Европа
Тројца бомбаши самоубијци го планирале нападот во Есен

Тројца мажи планирале бомбашки напад врз трговскиот центар во Есен со активирање експлозиви во нивните ранци, пишуваат во понеделникот германските медиуми откривајќи поединости од споменатата закана поради којашто трговскиот центар во овој град беше затворен во текот на изминатиот викенд.
Германскиот весник Die Welt пишува дека осомничените планирале да го изведат нападот во трговскиот центар во Есен во 16,30 часот во саботата, 11-ти март. Весникот, исто така, наведува дека организатор бил 24-годишниот Имран Реме К. Од блискиот град Оберхаузен за кој се верува дека патувал во април 2015 година во Сирија преку Турција, за таму да се бори на страната на џихадистичката организација Исламска држава.
Германските власти наводно од 2015 година го имале под надзор како потенцијално опасно лице. Весникот Die Welt пишува дека тој преку социјалните мрежи врбувал неколку радикални исламисти за екстремистичката организација. Тој го одредил точното време и местото на нападот, рекле извори од обвинителството, а налогот за тоа го дал преку социјалните мрежи.
Трговскиот центар Лимбекер Плац во саботата беше евакуиран и ограден, откако полицијата објави дека од безбедносните агенции добила „многу конкретни докази“ за планиран напад. Полицијата објави дека во врска со планираниот напад биле испрашувани двајца мажи од блискиот град Оберхаузен, но оти во меѓувреме биле пуштени.
Центарот Лимберкер Плац е еден од најголемите трговски центри во Германија, а во саботите во просек го посетуваат околу 60.000 луѓе. Во меѓувреме центарот повторно беше отворен за посетителите./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Мелони застана во одбрана на Ле Пен: „Им се одземаат правата на милиони граѓани“

Италијанската премиерка Џорџа Мелони денеска ја критикува одлуката на францускиот суд со која ѝ се забранува на лидерката на екстремната десница, Марин Ле Пен, да се кандидира на претседателските избори во 2027 година.
„Не ги знам деталите за обвиненијата против Марин Ле Пен, ниту причините за ваквата сурова одлука, но мислам дека никој што се грижи за демократијата не може да се радува на пресуда што ќе влијае на лидерот на голема партија и ќе ги лиши правата на милиони граѓани“, рече Мелони во интервју за италијанскиот весник „Ил Месаџеро“.
Мелони, која важи за најмоќниот десничарски лидер во Европа, со оваа изјава застана во одбрана на француската политичарка, која во понеделникот од парискиот суд беше прогласена за виновна за проневера на средства на Европската Унија.
Ле Пен е осудена на четири години затвор, од кои две ќе поминат под електронски мониторинг во домашен притвор, а две години се условни. Покрај тоа, таа е казнета со 100.000 евра и забрана за учество на избори во следните пет години.
Европа
Земјотрес ја погоди Италија

Земјотрес со јачина од 3,8 степени според Рихтеровата скала е регистриран денес, вторник, 1 април 2025 година, во 3.30 часот во Италија.
Хипоцентарот на земјотресот, според податоците на Европско-медитеранскиот сеизмолошки центар, се наоѓа на длабочина од приближно 6 километри под површината на земјата.
Засега нема извештаи за материјална штета или повредени, а надлежните служби ја следат состојбата.
Европа
Од утре нови правила за Европејците за влез во Обединетото Кралство

На европските граѓани кои патуваат во Обединетото Кралство од утре ќе им треба дигитална пропусница за да влезат во земјата, што според британската влада ќе ја зајакне безбедноста на границите.
Електронското овластување за патување (ЕТА) може да се купи онлајн за 10 фунти (12 евра) во наредните денови, а од 9 април цената ќе се зголеми на 16 фунти (19 евра).
Дозволата ќе биде задолжителна за сите Европејци кои сакаат да ја посетат Велика Британија од 2 април, откако истата пропусница беше воведена во јануари за граѓаните на САД, Канада и други земји на кои не им е потребна виза.
Слична дозвола за влез во земјата имаат и САД.
„Со дигитализирање на системот за имиграција, го отвораме патот за бесконтактни гранични премини во ОК“, рече министерката за миграција Сема Малхотра претходно овој месец, кога беше отворена веб-страницата за првите апликации.
Таа додаде дека проширувањето на ЕТА во земјите ширум светот „ја зајакнува посветеноста за подобрување на безбедноста преку технологија и иновации“.
Документот дозволува посети до шест месеци и важи две години. Тоа е задолжително за сите патници, вклучително и малолетни и новороденчиња.
Пропусницата може да се добие од апликација за паметни телефони или од владината веб-страница, а на Европејците им е достапна од почетокот на март.
Почнувајќи од среда, граѓаните на околу триесет европски земји, вклучително и целата ЕУ со исклучок на Ирска, ќе треба да имаат електронска дозвола за влез во Обединетото Кралство, кое ја напушти ЕУ во 2020 година. Апликантот мора да приложи фотографија од пасош и од лицето. Процесот трае околу десет минути, информираат од британското Министерство за внатрешни работи.
Во повеќето случаи, одлуката за апликацијата се носи во рок од неколку минути, но можно е да се чека и до три работни дена, велат од Владата.
Доколку апликацијата се обработи успешно, ЕТА е дигитално поврзана со пасошот на апликантот.
Патниците кои претстојуваат на аеродроми без да ја поминат границата со ОК се ослободени од оваа програма. Ова беше направено по притисокот од Хитроу, најпрометниот аеродром во Европа, кој стравуваше од губење на бројот на патници.