Европските функционери ја критикуваа во саботата „црната листа“ со имиња на 89 европски политички и воени функционери на коишто им е забранет влезот во Русија, како одговор на соодветната листа што Брисел ја има за руски државјани, што ја разлути Европа и се чини ќе го разгори конфликтот меѓу Западот и Русија започнат со конфликтот во Украина.
 

Европските функционери ја критикуваа во саботата „црната листа“ со имиња на 89 европски политички и воени функционери на коишто им е забранет влезот во Русија, како одговор на соодветната листа што Брисел ја има за руски државјани, што ја разлути Европа и се чини ќе го разгори конфликтот меѓу Западот и Русија започнат со конфликтот во Украина.

Русија изминатите месеци спречи влегување на своја територија на неколкумина европски политичари, повикувајќи се на доверлива листа кој од свои принципи не ја објави, но ја достави до амбасадите на европските држави во Москва.

Имињата на лицата од списокот кои се прогласени за непожелни во Русија почна да се појавуваат во петокот, откако неколку дена претходно руските погранични власти не му дозволија влегување во земјата на германскиот конзервативен пратеник Карл-Георг Велман, претседател на германско-украинската група за пријателство во Бундестагот (германскиот парламент).

Агенцијата Reuters во саботата објави дека станува збор за листа со имињата на 89 европски политичари и воени функционери, кои се познати како критичари на наводната руска улога во рускојазичниот исток на Украина. Според Reuters, кој имал увид во списокот, него го составило руското министерство за надворешни работи и претходно седмицава ја испратило до Делегацијата на Европската унија во Москва.

„Руските власти одлучиле да ја поделат листата. Немаме никакви информации за правната основа, критериумите и постапката“, рекла за агенцијата една од портпаролките на европската дипломатска служба, без да се задржи на правната заснованост на европската „црна листа“.

Европската унија, инаку, воведе санкции со забрана на патување на нејзина територија и со замрзнување на имотите за 151 Русин и Украинец, за кои оцени дека се виновни за присоединувањето на Крим на Русија и за поддршка на рускојазичните бунтовници во источна Украина.

Данската агенција Ritsays објави дека на листата се наоѓаат четворица дански државјани. Станува збор за двајца поранешни министри за надворешни работи Пер Стиге Мелер Лен Есперсен, како и за шефот на военото разузнавање Томас Аренкиеле и челникот на крајната десна Партија на Данците, Даниел Карлсен.

Шведските медиуми објавија дека на осум шведски политичари им е забранет влезот во Русија . Меѓу нив се, европарламентарците Ана Марија Кораца и Гунар Хекмарк, шефот на военото разузнавање Гунар Карлсон, военото аташе на ШВедска во ЕУ и НАТО, ОД Верин, поранешниот министер за култура и пратеничката Лена Аделсон-Лилерут и Мариета де Пурбе-Лундин, портпаролот на Агенцијата за извршување санкции Ева Адлер Линдстром и челникот на неонацистичката организација Шведско движење на отпорот, Магнус Седерман.

Според изјавата за телевизијата CBT на портпаролот на шведското министерство за надворешни работи, Стокхолм веќе испратил барање до руската дипломатија за објаснување на вклучување на државјаните на Шведска на „црната листа“. Според портпаролот Ерик Буман, засега не е добиен одговор. „Министерството за надворешни работи на Шведска се обрати до амбасадата на Руската Федерација, за објаснување зошто овие лица се на списокот. Уште не добивме разјаснување и продолжуваме да го чекаме“, рекол.

Според финската национална телевизија, на списокот се и либералот и поранешен белгиски премиер Хи Верхофстад, како и поранешниот полски премиер Јержи Бузек. На листата е вклучен и заменикот на британскиот премиер Ник Клег, поранешниот еврокомесат за проширување Штефан Фуле и францускиот интелектуалец и активист Бернар-Анри Леви.

Во петокот финскиот дневен весник Helsingin Sanomat, објави дека на финската европратеничка Хајди Хаутала ѝ е забранет влезот во Русија. Претставник на тамошното министерство за надворешни работи рекол дека во четвртокот листата им била предадена на финските власти, и притоа руската страна не објаснила дали на списокот имало и други лица, рекол портпаролот Веса Хјакинен.

Хаутала, од своја страна изјави дека не знае по која основа ѝ е забранет влезот во Русија, но додаде дека тоа за неа „не претставува изненадување“. „Претпоставувавме дека таква листа постои“, рече.

Холандскиот весник Alhemein Dahblad, повикувајќи се на соопштение на тамошното министерство за надворешни работи, објави дека на листата се наоѓаат тројца холандски пратеници, без да ги наведе имињата. Претходно во петокот, холандскиот премиер Марк Руте изјави дека „Руската листа не се темели на меѓународното право, не е транспарентна и не може да биде оспорена на суд“. Весникот коментира дека Москва во четвртокот го испратила списокот до претставници на европски земји во холандската амбасада „како одговор на санкциите на ЕУ“. Од своја страна, германските весници Bild и Frankfurter Allgemeine Zeitung тврдат дека на „црната листа“ од 89 дипломати и воени функционери, има осум државјани на Германија. Според нив, станува збор, покрај Велман, за заменикот претседател на пратеничката група во Бундестагот на владејачката унија CDU/CSU, Михаел Фукс, европратениците од германските Зелени Ребека Хармс и Даниел Кон-Нендит, генералниот секретар на Советот на ЕУ, Уве Корзепиус, државниот секретар во министерството за одбрана Катрин Зудер, членот на CSU Бернд Поселт и командант на германските воздухопловни сили, генерал потполковникот Карл Милер.

Запрашан за споменатата листа, германскиот министер за надворешни работи Франк-Валтер Штајнмаер, кој се наоѓа во неколкудневна посета на Украина, рече дека таа ќе му наштети на мировниот процес во источна Украина. „Во време кога се обидуваме да решиме опасен судир, ова не придонесува кон таа цел“, изјави шефот на германската дипломатија, пренесе агенцијата DPA.

Берлин побара дополнително појаснување од Москва за да „луѓето на коишто им е забранет влез во Русија и за да им помогне да покренат соодветни правни активности“, објави германското министерство за надворешни работи./крај/мф/сн

Извор: Макфакс