Европа
Меркел: Има простор за ублажување на грчкиот долг, но без отпис

Разговорите во Брисел покажаа нов квалитет во работата на грчката влада во споредба со претходните месеци, изјави германската канцеларка Ангела Меркел во интервјуто за германската телевизија ZDF емитувано во неделата и притоа дозволи ублажување на должничкиот товар за Грција, но и натаму останува против класичното отпишување на долгот.
„Резултатите од преговорите (меѓу Атина и Еврогрупата во петокот – з.м) дојдоа поради тоа што грчката влада работеше сосема поинаку отколку претходните месеци“, изјави Ангела Меркел. Германската канцеларка притоа додаде дека Атина конечни ја признала „неопходноста од реформите“, како и дека сега „постојат одредени надежи“ во врска со решавањето на грчката должничка криза.
Во петокот на состанокот на советот на министрите за финансии на земјите членки на еврозоната им беше препорачано на националните парламенти на земјите од ЕУ да го ратификуваат почетокот на преговорите за третиот пакет меѓународна финансиска помош за Грција во износ од 86 милијарди евра. Програмата предвидува нови долгорочни мерки за штедења, како спречување на даночната евазија, зголемување на даноците во одредени сектори, реформа на пензискиот и здравствениот систем…
Германскиот Бундестаг, чие изјаснување во Европа се очекува со нетрпение, ќе гласа во среда. Дел од германските пратеници изразија недоверба кон новата програма за помош на Грција, особено доколку во неа не учествува ММФ.
Германската канцеларка во интервјуто за ZDF го поддржа ублажувањето на грчкиот долг поради стравувањата дека е неодржлив, но се противи на неговиот отпис.
„Кога станува збор за каматните стапки и роковите на доспевање на кредитите, сé уште постои простор за дејствување“, продолжи Меркел во врска со барањата за ново отпишување на дел од грчкиот долг. Ги отфрли, меѓутоа, повиците дел од долгот да биде отпишан,
Изрази уверување, исто така, дека Меѓународниот монетарен фонд (ММФ) ќе учествува новата програма за заем за Грција. Нагласи дека e сигурна оти челничката на ММФ, Кристин Лагард ќе го обезбеди учеството на фондот, доколку бидат исполнети условите реформите на грчкиот пензиски систем и ублажувањето на долгот.
„Г-ѓа Лагард, челничката на ММФ, јасно рече дека, доколку условите бидат исполнети, ќе му предложи на управниот одбор на ММФ, фондот да учествува во програмата од октомври. Не се сомневам дека г-ѓа Лагард ќе го оствари она што го кажа“, рече Меркел.
Шефицата на германската влада, исто така, истакна дека постигнатиот договор за Грција во голема мера е благодарение на нејзиниот министер за финансии Волфганг Шојбле, со кого инаку имаа недоразбирање во вреска со можноста Атина да ја напушти еврозоната, на што беше наклонет вториот.
На прашањето дали мисли дека жестоката позиција на Берлин кон Атина, може да му наштети на имиџот на Германија, Меркел одговори „Ние добивме многу голема поддршка“, од земјите како Ирска и Португалија, кои исто така со години се во тешка финансиска состојба.
Според процената на германската канцеларка, проблемот со илегалната имиграција и бегалците во текот на наредните неколку години ќе претставува поголем предизвик за Европската унија, отколку ситуацијата во Грција и стабилноста на еврото.
Меркел притоа, ја истакна потребата да се постигнат единствени правила по прашањето за прием на бегалците на територија ЕУ. Смета и дека е важно да се направи листа на ткн „сигурни“ земји, со цел што побрзо да бидат разгледувани барањата за азил и нивните државјани да бидат депортирани во татковините.
Претходно во неделата германскиот министер за надворешни работи Валтер Штајнмаер во интервјуто за весникот Bild рече дека побарал забрзување на депортацијата од земјата на нелегалните имигранти од земјите од Западен Балкан.
Штајнмаер притоа истакна дека Албанија, Косово и Македонија бараат интегрирање со Европската унија, и признавањето на овие земји како сигурни во однос на почитувањето на човековите права, може да придонесе за решавањето на проблемот со нелегалната имиграција.
Меркел во врска со ова прашање посочи дека разгледувањето на барањата честопати трае предолго поради недостиг од кадар. „Треба да се обидеме да ги мобилизираме сите наши човечки ресурси“, смеа германската канцеларка./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Авион со руски туристи принудно слета во Естонија поради украински напад со дронови

Патнички авион што превезуваше руски туристи до Санкт Петербург беше принуден да слета во Естонија вчера по украинскиот напад со беспилотно летало врз Русија.
„Авионот беше пренасочен кон Талин бидејќи не можеше да слета на аеродромот Пулково поради неговото привремено затворање“, потврди Маргот Холтс, раководител на комуникациите и маркетингот на аеродромот во Талин.
Во ноќта од сабота кон недела, украински беспилотни летала погодија гасен терминал во регионот Ленинград и рафинерија за нафта во регионот Самара. Извор во Службата за безбедност на Украина потврди за „Киев Индепендент“ дека разузнавањето стои зад нападот врз терминалот за течен природен гас во регионот Ленинград.
Авионот, управуван од египетскиот превозник „АлМасрија Јуниверсал Ерлајнс“, полетал од Шарм Ел Шеик и слетал во Талин во 5:33 часот по локално време. Тој го продолжил своето патување кон Санкт Петербург речиси шест часа подоцна.
Според Холтс, на патниците и екипажот не им било дозволено да го напуштат авионот додека биле на аеродромот во Талин.
Украинските напади со беспилотни летала, кои сè повеќе го нарушуваат цивилниот воздушен сообраќај во Русија, се дел од пошироката украинска стратегија за поткопување на руската логистика далеку над линиите на фронтот. Во првите месеци од 2025 година, украинските напади со беспилотни летала наводно ја принудиле Русија да затвори аеродроми повеќе од 200 пати.
фото: принтскрин
Европа
Украинци: Русите извршија 500 напади врз Запорожје за еден ден

Во текот на изминатите 24 часа, руските сили извршија 500 напади насочени кон 13 населени места во регионот Запорожје, објави на Телеграм Иван Федоров, началник на Воената администрација на Запорожје.
„Руските сили извршија четири воздушни напади врз Билохирија, Полтавка и Червони. Три напади со повеќекратен ракетен систем (MLRS) ги погодија Плавни и Мала Токмачка. Вкупно 327 беспилотни летала (главно дронови FPV) ги погодија Запорожје, Биленки, Плавни, Хулајпол, Шчербаки, Новоданиливка, Мала Токмачка и Чаривно. Исто така, 166 артилериски напади се регистрирани во Плавни, Хулајпол, Орихив, Шчербаки, Преображенки, Новоданиливка, Мала Токмачка и Чаривно“, се вели во соопштението.
Властите добија 19 пријави за штети на станбени згради и помошни згради. Немаше пријави за цивилни жртви.
фото: принтскрин
Европа
(Видео) Патниците врескаат во агонија, трепка црвено светло: пекол на летот за Рим

Патниците врескаа од страв откако силни турбуленции го погодиле летот од Шпанија до Рим, принудувајќи го пилотот итно да слета.
Преплашените патници гласно врескаа додека авионот се бореше со силни турбуленции на летот од Аликанте до аеродромот во Рим.
Turbulence caught on camera today on a Wizz Air flight from Alicante to Rome, forcing a diversion to Bologna.pic.twitter.com/sbLjXUp1DH
— The Age Of Genz (@TheAgeOfGenZ) August 21, 2025
Кога авионот изврши итно слетување во Болоња, патниците „му се заблагодарија на Бога што се живи“.
Снимките од кабината го покажуваат авионот како силно се тресе, со светла претежно изгаснати, а црвено светло трепка надвор од прозорецот.
Лошите временски услови во регионот предизвикаа проблеми за авионот додека се обидуваше да слета во Рим.
По неколку обиди за слетување на аеродромот во Рим, авионот беше пренасочен кон Болоња. Слетал таму во 3:53 часот наутро, речиси три часа откако требаше да пристигне во италијанската престолнина.
Патот од Аликанте до Рим обично трае нешто помалку од два часа.