Германија и уште три земји членки на ЕУ градат нова алијанса која има за цел да обезбеди пристап до вакцини против коронавирусот, откако тие ќе бидат достапни.

Целта е да се осигура дека тие се фер дистрибуирани низ целиот свет, објави весникот „Ханделсблат“.

Весникот го цитира германскиот министер за здравство, Јенс Шпан, и неговите колеги од Франција, Италија и Холандија, кои во писмо до Европската комисија велат дека пристапот до вакцините е едно од најитните прашања со кои треба да се занимава Европската Унија, пренесе агенцијата „Ројтерс“.

Затоа, оваа група на земји се ангажира да постигне најбрз и најдобар можен исход во преговорите со клучните актери во фармацевтската индустрија.

Четирите земји, кои делуваат на иницијатива на Берлин, сакаат да спречат можност ЕУ да ја згуби трката за вакцината со САД и Кина, објави весникот.

Напорите на американскиот претседател Доналд Трамп, САД да бидат првите што ќе добијат пристап и контакт со пронаоѓачите на вакцина, во замена за милијарди долари вложени во фармацевтските компании, се следат со сомнеж во Европа, додава „Ханделсблат“.

Соединетите Држави обезбедија речиси третина од првите милијарда дози на експериментална вакцина за Ковид-19 од Астра Зенека, ветувајќи и до 1,2 милијарди долари.

„Кина е подготвена да соработува со Германија и Европска Унија за зајакнување на соработката, зачувување на мултилатерализмот и исполнување на глобалниот предизвик“, рече кинескиот претседател Шји Џјинпинг во телефонскиот разговор со германската канцеларка Ангела Меркел.

Кинескиот претседател, исто така, истакна дека е подготвен да ги зајакне односите со Германија и Европската Унија со цел да внесе безбедност во сегашниот свет на несигурност.

Кси истакнал дека Кина ќе остане отворена за странски инвестиции и дека ќе создаде поволна атмосфера за германските претприемачи, пренесува „Ксинхуа“.

Како дел од овие намери, делегација германски претприемачи ја посетија Кина и покрај ограничувањата поврзани со пандемијата на коронавирус, а новата економска посета започна во Шангај.

Портпаролот на германската влада, Штефен Зајберт, изјави по телефонскиот разговор помеѓу Ангела Меркел и Шји Џјинпинг дека е договорено откажување на планираниот самит ЕУ-Кина, што требаше да се одржи во септември во Лајпциг.

„Со оглед на општата состојба во врска со пандемијата, самитот не е можен во планираното време, но тој ќе се одржи подоцна“, рече Зајберт.

Како што понатаму е соопштено, Ангела Меркел изјави дека Германија е подготвена да ги зајакне врските со Кина, додавајќи дека меѓународната солидарност и мултилатерализам се клучни во глобалната борба против пандемијата на коронавирус.

Одлуката на шведските власти да не воведат карантин како оној во повеќето европски земји, првично наиде на поддршка од граѓаните, но во последните недели се забележува зголемена критика за високата стапка на смртност поврзана со коронавирусот, во споредба со другите нордиски соседи.

Така, високиот или релативно високиот процент на граѓани кои веруваат во можноста на владата да се справи со пандемијата, месецов паднал на 45 проценти, во споредба со 63 проценти во април, покажува истражување на агенцијата „Новус“ спроведено за јавниот тв-канал СВТ.

Паднала и поддршката за Шведската агенција за јавно здравје, која ја водеше кампања за воспоставување мерки за физичко растојание и хигиена, од 73 на 65 проценти.

Во посебна анкета на „Демоскоп“ за дневниот весник „Афтонбладет“, бројот на оние со голема или релативно голема доверба во владините активности поврзани со пандемијата на коронавирус паднала од 65 на 55 проценти.

„Имајќи предвид дека шведските бројки за смртност се разликуваат во споредба со меѓународните податоци, впечатливо е што нивото на доверба е повторно прилично високо“, коментира аналитичарот на „Демоскоп“, Питер Сантесон.

Додека голем дел од Европа воведе карантин во борбата против пандемијата, а Шведска се потпре на поблаги мерки, засновани на одговорноста на граѓаните, со цел да се забави ширењето на епидемијата, но и да се спречи голема штета за економијата.

Шведска има најголема стапка на смртност во светот. Повеќе од 4.500 луѓе починале, а над 40.500 се заразиле.

Данска, Финска и Норвешка заедно имаат околу 1.100 смртни случаи.