Европа
Германците поддржуваат посили безбедносни мерки
Повеќето Германци поддржуваат воведување построги безбедносни мерки, вклучително и видео надзор на јавните простори, покажа истражувањето на јавното мнение спроведено по терористичкиот напад со камион врз божикниот базар во Берлин вечерта на 19-ти декември.
Резултатите од анкетата YouGov за агенцијата DPA објавена во неделата покажуваат дека 60 отсто од Германците се залагаат за посилни мерки и видео надзор на јавните места, додека 73 отсто сакаат појаки полициски сили.
Берлинскиот божикен базар на плоштадот Брејтешејдплац не бил покриен до видео надзор за време на нападот, забележува агенцијата.
Властите на германската престолнина, која има статус и на сојузна покраина, се против проширувањето на видео надзорот, но во интервјуто за неделникот Bild am Sonntag, германскиот министер за внатрешни работи Томас де Мезиер ги повика итно да го преиспитаат својот став по ова прашање.
Во меѓувреме беше објавена одлуката дека божикниот базар во Берлин ќе биде отворен до 1-ви јануари, како што и беше претходно планирано.
Осомничен за нападот од понеделникот во кој се убиени 12 луѓе а 48 се повредени, е 24-годишниот Тунижанец Анис Амри, кој беше убиен во петокот во Италија, откако пребегал од Германија во Франција од каде што допатувал во Милано. Беше откриен во случајна рутинска контрола откако пукал во полицаецот. Негови документи и отпечатоци од прсти се најдени во кабината на камионот кој бил грабнат а неговиот полски возач убиен.
Меѓу жртвите седум се Германци, и по еден државјанин на Италија, Чешка, Украина, Израел и на Полска./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.