Германскиот министер за правосудство Хајко Мас, потврди во средата дека на новогодишната прослава во Келн се регистрирани низа сексуални напади врз жени кои не се случајност туку станува збор за координирана акција, во којашто, како што е заклучено, учествуваат мажи од северноафриканско потекло, истовремено кога беше официјално објавено дека Германија во текот на 2015 година примила 1,1 милион баратели на азил.

„Се чини дека целата работа е координирана“, изјави за ZDF германскиот министер за правосудство Хајко Мас, додавајќи дека е малку веројатно дека 90 сексуални напади во една вечер во Келн, вклучително и едно силување, се чиста случајност.

Покрај тоа, се наведува дека безредијата започнале кога група од околу илјада лица се поделила и потоа систематски биле изделувани од групата која славела жените кои биле опколувани, сексуално злоставувани и ограбувани.

Масовните напади, кои се извршени околу полноќ во близина на главната железничка станица во Келн, како што може да се заклучи од сведоштвата и податоците од полицијата, биле извршени од лица по потекло од Северна Африка, а слични злосторства се изведен и во Хамбург, каде се пријавени 27 сексуални напади во еден ден. Слични напади се регистрирани во Штутгарт, пишува агенцијата DPA.

Иако засега не се знае дали станува збор за ново придојдените имигранти или, пак, за втората генерација на доселениците, нападите врз жените предизвикаа усвитена дебата за последиците од дозволувањата за масовен и неограничен влез на имигрантите во Германија минатата година.

Поединостите особено околу идентитетот на напаѓачите, вклучително и на петте приведени во новогодишната ноќ во Келн, се штури, бидејќи поради „чувствителната природа на истрагата“ полицијата одбива на јавноста да ѝ даде повеќе податоци.

На удар на жестоки критики се најде особено градоначалничката на Келн, Хенриете Рекер, која во ланската предизборна кампања се залагаше за политиката на широко отворени врати за имигрантите, а сега на своите сограѓанки им сугерираше „да го прилагодат своето однесување“.

Поради тоа огромен број луѓе веднаш на социјалните мрежи ја покренаа тела со „хаштагот“ #EineArmlaenge (на пристојна оддалеченост), напаѓајќи ја градоначалничката Рекер и нејзината препорака жените да се држат на безбедна оддалеченост од странците, како и да не се издвојуваат, туку да се држат во групи.

Поради тоа е обвинета и дека вината за нападите ја префрла врз жртвите, односно жените, наместо да ја зајакне безбедноста на улиците, односно напаѓачите да ги изведе пред правдата.

Германија примила 1,1 милион лица кои бараат азил во текот на 2015 година соопшти во средата Сојузното биро за миграции и бегалци.

„Во 2015 година на сојузно ниво забележени се приближно 1,1 милиони барања за азил“, објави бирото истакнувајќи дека станува збор за рекордна година во текот на којашто се регистрирани пет пати повеќе барања за азил во однос на претходната рекордна 2014 година./крај/мф/сн

Извор: DPA