Европа
ЕУ ѝ порача на Унгарија: `Не` на новите ѕидови во Европа
Европската унија (ЕУ) не го поддржува унгарскиот план за подигнување ѕид по должина на границата со Србија, со што би се сопрел приливот на бегалци, изјавила портпаролката на Европската комисија (ЕК), Наташа Берто.
„Ние не поддржуваме такви мерки и ги охрабруваме членките да најдат друг начин за да го решат проблемот со бегалците“, изјавила Берто, додавајќи дека земјите членки на ЕУ сепак сами одлучуваат како ќе ја обезбедат границата, така што Брисел нема овластување за да забрани поставување на ѕид, туку само само може да изрази несогласување со унгарскиот план.
„Неодамна се ослободивме од ѕидовите во Европа и не треба сега повторно да ги подигнуваме“, рекла Берто, потсетувајќи дека ЕУ не го поддржала ниту сличниот ѕид кој Бугарија го гради на границата со Турција и дека не учествувала во финансирањето на тој проект.
„Бугарија не побара средства од европските фондови, а доколку го направеше тоа, ние ќе ја одбиевме, како што ги одбивме Грција и Шпанија кога побараа пари за слични намени“, рекла таа.
Берто истакнала дека неопходно е да се најде заедничко европско решение за згрижување на бегалците, наместо секоја членка тоа да го прави на свој начин и потсетила дека неодамна претставила план мигрантите рамномерно да се распоредат на територијата на ЕУ преку воведување на квоти за секоја членка посебно. Тој план меѓутоа наишол на остро противење на неколку членки, вклучувајќи ја Унгарија.
Портпаролката на Комисијата, исто така, негирала дека Унгарија побарала од ЕК да ја помогне во решавањето на проблемот со имигрантите.
Критики на сметка на унгарскиот план за подигнување на четириметарски ѕид долж 175-километарската граница со Србија упатиле и од Советот на Европа и Високиот комесаријат за бегалци на Обединетите нации (УНХЦР).
Комесарот за човекови права на Советот на Европа, Нилс Мужниакс порачал дека ѕидот е „лоша идеја“ и дека треба на мигрантите да им се овозможи пристап до азил, а не да се попречуваат во тоа. Регионалната претставнична на УНХРЦ пак, Кити Мекински изјавила дека нејзината организација е загрижена поради унгарскиот план, бидејќи правото на азил припаѓа во основните и неотуѓиви човекови права./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанските студенти планираат протести против Израел
Студентите во Шпанија во наредните денови би можеле да почнат протести против „геноцидот што го изврши Израел во Палестина“ по примерот на универзитетите во САД, Холандија и Белгија, изјавија нивните претставници за шпанските медиуми.
На Филозофскиот факултет во Валенсија, приморски град на југозападот на земјата, студентите веќе една недела спијат во шатори и секојдневно протестираат.
„Бараме од нашиот универзитет да ги прекине сите врски со институциите и компаниите што соработуваат со Израел“, изјави 20-годишната Естер Монге, студентка по политички науки и социологија за весникот „Ел Паис“.
Во моментот многу универзитети одржуваат состаноци, на кои студентите и професорите гласаат за блокадите на факултетите.
„Студентскиот совет ќе одлучи за активностите во наредните денови“, рече Марија Хозе Лера, координаторка на „Палестиниум“, група за солидарност со палестинските аспирации.
Лера, која има докторат по психологија на Универзитетот во Севилја, вели дека моменно се одржуваат состаноци на универзитетите во Мадрид, Сарагоса, Барселона, Жирона, Гранада и во други градови.
Во понеделникот стотици студенти се собраа пред Универзитетот во Барселона, каде што ги развиорија своите транспаренти.
„Сакаме нашите факултети да ги прекинат сите односи со Израел и компаниите што работат таму“, рече 24-годишниот Пабло Кастиља, дипломиран студент по јавна политика.
Во Мадрид сѐ уште нема протестно кампување, но има демонстрации. На автономниот универзитет во Мадрид планираното предавање за НАТО беше откажано под притисок на пропалестинските демонстранти.
Друг јавен универзитет, Universidad Complutense de Madrid, објави декларација со наслов „Со Палестина против геноцидот во Газа“.
„По влошувањето на насилството врз палестинскиот народ, ги повикуваме професорите, истражувачите и вработените во администрацијата да се спротивстават на колективното казнување на Палестинците што го спроведува Израел“, се вели во декларацијата усвоена од администрацијата на Факултетот за политички науки и социологија.
Сведоци сме на геноцидот врз палестинскиот народ, што е продолжение на децениското систематско насилство врз палестинскиот народ и неговата присилна емиграција“, се вели во декларацијата објавена на веб-страницата на Факултетот.
Европа
(Видео) Украинците објавија снимка: „Ова се руски агенти, сакаа да го убијат Зеленски“
Украинските разузнавачи соопштија дека спречиле руски заговор за атентат на претседателот Володимир Зеленски. Украинската служба за државна безбедност СБУ објави дека фатила руски агенти, кои биле вработени во украинската државна гарда. Разузнавачките претставници велат дека руски агенти планирале да ги убијат претседателот и други високи владини функционери.
Шефот на СБУ, Васил Маљук, изјави дека неуспешниот атентат требало да биде подарок за Владимир Путин пред неговата денешна инаугурација.
СБУ на својот канал на „Телеграм“ објави тврдење дека руски таен агент ги пренел координатите на безбедната куќа пред планираниот воздушен напад. Претставници на разузнавањето додадоа дека Русија планирала да ги уништи сите траги од дронот што би се користел за гаѓање на претседателот со друг проектил.
„Непријателот активно развиваше планови за да го тргне претседателот Володимир Зеленски. Една од задачите на руската разузнавачка мрежа ФСБ беше да бара џелати меѓу војниците блиски до службата што го штити претседателот, кои би можеле да го убијат шефот на државата“, соопштија од СБУ.
„Покрај Володимир Зеленски, непријателот планира да ги елиминира и шефот на Службата за безбедност на Украина, Васил Маљук, шефот на Воената разузнавачка служба на Украина, Кирил Буданов, и други високи функционери“, се вели во соопштението.
„Ограничен број луѓе знаеја за нашата специјална операција и јас лично го следев нејзиниот напредок. Терористичкиот напад, кој требаше да биде подарок за Путин пред инаугурацијата, всушност беше неуспех на руските специјални служби“, рече Маљук.
„Но, не смееме да заборавиме – непријателот е силен и искусен, не може да се потцени. Ќе продолжиме да планираме однапред и да си ја работиме работата секој предавник да ги добие заслужените судски казни“, заклучи тој.
СБУ наведува дека при претресот на просториите на уапсените руски агенти биле пронајдени „релевантни средства за уништување“ и други докази за криминални активности.
Европа
Босфор затворен, заринка украински брод
Теснината Босфор, која го поврзува Црното со Средоземното Море, е затворена за бродови откога денеска таму заринка товарен брод од Украина, соопштија турските власти за ДПА.
Бродот „Алексис“ превезува прехранбени производи од Украина до Египет. Дефект на моторот се случил во близина на излезот од пловниот пат, изјави портпаролот на Управата за безбедност на крајбрежјето за дпа.
Спасувачките напори се веќе во тек, додаде изворот. Босфорот служи како излез за украинското жито на светските пазари во екот на руската инвазија. Речиси 40.000 брода поминале низ Босфорот во 2023 година, според турското Министерство за транспорт.