Командантот на силите на НАТО во Европа, американскиот генерал Фили Бридлав, предупреди дека Русија трупа оружје на Крим, црноморскиот полуостров кој пред една година се присоедини кон Русија што Западот го смета за нелегално руско анектирање на украинска територија, додека претставникот на рускојазичните сили на самопрогласената ткн Народна Република Донецк го повика да види дека украинската армија го прекршува договорот од Минск концентрирајќи војска и вооружување на линијата на разграничувањето. 

„Русија распореди многу софистицирани ракетни системи, меѓу кои ракети ’земја – воздух’ кои покриваат 40 отсто од Црното Море. Таму се и крстостувачките ракети кои ја покриваат целата област на Црното Море“, изјави американскиот генерал Филип Бридлав за украинската телевизија 1+1.

На прашањето за бројот на руските војници во источна Украина, генералот Бридлав одби да го прецизира. „Силите доаѓаат и доаѓаат, преку границата на југоистокот којашто не е под контрола на владата во Киев“, истакна американскиот генерал кој командува со силите на НАТО во Европа.

Бридлав рече дека НАТО не може да го потврди повлекувањето на тешкото вооружување од линијата на фронтот, што е втора од точките од мировниот договор што на 12-ти февруари во белоруската престолнина Минск го потпишаа челниците на Украина, Русија, Франција и Германија. Бунтовниците имено изјавија дека минатата седмица го повлекле тешкото вооружување од линијата на контактот, но дека тоа не го сторила украинската стреана.

„Гледаме движење на тешката артилерија од двете страни, но не знаеме што се случува со артилеријата источно од линијата боиштето, бидејќи на набљудувачите на ОБСЕ таму не им е дозволен пристапот“, рече Бридлав.

На оваа изјава подоцна во понеделникот заменикот командант на бунтовничките сили од Донецк, Едуард Басурин, го повика американскиот генерал „кој наводно не го гледа повлекувањето на тешкото вооружување само од источната страна на линијата на раздвојувањето“ да го повлече ова тврдење или „да го објасни молчењето по повод“ трупањето оружје на украинската армија.

„Од нашето разузнавање продолжуваме да добиваме загрижувачки извештаи за зголемување на украинските сили во безбедносната (тампон) зона“, која според Минскиот договор треба да изнесува од 30 до 70 километри во длабочина од линијата на раздвојувањето, рече Басурин, пренесе РИА Новости.

Според него, тоа го покажуваат податоците добиени во неделата при проверка на информациите за локациите и составот на украинските војски во близина на Артемовск, северно до Дебалцево, важниот железнички јазол во источниот регион Донбас, кој го зазедоа проруските сили и по започнувањето на прекинот на огнот.

Басурни прецизираше, слично на Бридлав, дека на територијата на „споменатото населено место, спротивно на сите постигнати договори, во моментов се концентрирани повеќе од 200 оклопни возила, девет ракетни системи за повеќекратен оган ’Ураган’ и шест единици артилериски оружја со калибри 122 и 152 мм“. Додаде дека во самото гратче се стационирани и повеќе од 2.000 војници од 54-та моторизирана пешадиска бригата на Вооружените сили на Украина./крај/мф/сн

Извор: Макфакс