеше од почетокот на руската инвазија во 2022 година. Се појавија повеќе од 200 компании за беспилотни летала, од кои многу произведуваат евтини, прилагодливи системи кои го преобликуваа модерното војување.
Во последните месеци, Зеленски покажа подготвеност да го либерализира процесот на извоз на домашно оружје, кој во моментов е строго ограничен и бара тешко добиени дозволи од Државната служба за извоз. Во мај, украинските производители на одбрана испратија отворено писмо до Зеленски, барајќи од него да ги укине ограничувањата за извоз на домашна воена опрема, особено беспилотни летала.
Според предложениот систем, Украина ќе извезува вишок воена опрема, а профитот ќе го троши на итно потребно оружје, како што се беспилотни летала-пресретнувачи. Украина има намера да потпише договори за извоз во Соединетите Држави, Европа, Блискиот Исток и Африка, претходно изјави Зеленски.
фото: принтскрин

