Владата на самопрогласената Народна Република Донецк во истоимената источна област на Украина каде што мнозинство е рускојазичното население, веќе не се согласува со федерализација на земјата, изјави премиерот Александр Захарченко.

Ова е првото јавно истапување во овој правец откако во март избувна прорускиот бунт кога источните региони го истакнаа барањето за федерализација на земјата при што регионите би имале поголема самостојноста и властите во Киев не би можеле да ги поставуваат регионалните власти.

„Федерализацијата не ни одговара. Донецката народна република смета само на сопствената независност од Украина… Новорусија веќе не се согласува не само со федерализацијата, туку и со зачувувањето на сегашната Украина како таква“, изјавил Алеснадр Захарченко, инаку етнички Украинец кој од неодамна дојде на чело на бунтовничките власти во Донецк, кого го цитира официјалниот сајт на бунтовниците dnrespublika.info.

Захарченко притоа истакнал дека под никакви услови властите на ДНР не се согласни ниту на примирје, ниту на преговори со Киев. „Во моментов се согласија да преговараат, без разлика дали тоа ќе биде постигнато во Минск, или кусо време по Минск (и тешкиот воен пораз на источниот фронт), во принцип ништо нема да промени. Нема, во крајна линија, преговори што ќе започнат и на нив да е можно да биде постигнато какво и да е примирје, тоа ќе биде кревко и нереално“, рекол Захарченко.

Во вторникот во белоруската престолнина Минск се водеа преговори меѓу земјите од Царинската унија (Русија, Белорусија и Казахстан), Владимир Путин, Александр Лукашенко и Нурсултан Назарбаев, претседателот на Украина, Петро Порошенко, и високата претставничка на ЕУ за надворешна и безбедносна политика, Кетрин Ештон. Средбата особено беше посветена на разгледувањето можности за решавањето на вооружениот конфликт во источна Украина, во кој во текот на четири месеци загинаа повеќе од две илјади луѓе.

Прашањето на федерализација на Украина беше допрено и во саботата при посетата на германската канцеларка Ангела Меркел на Киев. Имено, во интервјуто за весникот Welt am Sonntag објавено токму на денот кога канцеларката Меркел престојува во официјална посета на Украина, нејзиниот заменик Зигмар Габриел, покрај тоа што рече дека е приоритет да се спречи директен воен судир меѓу Украина и Русија, се зазема за воведување федерален систем во Украина, по завршувањето на вооружениот конфликт во источните региони на земјата.

„… Мораме да ја развиеме идејата за процесот на помирување кој би можел да биде покренат по завршувањето на воениот суди во источна Украина. Територијалната целост на Украина може да биде сочувана само доколку нешто им се понуди на регионот со руско мнозинство. Разумен концепт на федерализација изгледа како единствениот начин“, вели во интервјуто германскиот вицеканцелар. Габриел така стана првиот висок германски политичар кој ја понуди федерализацијата на Украина како можно решение на кризата.

Меркел одговарајќи за изјавата на Габриел рече дека Германија го поддржува планот на претседателот Порошенко за децентрализација на власта во Украина, повторно обидувајќи се да ја појасни изјавата на вицеканцеларот за федерализација. „Тоа што ние го подразбираме под федерализација, во Украина го нарекуваат децентрализација. И тоа е она што го сака претседателот. Тоа претставува важен чекор со цел рускојазичното население да почувствува дека и’ припаѓа на Украина. И јас сметам дека тој процес нужно мора да продолжи“, додаде појаснувајќи дека во Украина тоа се поврзува со поголем степен на независност „што во никој случај не го сакаме“.

Во почетокот од бунтот на проруските региони каде над 78 отсто од населението се изјаснува дека рускиот му е мајчин јазик, кој започна откако прозападните власти во Киев го укинаа законот за јазиците со кој рускиот јазик го загуби статусот на официјален, во почетокот бараа федерализација и поголема автономија на регионите каде што се мнозинство. Потоа тие одржаа референдум при што прогласија таканаречен Народни Републики во Донец и Лугaнаск, кои се поврзаа во „државна заедница“ Новорусија./крај/мф/сн

Извор: Макфакс