Европа
Ердоган ја обвини Меркел дека не го спречила гласањето за ерменскиот геноцид

Турскиот претседател Реџеп Тајип Ердоган остро во саботата ја критикуваше германската канцеларка Ангела Меркел бидејќи не го сопрела гласањето во германскиот парламент со коешто погромот на Ерменците од 1915 година е прогласен за геноцид и не исклучи рестриктивни мерки кон Германија.
Ердоган кажа дека не разбира зошто Меркел не успеала да ја убеди својата партија, владејачката демохристијанска унија CDU/CSU да гласа против резолуцијата, тврдејќи дека таа ветила дека ќе го стори сето она што е во нејзина моќ за да го спречи гласањето.
„Сега се чудам: како по таквата одлука германските челници ќе се соочат со мене и со нашиот премиер“, изјави турскиот претседател Реџеп Тајип Ердоган во интервјуто објавено во саботата во неколку дневни весници, вклучително и секогаш политички воздржаниот Hurriyet и во провладиниот Yeni Safak.
Ердоган одбива да појасни со кои мерки Турција ќе возврати, но засега ништо не исклучува, додавајќи дека владата уште ја разгледува ситуацијата. Анкара веќе го отповика својот амбасадор во Берлин.
Турскиот претседател предупредува дека Германија би можела да загуби „важен пријател“ и истакнува дека во оваа земја живее голема турска популација.
Ердоган инсистира дека на тоа дека гласањето било турско-германско прашање и дека не е поврзано со поширокиот договор со Европската унија за запирање на мигрантскиот бран кон западна и северна Европа.
Останува силно критичен во поглед на европското напредување во спроведувањето на договорот, вклучително и во поглед на префрлањето на ветените шест милијарди евра помош за бегалците згрижени во Турција. Предупреди и дека договорот се уште може да биде запрен.
Клучен момент во договорот е влегувањето на турските државјани во ЕУ без визи што требаше да се реализира до крајот на јуни, но е во застој поради тоа што Турција одбива да го измени антитерористичкиот закон во согласност со барањата на Брисел кој смета дека е премногу широк и може да се применува со злоупотреби.
Долниот дом на германскиот парламент – Бундестагот, во четвртокот со огромно мнозинство присутни, со еден глас против и еден воздржан ја прифати резолуцијата дека страдањата на Ерменците од страна на војската на Османлиското царство во текот на Првата светска војна кое тогаш било сојузник на Царството Германија, се прогласува за геноцид.
Ерменците проценуваат дека околу 1,5 милиони припадници на нивниот народ се систематски убивани кон крајот на Отоманската империја, а многу историчари и повеќе од дваесет земји, меѓу нив и Франција, Италија и Русија, го признаваат геноцидот.
Турција тврди дека станувало збор за граѓанска војна која ја следела глад, во која загинале од 300.000 до 500.000 Ерменци но исто толку и Турција, како и дека не постоела организирана кампања за да бидат истребени Ерменците или оти постоеле такви наредби од страна на османските власти./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Украина припаѓа на Европската Унија, му рече данската премиерка на Зеленски

Претседателот на Украина, Володимир Зеленски, пристигна во Орхус, западна Данска, каде што ќе присуствува на одбележувањето на почетокот на данското претседателство со Советот на Европската Унија.
Според најавата на данската влада, Зеленски ќе разговара со премиерката Мете Фредериксен, претседателката на Комисијата, Урсула фон дер Лајен, и со претседателот на Европскиот совет, Антонио Коста.
Тие ќе разговараат за поголема воена поддршка за Украина, соработка со украинската одбранбена индустрија и нови санкции против Русија.
„Украина припаѓа на Европската Унија, тоа е во интерес и на Данска и на Европа. Затоа данското претседателство ќе направи сè што може за да ѝ помогне на Украина на патот кон членство во ЕУ“, рече Фредериксен.
Данската премиерка истакнува дека ЕУ мора да ја зајакне Украина и да ја ослаби Русија.
„Украина е клучна за безбедноста на Европа. Мора да го зголемиме притисокот врз Русија“, рече Фредериксен.
Европа
Анкета: Германците сакаат да го укинат пиењето под надзор кај тинејџерите

Мнозинството Германци сакаат построги закони за заштита на младите од алкохол, вклучително и елиминација на контролирано пиење, што им овозможува на 14-годишниците да нарачаат пиво во бар ако се во придружба на законски старател, покажува анкета објавена денес.
Резултатите од анкетата на „Форса“, нарачана од компанијата за здравствено осигурување Kaufmännische Krankenkasse (KKH), покажуваат дека 65 проценти од Германците ја поддржуваат забраната за контролирано пиење алкохол од страна на малолетници. Според сегашниот закон, на тинејџерите им е дозволено да купуваат и да пијат пиво, вино и пијалаци на база на вино на јавно место ако се во придружба на старател.
Тесно мнозинство од 52 процента од испитаниците исто така сакаат да се зголеми законската возраст за купување и пиење алкохол од 16 на 18 години. Анкетата, спроведена во јуни, опфати 1.004 испитаници од цела Германија на возраст меѓу 18 и 70 години.
Забраната за контролирано пиење ја застапуваат и покраинските министри за здравство, а ја поддржува и федералната министерка за здравство, Нина Варкен. Алкохолот е значаен проблем за децата и за тинејџерите, изјави Катарина Шенк, министерка за здравство во источногерманската покраина Тирингија и претседателка на Конференцијата на министрите за здравство.
Медицинските здруженија долго време апелираат до креаторите на здравствените политики да вложат поголеми напори за намалување на потрошувачката на алкохол во Германија. Германското здружение за исхрана препорачува целосна апстиненција од алкохолни пијалаци наведувајќи дека „не постои безбедно ниво на потрошувачка“.
„Колку порано младите луѓе почнуваат да пијат, толку се поголеми здравствените ризици“, вели психологот на KKH, Франциска Клем.
Покрај краткорочните последици, како што се несреќи, повреди и насилство, алкохолот го зголемува и ризикот од рак, кардиоваскуларни заболувања и заболувања на црниот дроб. Алкохолот е особено штетен за адолесцентите бидејќи нивните тела сè уште се во развој и затоа се почувствителни на неговите токсични ефекти, објавува агенцијата ДПА.
Европа
Украински функционер: Европа прави сè што може, но ќе биде тешко без американско оружје

Украина ги повика САД да продолжат со „континуираната“ воена помош, по изненадувачката најава дека некои испораки на оружје за Киев ќе бидат запрени, додека Вашингтон се обиде да го намали значењето на паузата.
Тоа е сериозен удар за Украина во време кога Русија ги засилува нападите во отсуство на дипломатски напредок за решавање на конфликтот. Американскиот претседател Доналд Трамп му се обраќа на рускиот претседател Владимир Путин од јануари, обидувајќи се да изврши притисок врз него да ги запре борбите, но без да постигне конкретен напредок.
Вчера, сосема неочекувано, неговата администрација објави дека престанала да испорачува одредени видови оружје во Киев, официјално поради загриженост за намалувањето на залихите на муниција во САД, од каде што доаѓа најголемиот дел од воената помош за Украина од почетокот на руската инвазија во февруари 2022 година.
Американските претставници вчера се обидоа да го минимизираат влијанието на потегот, без да дадат детали. „Министерството за одбрана продолжува да му презентира опции на претседателот во врска со воената помош за Украина, во согласност со целта за завршување на оваа трагична војна“, изјави портпаролот на Пентагон, Шон Парнел, за новинарите.
Портпаролката на Стејт департментот, Тами Брус, на брифингот изјави дека „ова не е суспензија на американската помош за Украина или испораката на оружје“, туку „изолиран инцидент“.
Оружјето, муницијата и опремата од Соединетите Американски Држави, како и разузнавачките информации, им овозможија на украинските сили да ги сопрат руските трупи, кои окупираа речиси 20 проценти од украинската територија. Украина останува зависна од американските испораки на оружје, изјави за АФП висок украински воен функционер.
„Европа прави сѐ што може, но ќе ни биде тешко без американска муниција“, додаде тој. Синоќа, украинскиот претседател Володимир Зеленски рече дека Вашингтон и Киев се обидуваат да ги „разјаснат сите детали“ во врска со воената помош што Соединетите Американски Држави сè уште ја обезбедуваат. „Продолжената американска помош за нашата одбрана и нашиот народ е во наш заеднички интерес“, рече тој.