Европа
Политичарите во Словачка по грешка изгласаа закон
Словачките политичари го повикаа нивниот претседател да стави вето на новиот закон за забрана на странски државни химни, за кој тие рекоа дека го изгласале „по грешка“.
Законот конкретно го криминализира пуштањето национални химна на други земји на голем број јавни настани, освен ако не е присутен член на странска делегација. Таквото кривично дело може да резултира со парична казна во висина до 7 000 евра, ако законот стапи на сила во средината на мај.
Минатата недела политичарите во Словачка гласаа за амандман за заштита на употребата на словачките државни симболи. Истиот беше предложен од страна на екстремно десничарската Словачка национална партија (СНС), како директен одговор на употребата на изменетиот симбол на новата униформа на хокеарскиот тим на земјата.
Но, голем број политичари не знаеја дека амандманот вклучува и член во кој се образложуваат предложените рестрикции за националните химни.
Новиот закон е особено штетен за малцинствата во Словачка – околу 9 отсто од населението во земјата се Унгарци.
Бела Бугар, водачот на Словачко-унгарската партија Мост-Хид, рече дека неговата партија гласала за амандманот по грешка.
„Имаше една одредба која не припаѓа на Европа во 21 век“, додаде тој во врска со членот за химните.
Партијата Прогресивна Словачка, исто така, повика на брзо решение, велејќи дека новиот закон „непотребно отвора националистичка карта“.
„За унгарското малцинство во нашата земја, химната е важен ритуал за одбележување на државните празници или верските церемонии“, напиша членот на партијата Мартин Дубеци.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Украина: Русите го нападнаа Харков, уништени се згради, меѓу повредените има и дете
Украина ги уништи сите 10 беспилотни летала во руски напад во текот на ноќта, но две лица се повредени, а станбени згради во регионот Харков беа зафатени од пожар, соопштија денеска украинските власти.
Воздухопловните сили на „Телеграм“ соопштија дека Русија лансирала и две противвоздушни наведувани ракети. Портпаролот на украинските воздухопловни сили во телевизиски пренос изјави дека руските ракети, најверојатно, биле насочени кон североисточниот град Харков.
Гувернерот на регионот Харков, Олех Синехубов, рече дека три станбени куќи биле запалени, а десетици биле оштетени како резултат на рускиот напад, чија цел, според него, биле и инфраструктурата и станбените области. На фотографиите што ги објави Синехубов на „Телеграм“ се гледаат големи пламени јазици од станбените згради.
„Две лица, меѓу кои и едно 11-годишно дете, се ранети во нападот и се на медицинска помош“, рече Синехубов на апликацијата „Телеграм“.
„Ројтерс“ сè уште не ја потврди независно оваа вест. Москва негира дека цели на цивили во овие „легитимни напади врз воената, енергетската и транспортната инфраструктура на Украина“.
Европа
Повредени двајца полицајци во Париз кога маж им го украл пиштолот и пукал во нив
Двајца полицајци се повредени во престрелка во полициската станица во Париз, кога на еден од нив му бил одземен пиштолот од маж кој претходно бил приведен поради напад со нож врз жена.
„Полицијата интервенираше и го донесе овде, во полициската станица, и тој потоа му го грабна пиштолот на полицаецот“, изјави началникот на полицијата Лорен Нунес.
Обвинителството соопшти дека еден од полицајците е во тешка состојба, пренесува „Монд“.
Полицијата возвратила, а напаѓачот се здобил со повреди во пределот на градниот кош, по што бил пренесен во болница.
Како што информираат од болницата, животот на напаѓачот не е во опасност.
Европа
Путин го избра премиерот
Рускиот претседател Владимир Путин предложи повторно именување на Михаил Мишустин за премиер во неговиот нов претседателски мандат, изјави утрово претседателот на Државната дума, долниот дом на рускиот парламент.
Откако Путин во вторникот положи заклетва за нов шестгодишен претседателски мандат, тамошната влада, според одредбите на рускиот Устав, поднесе оставка.
И додека во последните денови се шпекулираше дека може да има промени на некои важни и суштински позиции, а руските независни медиуми споменуваа евентуално заминување на Михаил Мишустин од премиерската позиција, Путин повторно го предложи за таа функција.
„Претседателот Владимир Владимирович Путин достави до Државната дума предлог за кандидатурата на Михаил Владимирович Мишустин за функцијата премиер. Денеска претставниците ќе донесат одговорна одлука за ова прашање во име на нивните гласачи“, изјави претседателот на Думата, Вјачеслав Володин на апликацијата Телеграм.
Ова е петти мандат на Путин на власт, а тој го номинираше Мишустин за премиер за прв пат во јануари 2020 година, кога Владата предводена од Дмитриј Медведев поднесе оставка по најавените важни уставни промени во политичкиот систем на земјата од страна на претседателот.
Мишустин, кој ќе зборува во Думата пред гласањето, мора да одговори како ќе реши низа задачи што Путин и ги постави на владата, вклучително и „зголемување на одбранбената способност на нашата земја“, рече Володин.