Германската канцеларка Ангела Меркел изјави во вторникот дека нејзината влада нема да ја вооружува Украина за борба против рускојазичните бунтовници, и дека предност им дава на дипломатското решение со закани за построги економски санкции доколку се влоши ситуацијата. 

Во неделата електронскиот издание на американскиот дневен весник The New York Times, објави дека главниот командант на силите на САД и НАТО во Европа, генералот Филип Бридлав, како и повеќе функционери од администрацијата на американскиот претседател Барак Обама се наклонети кон обезбедувањето „воена помош во смртоносно оружје“ за Украина.

„Како што реков и вчера, Германија нема на Украина да и’ испрати никакво смртоносно оружје. Бараме дипломатско решение, а министрите за надворешни работи (на ЕУ) јасно рекоа дека доколку се влоши ситуацијата, неопходно ќе биде да се работи на натамошни санкции“, ја пренесе агенцијата DPA изјавата германската канцеларка Ангела Меркел на прес-конференција не прецизирајќи дали станува збор за санкциите против Русија којашто Западот ја обвинува за наводно за мешање во украинската криза.

Во понеделникот, шефот на германската дипломатија Франк-Валтер Штајнмаер изрази уверување дека доколку се случи американска испорака на оружје за украинската војска ќе се зголеми бројот на жртвите. „Нема воено решение за конфликтот, тоа им го предочувам, меѓу другите, и на американските пријатели кои го разгледуваат снабдувањето со оружје. Доколку тоа се оствари ќе има многу повеќе загинати. Решавањето на судирот во Украина мора да се бара преку преговори. Сегашните политички решенија да заживеат на преговарачката маса, а никогаш преку нишан“, изјави Штајнамер на регионалната конференција на Социјалдемократската партија (SDP) во Нирбнберг. Законот кој го донесе Конгресот на САД едногласно кон средината на декември одобрува нови санкции против Русија и испорака на смртоносно оружје за Украина. Испораката на такво оружје од САД во Украина беше можна веднаш, но е во надлежноста на американскиот претседател кој засега се противи и одобри само помош во радари, возила, опрема за деминирање, ноќни визири, панцирни елеци и противминофрлачки радари.

САД во моментов ја разгледуваат можноста за вооружување на Украина со смртоносно оружје за борба против рускојазичните бунтовници, соопштија неименувани функционери, но истакнуваат дека таквата одлука сé уште не е донесена „Тоа повторно се разгледува“, рекол за Reuters еден висок американски владин функционер за разговорите во администрацијата на претседателот Барак Обама за тоа дали треба да се вооружат украинските сили. „Сé уште не се знае како тоа ќе заврши“, додал.

Функционер на американската администрација кој зборувал за Associated Press, ја потврдил информацијата којашто претходно ја објави весникот The New York Times за можното давање смртоносно оружје за Украина. Според него „кај Обама уште има сомневања во врска со оваа одлука“. Претседателот, како што истакнал соговорникот на агенцијата „исто така е загрижен дека никакво количество оружје украинските војници не може да ги стави на исто ниво со руската војска“. Сепак, Белата куќа е подготвена да го преразгледа проблемот „поради неодамнешната ескалација на конфликтот“ меѓу украинските владини и бунтовничките сили

Американскиот државен секретар Џон Кери во четврток ќе престојува во Киев на разговори со украинските власти, а истиот ден во Брисел ќе се сретнат министрите на одбрана на земјите членки на НАТО.

Рускиот министер за надворешни работи, Сергеј Лавров, во декември рече дека носењето на тој закон во Конгресот претставува „непријателски“ акт кон Русија, иседувајќи ја „разулавената желба Русија да биде казнета за сите можни и невозможни престапи“.

Доколку биде донесена одлука за испорака на смртоносно оружје од САД за Украина, ескалацијата на насилствата во југоисточниот дел од земјата ќе се зголеми, изјави во вторникот претседателот на Советот на (Руската) Федерација за меѓународна политика, Константин Косачев. Тој истакна дека ескалацијата на тензиите во југоисточна Украина им оди на рака на властите во Киев, бидејќи „го одложува моментот кога треба да одговорат на непријатното прашање“ за тоа дека и по една година на власт не донесоа стабилност и подобрување на ситуацијата во земјата, пренесе агенцијата ТАСС./крај/мф/сн

Извор: Макфакс