Руското министерство за надворешни работи ја коментираше во петокот одлуката на Претставничкиот дом на САД да се забрани давање помош на доброволечкиот баталјон „Азов“ кој во рускојазичниот исток на земјата се бори на страната на регуларните украински сили, но истакнувајќи притоа дека на американскиот Конгрес му било потребно „повеќе од година да сфати дека оваа единица е збирштина од отворени нацисти“.

Руската страна истакнува дека американскиот Претставнички дом повика на забрана за доделување опрема за обука на припадниците на украинскиот доброволечки баталјон „Азов“.

„Беше потребно повеќе од една година Конгресот на САД да увиди дека таа единица претставува збирштина од отворени нацисти, со симболи слични на хитлеровските СС единици …. Меѓутоа, подобро подоцна, откако никогаш“, се истакнува во писмената изјава на портпаролот на руското министерство за надворешни работи, Александр Лукашевич.

Според рускиот дипломат, следниот логичен чекор би било, „да се призне, на крајот, дека минатогодишниот државен преврат во Киев (соборувањето на претседателот Виктор Јанукович з.м.), активно поддржан од Вашингтон, бил извршен од страна на истите нацистички бандити“.

„Очигледно е дека другите формации на Националната гарда на Украина не се подобри од ‘Азов’. Крвавите злосторства на украинските националисти кои живи ги запалија жителите на Одеса (мај 2014 година – з.м.) и продолжуваат да убиваат деца и жени во Донбас, одамна говорат самите за себе. Единственото прашање е кога Вашингтон ќе посака да го види тоа“, се истакнува во соопштението.

Претставничкиот дом на САД во четвртокот го усвои предлог-законот за распределба на воениот буџет за следната фискална година, во кој е ставен и амандман со кој на Украина ѝ се обезбедуваат 300 милиони американски долари за набавка на воена опрема и оружје, вклучително и смртоносно, како и амандман со кој се забранува трошење на средствата за обука на припадниците на украинскиот доброволечки баталјон „Азов“.

Овој баталјон се најде и во извештајот од средината на април на набљудувачката мисија на Организацијата за безбедност и соработка во Европа (ОБСЕ) повикувајќи се на претставници на Заедничкиот центар за контрола и координација (на прекинот на огнот од Минск), кога беше забележано дека во судирите меѓу украинската војска и рускојазичните бунтовници во регионот на Донецк ги провоцира неидентификувана група.

Една седмица подоцна, рускиот претставник во ОБСЕ, Андреј Келин, изјави дека ткн „трета сила“ во југоисточна Украина, чиешто присуство го регистрирале набљудувачите на ОБСЕ, се припадниците на доброволечкиот баталјон „Азов“, за кој постојат информации дека е спонзориран од некои украински милијардери блиски на новите власти во Киев.

Москва постојано потсетува и дека поранешниот заменик командант на баталјонот, пратеник во украинскиот парламент од Радикалната партија, Игор Мосијчук, изјави дека го смета за „национално предавство“ тогаш штотуку потпишаниот договор од Минск, кој на 12-ти февруари во белоруската престолнина го потпишаа челниците на Украина, Русија, Франција и Германија./крај/мф/сн

Извор: Макфакс