Европа
ОБСЕ: Ограничен пристапот на набљудувачите до местото на падот на авионот во Украина
„Не им е овозможен пристап како што очекуваа. Немаа слобода на движењето потребна да ја извршат својата работа. Местото на несреќата сѐ уште не е обезбедено“, изјави Томас Гремингер. Гремингер, швајцарскиот амбасадор во седиштето на ОБСЕ во австриската престолнина Виена, додаде дека тимот од 75 набљудувачи чекал околу час и петнаесет минути и дека се враќа во Донецк. Најави и дека во сабота повторно ќе се обидат да дојдат до местото на несреќата, пренесува Reuters.Задачата на набљудувачите на ОБСЕ, кои не се форензички експерти, е да известат за ситуацијата на местото на падот на авионот коешто се наоѓа во местото коешто го контролираат проруските бунтовниците кои се под напад на украинската армија. „Тие (набљудувачите) не добија неограничен пристап како што им беше ветено. Можеле да дојдат само на 200 метри од местото на несреќата“, изјави за РИА Новости портпаролката на ОБСЕ Наташа Раџаковиќ. Додала дека во моментот кога набљудувачите се приближиле до зоната на падот се слушнале предупредувачки истрели во воздух. „Не било пукано кон набљудувачите, било стрелано во воздух. Веројатно како предупредување“, рекла Раџаковиќ.Претставник на проруската милиција и претставник на ткн генералштабот на самопрогласената Народна Република Донецк, кој се претставил како Илја, потврдил за агенцијата дека пристапот на набљудувачите бил ограничен. „Јас не добив инструкции од своето раководство да им овозможам непречен пристап. Им дозволивме само да го снимаат влезот во зоната“, рекол.„Тие не се експерти за безбедност во воздухопловството, и зошто тие воопшто дојдоа тука, не е сосема јасно“, истакнал еден од офицерите на единиците на проруските бунтовници кои го обезбебедуваат местото на кое се расфрлани останките од малезискиот авион во чие уривање загинаа 298 луѓе од кои 85 се деца./крај/мф/сн
Извор: Reuters/РИА Новости
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.