Истрагата на Советот за безбедност на Холандија во врска со уривањето на малезискиот „Boeing 777“ со 298 патници и членови на екипажот кој во јули 2014-та се урна во источна Украина во зоната на борбени дејствија меѓу украинската армија и рускојазичните бунтовници крај Донецк, открива дека авионот бил соборен со ракета (Н314Мод системот „Бук“ од територија со површина од 320 км2 во источна Украина, соопшти во вторникот претседателот на Советот Тибе Јустра, претставувајќи го холандскиот извештај кој делумно се совпаѓа со наодите од истрагата на рускиот концерн за оружје „Алмаз-Антеј“ кој претходно во вторникот беше претставен во Москва.

„Меѓународната истрага покажа дека авионот бил соборен со ракета 9N314M истрелана од противвоздушниот систем ‘Бук’ од територија со површина со 320 квадратни километри во источниот дел од Украина. Проектилот експлодирал во горниот лев дел од пилотската кабина“, рече Тибе Јустра, претседател на Советот за безбедност на Украина, пред повеќе од 240 акредитирани претставници на медиумите од различни земји во светот.

Станува збор за тип ракета којашто руската номенклатура се означува како 9М38М1, како што претходно во Москва соопштија претставниците на рускиот производител „Алмаз-Антеј“. Но според концернот, ваквиот проектил последен пат е произведен во Советскиот сојуз во 1986 година, и бидејќи со сите надградби има рок на употреба од 25 години, тој од вооружувањето на руската армија е повлечен во 2011 година. Јан Новиков рече дека во времето на СССР Украина добила такви проектили и оти не е познато колку од нив останеле во вооружувањето на украинската армија.

Според симулацијата на руската истрага, ваквиот проектил бил истрелан од областа на селото Зарошченско, во којашто во тој период биле распоредени силите лојални на властите во Киев.

Според него „клунот од авионот бил погоден од стотици делови од боевата глава“. ,„Како резултат на тоа, тројца членови на екипажот во пилотската кабина веднаш загинале, а авионот се распаднал на делови во воздух. Во телата на пилотите се пронајдени фрагменти со голема моќност. Фрагментите паднале на територија со површина од 50 квадратни километри. Сите 298 патници загинаа“, прецизираше Јустра.

Според холандските медиуми, кои се повикуваат на три извора запознаени со извештајот, било утврдено дека проектилот е истрелан од позиции кои ги држеле рускојазичните бунтовници, што не е дефинитивно и децидно потврдено при презентирањето на податоците од истрагата.

Комисијата за истрага на трагедијата, исто така, дошла до заклучок дека воздушниот простор над југоисточна Украина, морал да биде затворен за летови, меѓутоа воздухопловните власти на Украина не го сториле тоа во тој период.

„Ниту еден од претставниците на воздухопловните власти не можел да ги процени ризиците за цивилната авијација, предизвикани од вооружениот конфликт. Според холандското Биро за истраги на воздухопловни несреќи, тие имале доволно причини да го затворат воздушниот простор во југоисточна Украина како превентивна мерка. Меѓутоа, воздухопловните власти не го сториле тоа“, изјави при соопштувањето на резултатите од истрагата Тибе Јустра.

Со цел да биде точно лоцирано местото на истрелувањето на проектилот кој го соборил авионот, неопходно се натамошни истражувања, посочи Јустра. Кажа дека Русија сметала оти типот на ракетата на не може точно да се определи, но Комисијата го отфрлила таквото тврдење, што не се совпаѓа со рускиот извештај.

„Русија сметаше, дека расположливите податоци не овозможуваат да се направат заклучоци за типот на проектилот, но Советот за безбедност на Холандија го отфрли таквото тврдење“, рече. Според него, „во извештајот се објаснети причините за тоа“.

Објавувањето на извештајот доаѓа по 15-месечна работа на претседателот на Советот за безбедност на Холандија, Тибе Јустра, кој координираше со истрагата во којашто покрај холандски експерти, влегуваа и стручњаци од Австралија, Велика Британија, Малезија, САД, Украина и Русија.

Извештајот треба да даде одговор на четирите главни прашања. Првото е – причината за уривањето, односно што придонело за падот на авионот. Во извештајот, исто така, треба да се содржани и заклучоци за дозволата за летањето на авионот над зоната на конфликтот, потоа зошто роднините и семејствата на жртвите требало да чекаат два до четири дена за да добијат потврда од холандските власти за пронаоѓање на останките на нивните блиски на летот и колку оние кои биле во леталото биле свесни дека авионот се урива.

Рускиот производител на оружје претходно во вторникот на прес-конференцијата во Москва потенцираше дека тестирањето го извел „во вистински услови“ активирајќи од земјата рекета од системот „Бук’ во близина на пилотската кабина и во делови на труп на авион „Илјушин“ кој повеќе не бил во употреба и е сличен на Boeing-от.

„Тој тест во целост целосно ја отфрла холандската верзија во врска со тупот на употребената ракета и со местото од кое наводно е истрелана“, изјави извршниот директор на „Алмаз-Антеј“, Јан Новиков.

Според производителот кој своето тестирање го поткрепи со видеоснимка и математичките анализи на движењата, ракетата која го урнала авионот на летот MH17 била истрелана од место во коешто во тоа време се бореле бунтовниците и украинската војска.

„Денеска со сигурност може да кажеме дека авионот Boeing 777 бил погоден со ракета Бук 9М38 истрелана од селото Зарошченское“, во источна Украина, повтори и челникот на компанијата Михаил Маличевски./крај/мф/сн

Извор: Макфакс