Австриската влада денеска го претстави нацрт-законот со кој од февруари се воведува задолжителна вакцинација во таа земја.

Австрискиот канцелар Карл Нехамер најави дека задолжителната вакцинација ќе стапи на сила на почетокот на февруари, а преодната фаза без казни ќе трае до средината на март.

Од 16 март, како што беше речено на прес-конференцијата, ќе следат казни за оние кои не се вакцинирани.

Во Австрија обврската за вакцинирање ќе важи за сите граѓани на возраст над 18 години, а од оваа мерка се изземени бремените жени и сите лица кои не можат да се вакцинираат од медицински причини.

Предлог-законот предвидува казни од 600 до 3.600 евра.

Нехамер изрази уверување дека предлог-законот ќе биде усвоен во парламентот, бидејќи се работи за тема која се однесува на општото здравје.

„Ние не сме поединци кои живеат одвоени едни од други, ние сме општество“, подвлече тој.

Нехамер рече дека не станува збор за борба против вакцинираните и невакцинираните или за форма на дискриминација, туку за заштита на граѓаните.

Обврската за вакцинација се воведува во три фази.

Од почетокот на февруари до 14 март ќе се спроведе првата, преодна фаза, при што дописно ќе бидат информирани сите домаќинства за мерката.

Потоа, во втората фаза статусот на вакцинација станува, како што истакна, предмет на контрола.

Ако некој се најде без вакцинација, мора да смета на извештајот, а рамката за глоба е од 600 евра по скратена постапка до 3.600 евра во подолга постапка, доколку лицето поднесе жалба.

Владата потоа ќе ги одреди датумите кога ќе ја анализира листата на вакцинирани и повторно ќе го поднесе барањето за вакцинација до невакцинираните лица.

Доколку биде потребно поради епидемиолошката состојба ќе стапи на сила и третата фаза која предвидува Владата да го определи датумот до кој сите мора да се вакцинираат, а врз основа на изводот од регистарот на вакцинирани сите кои не биле вакцинирани ќе биде казнети.

„Вакцината штити и ги штити нашите сограѓани“, подвлече министерот за здравство Волфганг Микштајн.

Австрискиот парламент се очекува во четврток да го усвои законот со кој се воведува задолжителна вакцинација.

Предлог-законот однапред ќе помине на комисијата за здравство.

За донесување на законот е потребно просто мнозинство, со кое располага владејачката коалиција на Народната партија на Австрија (ОВП) и Зелените, а поддршка најавија и опозициската Социјалдемократска партија (СПО) и Неос.

Партијата на слободата на Австрија (ФПО) целосно го отфрла овој закон, а таа партија во неколку наврати, последен пат на протестите во сабота, јасно изјави дека нема да ја почитува задолжителната вакцинација.