Властите во Киев и обвинија во вторникот меѓународните набљудувачи на Организацијата за безбедност и соработка во Европа (ОБСЕ) дека ги откриваат позициите на украинската армија во источниот дел од Украина, а откако набљудувачите објавија дека не воочиле никакво повлекување на тешкото оружје од тампон зоната меѓу силите лојални на киевските прозападни сили и борците на проруските бунтовници договорена со ткн Минска спогодба на 5-ти септември како дел од договорот за прекин на огнот, туку напротив, разместување на нови единици.

Претходно во вторникот беше објавено дека последните денови забележани се конвои со тешко вооружување, вклучително и тенкови и камиони кои се движат кон Донецк. Набљудувачите на Организацијата за безбедност и соработка во Европа (ОБСЕ) потврдија дека се сé поголеми изгледите за тотална војна во источните украински региони.„Во 7,45 часот наутро на 11-ти ноември на три километра од центарот на Донецк забележано е движење на колона која се состои од 43 воени камиони и се движат кон центарот на градот“, се наведува во редовниот дневен извештајот за ситуацијата во југоисточна Украина што во вторникот претпладне беше објавен на интернет страницата на ОБСЕ. Според извештајот, „пет камиони влечеле 120-милиметарски хаубици, а уште пет делумно покриени ракетни системи за плотунски оган“. Немаше информација за можната припадност на колоната.„Украина е загрижена поради извештаите дека поедини членови на Организацијата за безбедност и соработка во Европа (ОБСЕ) во Донбас откриваат информации за позициите на украинската војска“, изјави во Киев портпаролот на Националниот совет за безбедност и одбрана на Украина, Андриј Лисенко, пренесе AFP.Во понеделникот украинското министерство за одбрана го обвини ОБСЕ дека предава чувствителни информации на руски офицери. Како доказ во Киев беше наведен последниот извештај на ОБСЕ за заедничката руско-украинска комисија за тешката артилерија и тенковите во областа на Карловка, село коешто е под контрола на украинските војници. Киев обвинува дека 80 отсто до мисијата на ОБСЕ ја сочинуваат Руси и дека многу од нив се поранешни разузнавачи. Овие обвинувања беа експресно демантирани од Кети Бартон од ОБСЕ, објавувајќи на својот профил на Twitter дека од 17 набљудувачи само еден е Русин.Набљудувачите од мисијата на ОБСЕ минатата седмица го објавија извештајот за артилерискиот напад врз спортското средно училиште во центарот на Донецк, центарот на бунтот на рускојазичното население од источните региони, при што загинаа двајца ученици. ОБСЕ директно не обвини ниедна од страните, но наведе дека артилерискиот напад дошол од северозападен правец, а тоа е позиција што ја држат украинските сили.Ниту проруските бунтовници не се задоволни од извештаите на ОБСЕ и ги обвинија нејзините набљудувачи за пристрасност бидејќи минатата седмица објавија дека има големо придвижување на воени конвои на подрачјата коишто се под контрола на проруските милиции. „Чудно е што не го следат движењето на украинската армија“, изјави за агенцијата РИА Новости еден од командантите на бунтовниците во Донецк, Едуард Башурин.Мисијата на ОБСЕ во вторникот објави дека не регистрирала никакво повлекување на тешкото вооружување од истокот на земјата. „Итно треба да се постигне напредок во спроведувањето на документот од Минск“, изјави портпаролот на ОБСЕ, Мајкл Бочиуркив.Според една од 12-те точки на спогодбата од Минск, договорено е разграничување на двете сили во тампон зона во широчина од триесет километри од првичните позиции коишто ги заземале./крај/мф/сн

Извор: Макфакс