Европа
Блер: Ја прифаќам одговорноста, но Садам требаше да биде отстранет

Поранешниот британски премиер Тони Блер без никаква ограда ја прифаќа одговорноста за сите грешки сторени во текот на инвазијата врз Ирак во 2003 година, но и натаму е убеден дека било потребно да се отстрани Садам Хусеин од власта.
Обраќањето на поранешниот британски премиер Тони Блер дојде по објавувањето на извештајот на комисијата предводена од сер Џон Чилкот која по седумгодишна работа утврдила дека инвазијата на Велика Британија врз Ирак не била неопходна и погрешна и во војна се тргнало пред да бидат исцрпени сите мирољубиви решенија, и со неточни разузнавачки податоци за наводно постоење оружје за масовно уништување.
Одлуката Велика Британија да ѝ се приклучи на инвазијата предводена од САД не била ниту одблизу правно заснована, а заложбите на тогашниот премиер Тони Блер за воена акција биле пренагласени, изјави претседателот на истражната комисија Чилкот.
„Без разлика дали луѓето се согласуваат со мојата одлука или не, ја донесов во добра верба и во уверување дека го правам она што е најдобро за мојата земја“, изјави Влер во кусото соопштение по објавувањето на извештајот.
Комисијата не нашла никакво лажиран доказ, измама на членови на владата или тајно верување на американскиот претседател да се оди во војна, истакна Блер.
„Со овој извештај засекогаш би требало да бидат отстранети обвинувањата дека станува збор за лоша намера, лаги и измами. За сите грешки ја преземам целосната одговорност без никаква ограда“, заклучи Блер најавувајќи дека ќе следи негов детален одговор на наодите на комисијата.
„И натаму верувам дека беше подобро да се отстрани Садам Хусеин и дека тоа не е причината за тероризмот кој денес го гледаме насекаде низ светот. Над сé им одавам признание на нашите вооружени сили и изразувам длабоко жалење за губењето животи и болката која со тоа им е предизвикана на семејствата“, изјави поранешниот британски премиер.
Тони Блер беше своевремено еден од најпопуларните британски премиери во историјата, сé додека неговото реноме бесповратно не се урниса со одлуката својата земја да ја втурне во војната во Ирак.
Во средата, по објавениот извештај кој во најмала рака ги доведува во прашање неговите одлуки за почнување на војната и безусловната поддршка за тогашниот американски претседател Џорџ Буш, неговиот углед падна уште пониско. Ниту 13 години по интервенцијата во Ирак, таа не му е простена и во јавноста повторно Тони Блер го нарекуваат лажго и воен злосторник.
Тони Блер беше станар на Даунинг стрит 10, резиденцијата на британскиот премиер, цели десет години, во периодот од 1997 до 2007 година, откако трипати победи на изборите во атмосфера и економски напредок.
Харизматичен и сјаен говорник и шармер, Ентони Чарлс Линтон Блер роден во мај 1953 во Единбург во семејство на виша класа. Парламентарен пратеник првпат станува во триесеттата, а на чело на лабуристите доаѓа во 1994 година, партија којашто ја трансформираше од дното до врвот и ја врани на власт по 18 години опозиција. Првенец на ткн „трет пат“, премиер станува во 43-та година, како најмлад претседател на влада во Британија во речиси 200 години.
Повеќе прагматичен отколку идеолог, Блер со одличен политички инстинкт ја перципираше глобализацијата како можност и успеа да го поврзе економскиот либерализам со подобри јавни услуги.
Во времето на неговите мандати Шкотска и Велс веќе добија поголема автономија, склучен е мирот во Северна Ирска, легализирани се истполовите бракови и усвоени се построги мерки за борбата против тероризмот.
Нападите од 11-ти септември 2001 година врз САД за Блер претставувале пресвртница во надворешната политика. Некритични се согласил со сите ставови на американскиот сојузник Џорџ В. Буш, до таа мера што го нарекуваа негова пудличка. Ги испрати британските војници во инвазиите врз Авганистан и врз Ирак.
Милиони луѓе протестираа на улиците на Лондон и другите британски градови и го обвинуваа дека лажел за постоењето на ирачкото оружје за масовно уништување. Блер подоцна се извини за погрешните информации коишто наводно му ги дале разузнавачките служби и за загубата на животите на 179 британски војници во војната во Ирак.
Успеа да ги добие изборите во 2005 година, но тоа беше со кус здив. Во јули истата година Лондон беше нападнат од терористите кои убија 52 лица. Две години подоцна, и две години пред истекувањето на мандатот, Блер под притисок му го препушта Гордон Браун, кусо пред избувнувањето на глобалната економска криза.
Од тогаш Тони Блер се преобрати во катоцилизам, татко на четири деца, стои подалеку од британската политика и главно времето го минува во странство наплаќајќи за совети на странски челници./крај/мф/сн
Извор: Reuters
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Зеленски: Подготвени сме да купиме 10 системи „Патриот“, само треба да најдеме средства

Украина работи на обезбедување испорака на десет системи за воздушна одбрана „Патриот“, а исто така е важно системите веднаш да пристигнат со ракетите, изјави украинскиот претседател Володимир Зеленски, како што објави УНН.
„Имаме барање за десет системи. Ова го кажав јавно. Моментно работиме со партнери за да ги обезбедиме овие десет. Исто така, работиме на прашањето за ракетите, ги имаме“, рече Зеленски.
Украинскиот претседател додаде и дека САД ќе ѝ продадат системи „Патриот“ на Украина. Украина мора да најде средства за сите десет системи.
„Трамп, претседателот на САД, ќе ни ги пренесе системите, ќе ни ги продаде. Наша задача е да најдеме пари за сите десет системи. Би сакале веднаш да имаме пакет ракети за секој систем“, истакна претседателот.
Тој исто така истакна дека Германија моментно ја потврдила испораката на два система „Патриот“, а Норвешка – еден.
„Официјално добив потврда од Германија за два система, од Норвешка – еден. Сега работиме со холандски партнери“, додаде Зеленски.
Фото: принтскрин
Европа
(Видео) Макрон тужи американска конзервативка, која тврди дека Брижит е маж

Францускиот претседател Емануел Макрон и неговата сопруга Брижит поднесоа тужба против Американката Кандис Овенс поради тврдење дека првата дама на Франција е, всушност, маж.
Тужбата е поднесена во американската држава Делавер и содржи 22 точки од обвинението, а двојката бара парична отштета за клевета и отштета.
Кандис е конзервативна авторка, водителка, политички коментатор и активистка. Таа е позната по својата активна поддршка на Трамп за време на неговиот последен мандат. Сепак, неодамна јавно се дистанцира од него. Таа постојано изјавуваше дека тој ја разочарал и дека сега „се срами што некогаш го поддржувала“. Таа ги критикува неговите политички потези и го обвини дека ги предаде принципите што тој вети дека ќе ги брани.
Според адвокатот на Макрон, Том Клер, францускиот претседател и неговата сопруга повеќе од една година безуспешно се обидуваат да ја спречат Овенс, која шири теории на заговор за Брижит на социјалните медиуми и на „Јутјуб“.
Во март оваа година Овенс објави видео со наслов „Дали првата дама на Франција е маж?“, кое беше масовно споделувано на платформата „Икс“. Во него таа тврдеше дека тоа е „најголемиот политички скандал во историјата“.
Потоа таа продолжила да објавува содржини за Брижит вклучувајќи серија видеа наречени „Станувајќи Брижит“. Таа исто така продавала маички со слогани што ја промовираат теоријата, според тужбата. Емануел и Брижит тврдат дека Овенс била повеќе пати замолувана да престане да ги изнесува овие тврдења и ѝ дале докази дека Брижит е родена како жена по име Брижит Троње, дека не е во роднинска врска со Емануел Макрон и дека тие не се под никакво влијание, како што инсинуира Овенс.
„Ова не е само политички удар. Ова е лично. И двајцата се човечки суштества, имаат брак, семејства и чувства. И ова ги засега“, изјави адвокатот Клер за Си-ен-ен.
Во тужбата се тврди дека Макрон и неговата сопруга претрпеле сериозни штети – нивната приватност, углед и деловните можности биле нарушени. „Секојпат кога ќе ја напуштат куќата, тие знаат дека многу луѓе веруваат во овие лаги. Тоа е понижувачки, инвазивно и, едноставно, неправедно“, се вели во документот.
Овенс сè уште продолжува
Кога дознала за тужбата, Овенс се појавила на „Јутјуб“. Таа објавила видео, во кое, меѓу другото, рекла дека е подготвена да ја добие оваа војна. „Мажот Брижит очигледно има многу храброст“, рекла таа.
Таа исто така објави фотографија од двојката Макрон на „Инстаграм“ со порака: „Денес ќе ја земам оваа перика. Останете со мене“. Подоцна, на „Јутјуб“ изјави дека тужбата е „очаен обид да се спаси нејзиниот имиџ“.
Брижит Макрон се соочила со слични обвинувања и претходно – во 2022 година таа тужеше две жени во Франција, кои ширеа слични дезинформации. Првично ја доби пресудата, но случајот сега е вратен на повисок суд.
Фото: принтскрин
Европа
(Видео) Се урна патнички авион во Русија

Авион „ан-24“ на „Ангара ерлајнс“, со најмалку 40 патници, се урна во руската област Амур, на далечниот исток од земјата.
Остатоците од патничкиот авион се пронајдени на 15 километри од Тинда, планираната дестинација. SHOT објаснува дека хеликоптерот за пребарување не можел да слета во близина на местото на несреќата, па затоа спасувачите ќе мора да стигнат таму пеш.
✈️🚨 Passenger plane crashes in Russia’s Amur region — over 40 people on board
A Soviet-made Antonov An-24 aircraft operated by Angara Airlines disappeared from radar near the town of Tynda while attempting a second landing approach. Emergency crews later found the burning… pic.twitter.com/MOO08NTbEP
— NEXTA (@nexta_tv) July 24, 2025
„РИА новости“, повикувајќи се на извори, пишува дека, според прелиминарните податоци, нема преживеани.
Гувернерот на регионот, Василиј Орлов, изјави дека, според прелиминарните податоци, во авионот имало 43 патници, меѓу кои пет деца и шест члена на екипажот.
Министерството за вонредни ситуации го процени бројот на луѓе во авионот малку помал, на 40-ина.
Фото: принтскрин