Заменикот на кабинетот на украинскиот претседател Валериј Чалиј, ноќта кон четвртокот, откако во средата киевските власти даваа контрадикторни изјави дека го дозволиле или спречиле доставувањето на руската хуманитарна помош за источните региони, повторно ја обвини Русија дека се обидува да внесе свои ‘миротворци’ како придружба на хуманитарниот конвој.

Тоа значи дека Украина повторно не дозволува помошта да влезе на украинска територија и да дојде до населението во Луганск каде речиси 400 илјади луѓе веќе 12-ти ден се без електрична енергија, вода за пиење, лекови а сѐ помалку имаат и храна.Според заменикот шеф на кабинетот на украинскиот претседател Петро Порошенко, Валериј Чалиј, Украина може да прими хуманитарна помош во согласност со меѓународното право и законите на Украина, а во текот на ноќа „руските миротворци“ се обиделе да влезат во земјата.„Конкретно нашата соработка може да се случи само откако ќе добиеме соодветни информации од Црвениот крст, и спроведување на сите постапки во согласност со меѓународното право и со домашните закони на Украина“, изјави Чалиј за украинската телевизија Петти канал. Истакна дека Украина редовно испраќа хуманитарна помош во регионот Донбас, во кој инаку се наоѓаат градовите Луганск и Донецк кои се под контрола на проруските бунтовници.„Претседателот (Порошенко) иницираше формирање меѓународна хуманитарна помош за Луганск. Русија од своја страна изрази желба да учествува во укажувањето на помошта“, толкува Чалиј. Тој натаму повторно ја обвини Русија дека се обидува да внесе „наводни мировници“ во придружба на хуманитарниот конвој во Харковската област, според соопштението на службата за јавноста на украинскиот претседател, што Москва и претходно го негираше. Портпаролот на рускиот претседател, Дмитриј Песков, претходно во средата ваквото обвинување на Чалиј рече дека „Москва не може да разбере што под овој изговор подразбираат украинските власти“.„Вечерва беше осуетен уште обид да се протнат ‘мировници’ преку границата во Харковската област. Претседателот веднаш свика состанок на таа тема, спроведе преговори на меѓународно ниво и ситуацијата е целосно под контрола“, се цитира изјавата на Чалиј во соопштението на администрацијата на украинскиот претседател.Конвојот од над 280 камиони со храна и друга хуманитарна помош, како лекови, вода и генератори наменета за цивилното население во источните украински области коишто повеќе од четири месеци се зафатени со воени судири, во вторникот вечерта од Москва се упатија кон руско-украинската граница. Пред тргнувањето на конвојот, рускиот министер за надворешни работи Сергеј Лавров објави дека по дводневните интензивни преговарања со Украина, Меѓународниот комитет на Црвениот крст (ICRC) и Организацијата за безбедност и соработка во Европа (ОБСЕ) била договорена и прецизирана шемата при што биле вброени сите барања на Киев, вклучително и маршрутата по која ќе се движи конвојот и дека тој на украинската територија ќе биде означен со украински ознаки.Во средата првично украинските медиуми пренесоа дека Харковската погранична единица е подготвена да го прифати конвојот со хуманитарната помош, меѓутоа подоцна украинскиот министер за внатрешни работи Арсен Аваков изјави дека Украина нема да го пропушти конвојот низ Харковската област. Подоцна, пак, вечерта во средата, портпаролот на украинскиот претседател Порошенко, Свјатослав Цехолко објави дека конвојот може да мине во близина на пограничен премин крај градот Луганск, кој е под контрола на проруските бунтовници. Медиумите тогаш проценија дека Киев се откажал од своето првично барање дека рускиот конвој мора да мине во близина на Харков откако товарот ќе биде претоварен во возила на Меѓународниот комитет на Црвениот крст (ICRC)./крај/мф/сн

Извор: УНИАН/РИА Новости