Во саботата на линијата на раздвојувањето на двете завојувани страни во источна Украина, според принципот „сите за сите“ беа разменети 139 украински војници и 52 борци на рускојазичните бунтовници, јавуваат агенциите.

Размената е извршена на линијата на фронтот во одметнатиот регион Луганск, и тоа е новата фаза од реализирање на мировниот договор потпишан на 12-ти февруари во белоруската престолнана Минск, по прекинот на огнот кој настапи од полноќ на 15-ти февруари и почетокот на повлекувањето на тешкото вооружување од зоната на контактот, со која се предвидува ослободување на сите затвореници и заробеници на двете страни од почетокот на судирите ланскиот април.

Агенцијата ТАСС прецизира дека за 16 борци на силите на ткн НР Луганск биле ослободени 103 украински војници, а додека за 36 борци на Донецката народна република, биле разменети 37 украински војници. Се истакнува дека на посредникот донецките бунтовници требало да му предадат 37 украински војници, но еден од нив се одлучил да остане во Донецк.

„Ослободувањето на сите заробеници треба да биде спроведено на дело, но се’ уште има многу тешкотии кога станува збор за безбедносните и правосудните прашања. Сите ослободени се амнестирани“, изјави за AFP посредникот на Киев во преговорите, украинскиот политичар Виктор Медвечук челник на украинското граѓанско движење „Украински избор“ кој е член во Контактната група за надзор на спроведувањето на примирјето во Донбас, за кого AFP пишува оти го сметаат инаку за близок соработник на рускиот претседател Владимир Путин.

„Ви благодарам за се’. Претставуваше задоволство да се соработува со вас“, рекол по завршувањето на размената на заробениците Медвечук на претставничката за човекови права на самопрогласената ткн Народна Република Донецк, Дарија Морозова.

Украинскиот претседател Петро Порошенко информацијата за ослободувањето на украинските војници ја сподели на Twitter. „Штотуку ослободивме 139 украински војници“, напиша Порошенко.

Според секторот за односи со јавноста на движењето „Украински избор“, меѓу ослободените припадници на украинските безбедносни сили повеќе од 100 биле заробени во неколкудневните борби за стратешкиот град Дебалцево, а петмина биле припадници на одредот „Киборзи“, односно командоси кои во април 2014 година го заземаа аеродромот крај Донецк.

Меѓу оние што ги ослободи украинската страна е и новинарот Андиј Захарчук, украински државјанин, кој инаку работи како спортски новинар а следел и општествени теми од транспортот и културата теми за руската новинска агенција Невски новости од Санкт Петербург. Тој на 2-ри февруари допатувал во Украина да го посети семејството а бил уапсен на 10-ти февруари во Николаевск, под обвинение за предавство и притворен.

Како што пишува агенцијата РИА Новости, од неговата редакција соопштиле дека тој има намера да се врати во Петербург каде што ќе ја продолжи професионалната кариера и , исто така, ќе поднесе барање за добивање руско државјанство./крај/мф/сн

Извор: Макфакс