Извештајот на руското министерство за надворешни работи за неонацизмот во западните држави содржи фактички неточности и селективни информации, а исто така и географски е нецелосен, се наведува во заедничкиот одговор на државите членки на Европската унија на рускиот извештај, кој го упати шефот на делегацијата на ЕУ во Њујорк (EUDEL) и побара дистрибуција на одговорот како официјален документ на Генералното собрание и Советот за безбедност на Обединетите нации.

Во одговорот се наведува дека ЕУ е запознаена со тоа дека руското министерство за надворешни работи го објави извештајот „Неонацизмот – опасна закана за човековите права, демократијата и владеењето на правото“ кон крајот на април 2015 година, како и дека Русија барала тој да циркулира како документ на Обединетите нации.

„Извештајот на руското министерство за надворешни работи содржи фактички неточности и селективни информации за состојбите во Европската унија и нејзините земји членки. Извештајот, исто така, е географски нецелосен. На пример, недостига поглавјето за ситуацијата во Русија“, се наведува во заедничкиот одговор на ЕУ.

Се изразува и жалење поради тоа што Русија „се обидува да повлече паралели меѓу сегашни и минати политичка настани во контекстот на актуелните кризи“. Се истакнува и дека ЕУ е „предадена на глобалната борба против расизмот, расната дискриминација, ксенофобијата и сродните облици на нетолеранција, вклучително и антисемитизмот и неонацизмот“.

„Европската унија и нејзините земји членки продолжуваат со преземањето решителни чекори по тоа прашање дома, меѓу другото и во контекстот на Рамковната одлука за борбата против одредени форми и изрази на расизам и ксенофобија. Нивната осуда и борбата мора да бидат заеднички консензуален приоритет за целата меѓународна заедница“, се вели во извештајот.

На крајот од својот одговор, Европската унија ги повика сите држави членки на Обединетите нации да останата обединети во борбата против расизмот, расните дискриминации, ксенофобија и сродните форми на нетолеранција, вклучително и антисемитизмот и неофашизмот, како и да се преземат решителни мерки против злосторствата од омраза и говорот на омраза, како и да соработуваат во оваа сфера.

Руското министерство за надворешни работи кон крајот на април формално по повод 70-годишнината од победата над нацизмот во Втората светска војна го објави извештајот „Неонацизмот – опасна закана за човековите права, демократијата и владеењето на правото“. Во него се зборува за 28-те земји членки на ЕУ, за САД, Канада, Норвешка Швајцарија и Украина и се критикува јакнењето на екстремните десни, националистички и неонацистички политички движења во Европа и на европските власти им се забележува недостиг од волја за засилени мерки против таквите појави./крај/мф/сн

Извор: Макфакс