Европа
Шпанците очајни поради зголемените кирии на становите: „Ова е хорор, сопствениците полудеа“
Милиони Шпанци се соочуваат со зголемените кирии за изнајмување станови бидејќи на пазарот со мала понуда многу сопственици ги издаваат своите простори на туристи, предупредуваат станарите и нивниот синдикат. „Ова е хорор. Не можете да најдете ништо пристојно под 600 евра месечно, без разлика дали тоа е мало студио или стан што го делите со други луѓе“, вели 36-годишната Елиса, која дошла да живее во Мадрид во август бидејќи таму се вработила во државната служба.
Барселона има најскапа кирија меѓу градовите, каде што во просек е потребно да се плати 19,2 евра за квадратен метар, а во главниот град Мадрид цената е 17,4 евра, покажуваат податоците за август на компанијата за недвижности „Идеалиста“. Следуваат крајбрежниот баскиски град Сан Себастијан и летните одморалишта Марбела и Палма де Мајорка. За да изнајмите стан од 90 квадратни метри во Барселона, потребно е да платите 1.746 евра месечно, а во Мадрид – 1.566 евра. И во двата случаја цената ја надминува месечната минимална бруто-плата од 1.080 евра.
Првите три недели по пристигнувањето во Мадрид, Елиса ги поминала во просторот на црквата наменет за студенти, кои биле на летен одмор, каде што платила 330 евра. Таа потоа барала сместување преку онлајн-агенциите „Идеалиста“ и „Фотоказа“. „Ми понудија станови што ќе ги делам со 4, 5 или 6 луѓе, со една бања. Или некаков стан без прозорци со чудни луѓе“, вели таа за „Хина“.
„Сопствениците само полудеа“, се жали Елиса. Речиси 15,9 отсто од Шпанците живееле во стан под кирија во 2011 година, а 13,5 отсто од нив живееле на овој начин десет години порано, покажуваат најновите податоци на шпанската статистичка служба. Повеќе од 7,7 милиони луѓе во 3 милиони станови сега плаќаат кирија на станоиздавачите.
Речиси 48,7 отсто од Шпанците како Елиса се на прагот на сиромаштија бидејќи половина од нивниот приход оди за плаќање кирија. Шпанија, заедно со Литванија, каде што 40 отсто од станарите одвојуваат над 40 отсто од својот приход за кирија, е на самиот врв во Европската Унија според бројот на такви сиромашни граѓани, покажуваат податоците на статистичката служба „Ервостат“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Украина: Русите го нападнаа Харков, уништени се згради, меѓу повредените има и дете
Украина ги уништи сите 10 беспилотни летала во руски напад во текот на ноќта, но две лица се повредени, а станбени згради во регионот Харков беа зафатени од пожар, соопштија денеска украинските власти.
Воздухопловните сили на „Телеграм“ соопштија дека Русија лансирала и две противвоздушни наведувани ракети. Портпаролот на украинските воздухопловни сили во телевизиски пренос изјави дека руските ракети, најверојатно, биле насочени кон североисточниот град Харков.
Гувернерот на регионот Харков, Олех Синехубов, рече дека три станбени куќи биле запалени, а десетици биле оштетени како резултат на рускиот напад, чија цел, според него, биле и инфраструктурата и станбените области. На фотографиите што ги објави Синехубов на „Телеграм“ се гледаат големи пламени јазици од станбените згради.
„Две лица, меѓу кои и едно 11-годишно дете, се ранети во нападот и се на медицинска помош“, рече Синехубов на апликацијата „Телеграм“.
„Ројтерс“ сè уште не ја потврди независно оваа вест. Москва негира дека цели на цивили во овие „легитимни напади врз воената, енергетската и транспортната инфраструктура на Украина“.
Европа
Повредени двајца полицајци во Париз кога маж им го украл пиштолот и пукал во нив
Двајца полицајци се повредени во престрелка во полициската станица во Париз, кога на еден од нив му бил одземен пиштолот од маж кој претходно бил приведен поради напад со нож врз жена.
„Полицијата интервенираше и го донесе овде, во полициската станица, и тој потоа му го грабна пиштолот на полицаецот“, изјави началникот на полицијата Лорен Нунес.
Обвинителството соопшти дека еден од полицајците е во тешка состојба, пренесува „Монд“.
Полицијата возвратила, а напаѓачот се здобил со повреди во пределот на градниот кош, по што бил пренесен во болница.
Како што информираат од болницата, животот на напаѓачот не е во опасност.
Европа
Путин го избра премиерот
Рускиот претседател Владимир Путин предложи повторно именување на Михаил Мишустин за премиер во неговиот нов претседателски мандат, изјави утрово претседателот на Државната дума, долниот дом на рускиот парламент.
Откако Путин во вторникот положи заклетва за нов шестгодишен претседателски мандат, тамошната влада, според одредбите на рускиот Устав, поднесе оставка.
И додека во последните денови се шпекулираше дека може да има промени на некои важни и суштински позиции, а руските независни медиуми споменуваа евентуално заминување на Михаил Мишустин од премиерската позиција, Путин повторно го предложи за таа функција.
„Претседателот Владимир Владимирович Путин достави до Државната дума предлог за кандидатурата на Михаил Владимирович Мишустин за функцијата премиер. Денеска претставниците ќе донесат одговорна одлука за ова прашање во име на нивните гласачи“, изјави претседателот на Думата, Вјачеслав Володин на апликацијата Телеграм.
Ова е петти мандат на Путин на власт, а тој го номинираше Мишустин за премиер за прв пат во јануари 2020 година, кога Владата предводена од Дмитриј Медведев поднесе оставка по најавените важни уставни промени во политичкиот систем на земјата од страна на претседателот.
Мишустин, кој ќе зборува во Думата пред гласањето, мора да одговори како ќе реши низа задачи што Путин и ги постави на владата, вклучително и „зголемување на одбранбената способност на нашата земја“, рече Володин.