Европа
Парализиран сообраќајот во Лондон, генерален штрајк на вработените во метрото

Милиони лондончани во понеделникот се соочија со сообраќаен хаос, откако вработените во метрото го започнаа 24-часовниот генерален штрајк, пренесува Reuters.
Поради штрајкот повеќето метро станици во центарот на Лондон се затворени, а исто така нема пристап нити од главните станици како што се Викторија, Кингс Крос и Ватерлу.
Понеделничкиот штрајк во метрото, кое дневно пренесува 4.8 милиони патници, започнува недела на сеопфатен штрајк кој ќе ги зафати и патниците со железничкиот и авионскиот сообраќај.
Возачите на железничкиот сообраќај, пак, штрајкуваат во вторник, среда и петок, со што железничките услуги нема да им бидат достапни на илјадници патници кои патуваат од јужниот брег и од аеродромот Гетвик.
Персоналот на авиокомпанијата British Airways пак, поради проблеми со платите ќе штрајкува во вторник и среда.
Штрајкот на вработени во метрото, пак, е поради несогласувањата околу затворањето на билетарите во последните неколку години.
„Денешниот штрајк е целосно непотребен. Штрајкот во метрото предизвикува мизерија за милиони лондончани“, изјавил лондонскиот градоначалник Садик Кан.
Повеќето законодавачи од редовите на Конзервативната партија, пак, ја повикаа владата да донесе нови закони со кои ќе ги намали штрајковите поради тоа што тие ја чинат економијата на земјата милиони фунти и ги нарушуваат имиџот на Лондон како еден од главните светски и финансиски центри./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Зеленски објави колку заработил лани: приходите му се зголемени во однос на 2023 година

Украинскиот претседател Володимир Зеленски објави декларација за имотот, приходите, трошоците и финансиските обврски на неговото семејство за 2024 година.
Системот на задолжителни електронски изјави за имот за јавни службеници беше воведен во 2014 година како дел од борбата на Украина против корупцијата. Откако беше суспендиран на почетокот на војната, Зеленски потпиша закон во октомври 2023 година со кој се вратија задолжителните декларации, пишува Киев Индипендент.
Според последните податоци, приходот на семејството Зеленски во 2024 година бил 15.286.193 гривни (368.556 долари), вклучувајќи 8.585.532 гривни (207.000 долари) од продажба на државни обврзници. Останатите приходи се состојат од претседателската плата, банкарските камати и приходите од издавање на сопствен недвижен имот.
„Зголемувањето на приходите на семејството на претседателот на Украина во однос на претходната година се должи на продолжувањето на целосната исплата на киријата“, соопшти прес-службата.
„Немаше други значајни промени во имотот, недвижниот имот или возилата на семејството на претседателот минатата година“, додаваат тие.
Зеленски и членовите на неговото семејство пријавиле приход од 316.700 долари во 2023 година.
Европа
Единаесетгодишно девојче исчезна откако вчера влегло во реката Темза во Лондон

Единаесетгодишното девојче кое исчезна откако вчера влегло во реката Темза во источен Лондон е именувано како Калија Коа, потврди полицијата.
Калија беше надвор и играше и влезе во реката во близина на аеродромот во Лондон Сити.
Итната помош била повикана на местото на настанот во 13 часот и 23 минути. по локално време, а во потрагата по девојчето се вклучени лондонската Брза помош, пожарникари, крајбрежна стража и спасувачка служба.
Метрополитенската полиција води операција за пребарување и спасување долж Темза.
Ден Кард, началникот на локалната полиција за североисточен Лондон, рече: „Нашите службеници специјалисти го поддржуваат семејството на девојчето во овој исклучително тежок момент, а нашите мисли се со сите погодени од овој настан. Посветени сме на наоѓање на Калија и, работејќи со партнерите, спроведуваме детална потрага на широк простор, користејќи беспилотни летала и чамци“.
Тој им се заблагодари на граѓаните, полицајците и другите служби за итни случаи за брзата реакција и големата операција за пребарување.
Една жена која се обидела да помогне, рече дека стигнала до брегот со појас за спасување, но не можела да го најде девојчето.
Кери Бенаџауд (62) изјави за новинската агенција PA дека децата трчале и викале дека нивната другарка е во реката.
„Ми се јави еден сосед. Тој рече дека повикал полиција и тогаш видел дека нејзините раце исчезнуваат под водата. Кога пристигнав со појасот за спасување, повеќе не ја видов“, рекла таа.
Европа
Мелони застана во одбрана на Ле Пен: „Им се одземаат правата на милиони граѓани“

Италијанската премиерка Џорџа Мелони денеска ја критикува одлуката на францускиот суд со која ѝ се забранува на лидерката на екстремната десница, Марин Ле Пен, да се кандидира на претседателските избори во 2027 година.
„Не ги знам деталите за обвиненијата против Марин Ле Пен, ниту причините за ваквата сурова одлука, но мислам дека никој што се грижи за демократијата не може да се радува на пресуда што ќе влијае на лидерот на голема партија и ќе ги лиши правата на милиони граѓани“, рече Мелони во интервју за италијанскиот весник „Ил Месаџеро“.
Мелони, која важи за најмоќниот десничарски лидер во Европа, со оваа изјава застана во одбрана на француската политичарка, која во понеделникот од парискиот суд беше прогласена за виновна за проневера на средства на Европската Унија.
Ле Пен е осудена на четири години затвор, од кои две ќе поминат под електронски мониторинг во домашен притвор, а две години се условни. Покрај тоа, таа е казнета со 100.000 евра и забрана за учество на избори во следните пет години.