Европа
Белгиски министер поправо ќе плаќа казна отколку да прими сириско семејство

Белгискиот министер за имиграција изјави во четвртокот дека е попрво подготвен да го продаде канцеларискиот мебел за да плаќа дневни казни отколку да одобри туристички визи за семејство од Алепо.
Со ваквата изјава министерот на Белгија за имиграција Тео Франкен ги разгневи адвокатите на семејството кое сака да побегне од северниот сириски град Алепо каде во моментов се водат жестоки битки меѓу владините сили и различните бунтовнички групи во обидите на првите да го заземат целиот град а на вторите да ги деблокираат своите соборци кои се во опсада во источните делови од вториот по големина град во Сирија.
„Се става над законот“, изјави адвокатот Тома Митевоа за дневниот весник La Dernière Heure (DH), откако споменатиот министер, кој важи како фламански националист, изјави дека ќе дозволи судот да му ја испразни канцеларијата попрво отколку да плаќа 4.000 евра на ден колку судот му одреди на неговото министерство да плаќа сé додека не издаде четири визи.
Сириец од Алепо побара во белгискиот конзулат во Либан туристичка виза за себе, сопругата и две деца, бидејќи сместување во Белгија му понудило едно семејство коешто го запознал. Кога бил одбиен, неговиот несуден белгиски домаќин случајот го дал на суд и ја доби пресудата.
Франкен, меѓутоа, тврди дека примањето на сириското семејство преку туристичка виза би претставувало опасен преседан и дека би следел бран слични барања, па вложи жалба на судската пресуда.
„Добро се носевме со азилантската криза и работите се под контрола. Нема ширум да ги отвораме нашите врати преку нашите амбасади и конзулати“, изјави Франкен за медиумите.
Белгија, којашто има 11 милиони жители, имала околу 7.500 барања за азил само од Сиријци минатата 2015 година, кога досега незапаметен број луѓе од северна Африка, Блискиот и Далечниот исток побараа засолниште од сиромаштијата и војните во земјите од Европската унија./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Мечка уби човек во Словачка, владата одобри убивање на четвртина кафеави мечки

Владата на Словачка го одобри планот за отстрел на околу четвртина од кафените мечки во земјата, откако еден човек беше изгризан до смрт додека шеташе во шума во централна Словачка, јавува Би-би-си.
Популистичко-националистичката влада на премиерот Роберт Фицо по состанокот на владата објави дека 350 од околу 1.300 кафеави мечки ќе бидат застрелани, наведувајќи ја опасноста за луѓето по серијата напади.
„Не можеме да живееме во земја во која луѓето се плашат да влезат во шума“, изјави премиерот на новинарите по средбата.
Специјалната вонредна состојба која дозволува пукање на мечки сега е проширена во 55 од вкупно 79 окрузи во Словачка, што значи дека го покрива најголемиот дел од земјата.
Владата во Братислава веќе ја олабави законската заштита за мечките, дозволувајќи им да бидат застрелани ако се премногу блиску до населени места. До крајот на 2024 година беа убиени 93 мечки. Плановите за дополнителни убиства беа осудени од оние кои тврдат дека таквата одлука е спротивна на меѓународните обврски и потенцијално незаконска.
Европа
Од денеска на европските граѓани им треба еден документ за влез во Британија, позната цената на пропусницата

Европските граѓани кои патуваат во Обединетото Кралство од денеска ќе имаат потреба од дигитална пропусница за влез во земјата, што според британската влада ќе ја зајакне безбедноста на границите.
Електронското овластување за патување (ЕТА) може да се купи онлајн за 10 фунти (12 евра) во наредните денови, а од 9 април цената ќе се зголеми на 16 фунти (19 евра).
Дозволата ќе биде задолжителна за сите Европејци кои сакаат да ја посетат Велика Британија од 2 април, откако истата пропусница беше воведена во јануари за граѓаните на САД, Канада и други земји на кои не им е потребна виза.
Слична дозвола за влез во земјата имаат и САД.
„Со дигитализирање на системот за имиграција, го отвораме патот за бесконтактни гранични премини во ОК“, рече министерката за миграција Сема Малхотра претходно овој месец, кога беше отворена веб-страницата за првите апликации.
Таа додаде дека проширувањето на ЕТА во земјите ширум светот „ја зајакнува посветеноста за подобрување на безбедноста преку технологија и иновации“.
Документот дозволува посети до шест месеци и важи две години. Тоа е задолжително за сите патници, вклучително и малолетни и новороденчиња.
Пропусницата може да се добие од апликација за паметни телефони или од владината веб-страница и е достапна за Европејците од почетокот на март.
Почнувајќи од среда, граѓаните на околу триесет европски земји, вклучително и целата ЕУ со исклучок на Ирска, ќе треба да имаат електронска дозвола за влез во Обединетото Кралство, кое ја напушти ЕУ во 2020 година.
Апликантот мора да приложи фотографија од пасош и од лицето. Процесот трае околу десет минути, информираат од британското Министерство за внатрешни.
Во повеќето случаи, одлуката за апликацијата се носи во рок од неколку минути, но можно е да се чека и до три работни дена, велат од Владата.
Доколку апликацијата се обработи успешно, ЕТА е дигитално поврзана со пасошот на апликантот.
Патниците кои се префрлаат на аеродроми без да ја поминат границата со ОК се ослободени од оваа шема. Ова беше направено по притисокот од Хитроу, најпрометниот аеродром во Европа, кој стравуваше од губење на бројот на патници.
Има само два аеродрома во ОК со можност за поврзување без преминување на границата, Манчестер и Хитроу. Во 2024 година, речиси 84 милиони патници поминаа низ Хитроу, од кои една третина беа од ЕУ.
Програмата беше лансирана во 2023 година за Катар, а потоа се прошири во пет соседни земји од Персискиот Залив.
Во јануари, тој беше проширен на граѓаните на дополнителни педесет земји, вклучувајќи ги Аргентина, Јужна Кореја и Нов Зеланд.
До крајот на 2025 година, речиси 1,1 милион посетители ќе добијат ЕТА, според Министерството за внатрешни работи на Британија.
Не е потребна дозвола за луѓе со дозволи за престој во ОК или луѓе кои веќе имаат имиграциски статус во Кралството.
Европа
Зеленски објави колку заработил лани: приходите му се зголемени во однос на 2023 година

Украинскиот претседател Володимир Зеленски објави декларација за имотот, приходите, трошоците и за финансиските обврски на неговото семејство за 2024 година.
Системот на задолжителни електронски изјави за имотот на јавните службеници беше воведен во 2014 година како дел од борбата на Украина против корупцијата. По суспендирањето на почетокот на војната, Зеленски потпиша закон во октомври 2023 година со кој се вратија задолжителните декларации, пишува „Киев индипендент“.
Според последните податоци, приходот на семејството Зеленски во 2024 година бил 15.286.193 гривни (368.556 долари), вклучувајќи 8.585.532 гривни (207.000 долари) од продажба на државни обврзници. Другите приходи се состојат од претседателската плата, банкарските камати и приходите од издавање сопствен недвижен имот.
„Зголемувањето на приходите на семејството на претседателот на Украина во однос на претходната година се должи на продолжувањето на целосната исплата на киријата“, соопшти прес-службата.
„Немаше други значајни промени во имотот, недвижниот имот или возилата на семејството на претседателот минатата година“, додаваат тие.
Зеленски и членовите на неговото семејство пријавиле приход од 316.700 долари во 2023 година.